Monday, April 24, 2017

ကြားဖြတ်ရွေးကောက်ပွဲ မဲပေးနိုင်ရေး စက်ရုံအလုပ်ရုံများပိတ်သိမ်းရန် ညှိနှိုင်းတောင်းဆိုထား

ဧပြီ ၁ ရက်တွင် ကျင်းပပြုလုပ်မည့် ကြားဖြတ်ရွေးကောက်ပွဲတွင် လှိုင်သာယာမြို့နယ်
အတွင်းရှိ စက်ရုံ၊ အလုပ်ရုံအလုပ်သမားများ မဲပေးခွင့် ရရှိရေးအတွက် စက်ရုံများပိတ်ပေးရန်
မြို့နယ်အုပ်ချုပ်ရေး ဌာနမှတစ်ဆင့် ညွှန်ကြားထားသည်ဟု လှိုင်သာယာမြို့နယ် ရွေးကောက်ပွဲ
ကော်မရှင်ဥက္ကဋ္ဌ ဦးသိန်းစိုးက မတ် ၂၇ ရက်တွင် ပြောသည်။

''ဒီကိစ္စကို မြို့နယ်ရွေးကောက်ပွဲအဖွဲ့ဝင်အားလုံးသတိထားမိတယ်။ ပထမအဆင့်အနေနဲ့
ဖြစ်စေချင်တာကတော့ ရွေးကောက်ပွဲရက်မှာ နေ့တစ်ဝက်အစား တနေ့ကုန် စက်ရုံ၊အလုပ်ရုံတွေ
ပိတ်ပေးဖို့ ကျွန်တော်တို့ အစည်းအဝေးမှာတော့ ဆုံးဖြတ်တယ်'' ဟု ဦးသိန်းစိုးက ပြောသည်။

ရွေးကောက်ပွဲနေ့တွင် စက်ရုံ၊ အလုပ်ရုံများ ပိတ်ပေးရန် အခက်အခဲရှိပါကလည်းစက်ရုံရှိ
အလုပ်သမားများ ဆန္ဒမဲပေးနိုင်ရေးအတွက် အဆိုင်းများခွဲပြီး မဲရုံများသို့ စေလွှတ်မဲပေးခြင်းများ
ပြုလုပ်ရန် မြို့နယ်အထွေထွေအုပ်ချုပ်ရေး၊ မြို့နယ်အလုပ်သမားဦးစီးဌာနများနှင့်
စက်မှုဇုန်ကြီးကြပ်ရေးကော်မတီများမှတစ်ဆင့် စက်ရုံ၊ အလုပ်ရုံ လုပ်ငန်းရှင်များကို
အကြောင်းကြားထားသည်ဟု ဆိုသည်။

စက်ရုံအလုပ်ရုံများအပြင်၊ ရပ်ကွက်ဓမ္မာရုံများ၊ ဆွမ်းလောင်းအသင်းများကိုလည်း ၄င်းတို့၏
အသံချဲ့စက်များဖြင့် ရွေးကောက်ပွဲနှင့် မဲပေးခြင်းလုပ်ငန်းစဉ်များကို အများပြည်သူသုိ့
အသိပေးကြေညာပေးကြရန် မြို့နယ်ကော်မရှင်က တောင်းဆိုထားသည်ဟု ဦးသိန်းစိုးက
ပြောသည်။

အလားတူ ကြားဖြတ်ရွေးကောက်ပွဲနေ့တွင် အလုပ်သမားများ မဲပေးနိုင်ရေးအတွက်စက်ရုံ
အလုပ်ရုံများပိတ်ပေးရေးကို စီစဉ်ညွှန်ကြားပေးရန် ရွေးကောက်ခံမည့်ပါတီများက ခရိုင်
ရွေးကောက်ပွဲကော်မရှင်ထံ ပူးပေါင်းတောင်းဆိုထားသည်ဟု ဆိုသည်။

''ရွေးကောက်ပွဲရက်က စနေနေ့ဖြစ်နေတယ်။ အလုပ်ရုံ၊ စက်ရုံက အလုပ်သမားတွေအတွက်
ရွေးကောက်ပွဲရက်မှာ အလုပ်ပိတ်ပေးဖို့ တောင်းဆိုတယ်။ ဒါပေမဲ့ အခုချိန်ထိတော့ တိကျတဲ့
အဖြေမရသေးဘူး။ သူတို့က (မြို့နယ်ကော်မရှင်) တင်ပြထားပါတယ်ပဲ ပြောနေတယ်'' ဟု
အမျိုးသားဒီမိုကရေစီအဖွဲ့ချုပ်ပါတီမှ ဝင်ရောက်အရွေးချယ်ခံမည့် ဦးဝင်းမင်းက ပြောသည်။
လှိုင်သာယာမြို့နယ်ရှိ မဲပေးပိုင်ခွင့်စုစုပေါင်း၏ ထက်ဝက်ခန့်မှာ စက်ရုံအလုပ်သမားများ
ဖြစ်ပြီး၊ မဲပေးခွင့်မရရှိပါက နိုင်ငံသားအခွင့်အရေး ဆုံးရှုံးနိုင်သည်ဟုလည်း ၄င်းက
ပြောသည်။

''ဖြစ်နိုင်သရွေ့တော့ အများပြည်သူအလုပ်ပိတ်ရက်မှာ ရွေးကောက်ပွဲကို စီစဉ်ပေးရမယ်လို့
ဥပဒေမှာ ပြဋ္ဌာန်းထားတယ်။ ဒါဟာ ၂ဝဝ၈ အခြေခံဥပဒေမှာလည်း နိုင်ငံသားတစ်ယောက်
မဲပေးခွင့်ရအောင် စီမံပေးရမှာ။အလုပ်ရုံတွေဖွင့်ပေးထားတော့လည်း အလုပ်သမားတွေအနေနဲ့က
မဲပေးလို့ ထမင်းမစားရဘူး။ အလုပ်ဆင်းမှ ထမင်းစားရမှာ။ အဲဒါ ဒေသန္တရဥပဒေအရ စက်ရုံတွေကို
ပိတ်ပေးသင့်တယ်လို့ တင်ပြတောင်းဆိုထားတယ်'' ဟုကိုယ်စားလှယ်လောင်း ဦးဝင်းမင်းက
ပြောသည်။

လက်ရှိတွင် ကြားဖြတ်ရွေးကောက်ပွဲနှင့် ပတ်သက်ပြီး အလုပ်သမားထုအတွင်း စိတ်ပါဝင်စားမှုနှင့်
ရွေးကောက်ပွဲနှင့်ပတ်သက်သည့် အသိပညာရရှိမှုများ နည်းပါးနေသည်ဟုလည်း အလုပ်သမား
ခေါင်းဆောင်များက ပြောသည်။

''စက်ရုံတွေကတော့ ဖွင့်မြဲတိုင်းဖွင့်မှာပါ။ ပိတ်တော့ မပိတ်ပေးလောက်ဘူး။ ဘယ်လိုပုံစံမျိုးနဲ့
မဲပေးခွင့်ပြုမလဲတော့ မသိဘူး။ အလုပ်သမားတွေကတော့ ရွေးကောက်ပွဲနဲ့ ပက်သက်ပြီး
စိတ်ဝင်စားမှု မရှိဘူး။ ရွေးကောက်ပွဲနဲ့ ပတ်သက်ပြီး အလုပ်သမားတွေကြား ပြောဆိုသံ
မကြားရဘူး'' ဟုလည်း မြန်မာနိုင်ငံအလုပ်သမားသမဂ္ဂများအဖွဲ့ချုပ် (စီတီယူအမ်)မှာ ရန်ကုန်တိုင်း
ဥက္ကဋ္ဌဖြစ်သူ မဝင်းသိင်္ဂီစိုးက ပြောသည်။

လှိုင်သာယာမြို့နယ်တွင် လူဦးရေစုစုပေါင်း ခုနစ်သိန်းကျော် နေထိုင်လျက်ရှိပြီး နောက်ဆုံး
ပြုစုထားသည့် မဲစာရင်းများအရ ဆန္ဒမဲပေးပိုင်ခွင့်ရှိသူပေါင်း ၃၇၇,ဝ၂၆ ခန့်ရှိသည်ဟု
မြို့နယ်ရွေးကောက်ပွဲ ကော်မရှင်စားရင်းအရ သိရသည်။

ရန်ကုန်တိုင်းဒေသကြီးအတွင်းရှိ ကြားဖြတ်ရွေးကောက်ပွဲကျင်းပမည့် မြို့နယ်များမှာ
လှိုင်သာယာ၊ ကမာရွက်၊ လှိုင်၊ ကြည့်မြင်တိုင်၊ အလုံ၊ ဆိပ်ကမ်း၊ လသာ၊ လမ်းမတော်၊
ဒဂုံဆိပ်ကမ်း၊ ဒဂုံမြို့သစ်အရှေ့ပိုင်း မြို့နယ်များနှင့် ကော့မှူးမြို့နယ်များဖြစ်သည်။

ဤအကြောင်းအရာနှင့် ပက်သက်၍ ထင်မြင်ချက်ပေးလိုပါက ...
[email protected] သို့ ပေးပို့နိုင်ပါသည်။


ရာသီဥတုအခြေအနေ - ရန်ကုန်

အကြည့်အများဆုံး - ရန်ကုန်သတင်း