မြို့နယ်တရားရုံးများ အခြားဌာနပိုင်မြေနေရာများ ငှားရမ်းအသုံးပြုနေရ

ရန်ကုန်တိုင်းဒေသကြီးအတွင်းရှိ မြို့နယ်တရားရုံးများသည် ကိုယ်ပိုင်မြေနေရာမရှိဘဲ
အထွေထွေအုပ်ချုပ်ရေး ဌာနပိုင် မြေနေရာများ ငှားရမ်းအသုံးပြုနေရသည်ကို တွေ့ရှိရကြောင်း
ရန်ကုန်တိုင်းဒေသကြီးလွှတ်တော် တရားစီရင်ရေး၊ တရားဥပဒေစိုးမိုးရေးနှင့် တိုင်ကြားစာများ
အသနားခံစာ စိစစ်ရေးကော်မတီ အဖွဲ့ဝင်များက ပြောသည်။

အုပ်ချုပ်ရေးမဏ္ဍိုင်နှင့် တရားစီရင်ရေး မဏ္ဍိုင်နှစ်ရပ်ကို သီးခြားခွဲထုတ်ရန် လိုအပ်ရာ
မြို့နယ်တရားရုံးများနှင့် ဥပဒေရုံးများသည် အထွေထွေအုပ်ချုပ်ရေးဌာန၏ အ၀န်းအ၀ိုင်းအတွင်း
ရောက်ရှိနေသည့်အတွက် မေးခွန်းထုတ်စရာ အခြေအနေဖြစ်ပြီး သီးခြားမြေနေရာဖြင့် ရုံးဌာနအဖြစ်
တည်ရှိရန် လုပ်ဆောင်မည်ဖြစ်ကြောင်း စိစစ်ရေးကော်မတီဝင် လှိုင်မြို့နယ်၊ အမှတ်(၁)
တိုင်းဒေသကြီးလွှတ်တော် ကိုယ်စားလှယ် ဦးကျော်ကျော်ထွန်းက ပြောသည်။

"တရားရုံးတွေ တည်ရှိတာကတော့ စဖွင့်ကတည်းကလို့ သိရတယ်၊ ဆိုတော့ မဆလခေတ် မတိုင်ခင်
ပါလီမန်ခေတ် ၀န်ကြီးချုပ်ဦးနုတို့ လက်ထက်လောက်ကတည်းကလို့ ထင်တယ်။ နယ်ဘက်ရုံးတွေ
ကတော့ အကုန်လုံး ဒီအတိုင်းပဲ။ ကွမ်းခြံကုန်းအစ အင်းစိန်မြောက်ပိုင်းခရိုင်ရုံးလည်း ဒီအတိုင်းပဲ။
အကုန်လုံးက စုပေါင်းရုံးပုံစံ လုပ်ထားတယ်။ ဥပဒေအရာရှိရုံးတွေလည်း ဒီအတိုင်း တစ်တွဲတည်း
ထားကြတယ်" ဟု ၎င်းက ဆိုသည်။

ယခင် ဦးသိန်းစိန်အစိုးရလက်ထက်တွင် ရန်ကုန်တိုင်းဒေသကြီးအတွင်းရှိ ခရိုင်လေးခုအနက်
အရှေ့ပိုင်းခရိုင်၊ အနောက်ခရိုင်နှင့် တောင်ပိုင်းခရိုင်ရုံးများကို နိုင်ငံတကာနည်းတူ
သန့်ရှင်းကျယ်ဝန်းသော တရားစီရင်ခန်းများ၊ ရှေ့နေနှင့် အမှုသည်များ နားနေရန် သီးခြားဆောင်များ
ပါဝင်သည့် အဆင့်မြင့်ခရိုင်တရားရုံးများအဖြစ် တည်ဆောက်ခဲ့သော်လည်း မြောက်ပိုင်းခရိုင်
တရားရုံးမှာ စုပေါင်းရုံးအဖြစ် ကျန်ရှိနေသည်။

"ကော်မတီအနေနဲ့လည်း အကြံပြုထားတယ်၊ ထည့်ပြောထားတယ်။ တရားရုံးသည်
ထွေအုပ်ရုံးဝင်းထဲမှာ မရှိသင့်ဘူး။ တရားရုံးရော ဥပဒေရုံးရော အခြားရုံးတွေရော ဘယ်ရုံးမဆို
သီးသန့်ပဲ ကောင်းတယ်၊ ဒါမှ သူတို့ လုပ်ရကိုင်ရတာ ကောင်းမယ်။ မဟုတ်ရင် ကျပ်ညပ်နေမယ်" ဟု
ဦးကျော်ကျော်ထွန်းက ပြောသည်။

ရန်ကုန်တိုင်းဒေသကြီးအတွင်းရှိ ကိုကိုးကျွန်းမြို့နယ်မှအပ စိစစ်ခဲ့သည့် မြို့နယ်ပေါင်း ၄၄ မြို့နယ်တွင်
အချို့သော မြို့နယ်တရားရုံးများသည် ကိုယ်ပိုင်မြေနေရာ မရှိဘဲ အခြားဝန်ကြီးဌာနပိုင်
မြေနေရာပေါ်တွင် ၀င်ရောက် ဆောက်လုပ်ထားပြီး စုစုပေါင်း ၂၀ ရာခိုင်နူန်းဝန်းကျင်ခန့် ရှိသည်ကို
လေ့လာ တွေ့ရကြောင်း၊ မင်္ဂလာတောင်ညွှန့်မြို့နယ်နှင့် ရန်ကင်းမြို့နယ် တရားရုံးသည်
ကိုယ်ပိုင်မြေနေရာမရှိဘဲ စည်ပင်ဌာနပိုင်နှင့် အထွေထွေအုပ်ချုပ်ရေးဌာနပိုင် မြေနေရာတို့ပေါ်တွင်
တည်ဆောက်ထားသည်ကို လေ့လာတွေ့ရသည်ဟု ဆိုသည်။

"ရုံးတွေကို စိစစ်မေးမြန်းတဲ့အခါမှာ တရားရုံးတွေ ရဲစခန်းရုံးတွေရဲ့ ဥပဓိရုပ်မခံ့ညားတာတွေ ဒါတွေကို
ပြုပြင်ဖို့၊ ပြန်လည်တည်ဆောက်ဖို့ ထည့်သွင်းထားတယ်။ ပြောရရင် မပြည့်စုံဘူးပေါ့။ တွံတေးမြို့နယ်
တရားရုံးဆိုရင် ကိုယ်ပိုင်ရုံး မရှိဘူး၊ အဲဒီတော့ ထွေအုပ်ရုံးမှာ တရားရုံးက ငှားနေရတယ်။
ဒါတွေကတော့ မဖြစ်သင့်ဘူး။ တရားရုံးဆိုတာ တရားရုံးရဲ့ ဂုဏ်သိက္ခာနဲ့အညီ၊ လူတွေကလည်း
လူတွေရဲ့ ဂုဏ်သိက္ခာနဲ့အညီ သပ်သပ်ရပ်ရပ် ရှိစေဖို့ လိုတယ်" စိစစ်ရေးကော်မတီဝင်
မင်္ဂလာတောင်ညွှန့်မြို့နယ်၊ အမှတ် ၂ တိုင်းဒေသကြီး လွှတ်တော်ကိုယ်စားလှယ် ဦးရန်အောင် က
ပြောသည်။

တရားစီရင်ရေးမဏ္ဍိုင် ပြန်လည်တည့်မတ်ရေးတွင် ပြုပြင်ပြောင်းလဲရေးအတွက် အဆင့်သင့်
မဖြစ်သေးခြင်းနှင့် ယခင်လုပ်ထုံးလုပ်နည်း အဟောင်းများနှင့် နေသားတကျ ခေါက်ရိုးကျိုးနေကြခြင်း
သည် အချိန်ယူရမည့် အချက်များဖြစ်ကြောင်း၊ ထိုစနစ်ပပျောက်စေရန် တရားစီရင်ရေးစနစ်ကို
ဆုပေးဒဏ်ပေးစနစ်ဖြင့် ကျင့်သုံးစေရန် လိုအပ်ကြောင်း ဦးရန်အောင်က ပြောသည်။

တပ်မတော်သား လွှတ်တော်ကိုယ်စားလှယ် နှစ်ဦးအပါအ၀င် လွှတ်တော်ကိုယ်စားလှယ်
စုစုပေါင်း ၁၁ ဦးပါ စိစစ်ရေးကော်မတီသည် မြို့နယ်အဆင့်ရုံးများကို စိစစ်ဆောင်ရွက်ပြီးနောက်
လေ့လာတွေ့ရှိချက်များနှင့် အကြံပြုတိုက်တွန်းချက်များ ပါဝင်သည့် အစီရင်ခံစာတစ်စောင်ကို
လွှတ်တော်နှင့် တိုင်းဒေသကြီးအစိုးရအဖွဲ့ထံ တင်သွင်းမည် ဖြစ်သည်။

မြန်မာနိုင်ငံတွင် လွတ်လပ်ရေးရပြီး နောက် ၁၉၄၈ ခုနှစ် ပြည်ထောင်စုတရားစီရင်ရေး ဥပဒေအရ
ပြည်ထောင်စုတရားလွှတ်တော်ချုပ်နှင့် အဆင့်ဆင့်သော တရားရုံးများကို စတင်ဖွဲ့စည်း
တည်ထောင်ခဲ့သည်။

၁၉၆၂ ခုနှစ်၊ မတ် ၂ ရက်တွင် တော်လှန်ရေးကောင်စီက နိုင်ငံတော်အာဏာရယူပြီးနောက်
ဆိုရှယ်လစ်တရားစီရင်ရေးစနစ်ကို အသွင်းပြောင်းလဲစေ၍ တရားလွှတ်တော်ချုပ်နှင့်
တရားလွှတ်တော်များကို ဖျက်သိမ်းကာ တရားရုံးချုပ်ကို ဖွဲ့စည်းတည်ထောင်ခဲ့သည်။

လက်ရှိ ပြည်ထောင်စု တရားလွှတ်တော်ချုပ်သည် ၂၀၀၈ ခုနှစ် ဖွဲ့စည်းပုံအခြေခံဥပဒေအရ
တည်ထောင်ထားခြင်း ဖြစ်သည်။

ဤအကြောင်းအရာနှင့် ပက်သက်၍ ထင်မြင်ချက်ပေးလိုပါက ...
[email protected] သို့ ပေးပို့နိုင်ပါသည်။


ရာသီဥတုအခြေအနေ - ရန်ကုန်

အကြည့်အများဆုံး - ရန်ကုန်သတင်း