Monday, April 24, 2017

လုပ်သက်ခွင့်လစာများရရှိရေး ကိုရီးယားနိုင်ငံသားပိုင် အထည်ချုပ် အလုပ်သမားများ ဆန္ဒပြတောင်းဆို

အလုပ်သမားဥပဒေတွင် မဖြစ်မနေပေးချေရန် ပြဌာန်းထားပြီးဖြစ်သည့် လုပ်သက်ခွင့်လစာကြေးများ
ရရှိရေးကို ရွှေပြည်သာစက်မှုဇုန်ရှိ ကိုရီးယားနိုင်ငံသားပိုင် ယူအိုင်ဘီ မြန်မာအထည်ချုပ်စက်ရုံမှ
အလုပ်သမား ၂၆၆ ဦးတို့က ဆန္ဒထုတ်ဖော်တောင်းဆိုနေလျက်ရှိသည်ဟု အလုပ်သမားများက
မြန်မာတိုင်း(မ်)ကို မတ်လ ၃၀ ရက်က ပြောသည်။

"အခုစက်ရုံက ဒီနေ့ ပေးမယ်လို့တော့ ပြောထားတယ်။ ကျွန်တော်တို့ ငွေတွေ ပြန်ရမှပဲ
အလုပ်ပြန်လုပ်နိုင်မှာပါ" ဟု စက်ရုံတွင် ၇ နှစ်ကျော်ကြာ လုပ်ကိုင်လာခဲ့သည့်
အလုပ်သမားခေါင်းဆောင် ကိုဇေယျာမင်းက ပြောသည်။

အလုပ်သမားများက ၂၀၁၅ ခုနှစ်အတွက် လုပ်သက်ခွင့်လစာများကို တောင်းဆိုနေခြင်းဖြစ်ပြီး
စက်ရုံအနေဖြင့် တစ်ဦးကို လုပ်သက်ခွင့်လစာ ၃၆၀၀၀ ၀န်းကျင်ခန့် ပေးချေရမည်ဖြစ်သည်။

ယင်းလုပ်သက်ခွင့်လစာမှာ အလုပ်သမားဥပဒေအရ ပေးထားပြီးဖြစ်သည့် ရှောင်တခွင် ခွင့်ရက်များ၊
ကျန်းမာရေးခွင့်ရက်များတွက် အလုပ်သမားများက ခွင့်ယူထားခြင်းမရှိပါက ပြန်လည်ပေးချေရခြင်း
ဖြစ်သည်။

အဆိုပါ လုပ်သက်ခွင့် လစာများကို အလုပ်သမားများအား ပေးရန် ဖေဖော်ဝါရီလအတွင်းတွင်
စတင်တောင်းဆိုခဲ့ခြင်းဖြစ်ပြီး အလုပ်သမားများ တောင်းဆိုမှုပြုလုပ်စဉ်တွင် စက်ရုံတာဝန်ရှိသူများက
ပေးချေရန် ငြင်းဆိုခဲ့သည်။

ထို့နောက် အလုပ်သမားဦးစီးဌာနတာဝန်ရှိသူများ၏ ညွှန်ကြားချက်များကြောင့် အဆိုပါ
လုပ်သက်ခွင့်လစာများကို မတ်လ ၂၄ ရက်နေ့တွင် ပေးမည်ဟု စက်ရုံတာဝန်ရှိသူများက
ကတိပြုထားခဲ့ခြင်းဖြစ်သည်။

သို့သော်လည်း မတ်လ ၃၀ ရက်နေ့အထိ ပေးချေရန် ပျက်ကွက်ခဲ့သဖြင့် အလုပ်သမားများက
မတ်လ ၂၉ ရက်ကတည်းက ဆန္ဒထုတ်ဖော်တောင်းဆိုနေခဲ့ခြင်းဖြစ်သည်ဟု
အလုပ်သမားခေါင်းဆောင်များက မြန်မာတိုင်း(မ်)ကို ပြောသည်။

"အရင်တုန်းကလည်း ကျွန်တော်တို့ ဒီလုပ်သက်ခွင့်လစာကို မရခဲ့ကြဘူး။ ခုကြမှာ ဒီလို
အခွင့်အရေးတွေ ကျွန်တော်တို့ ရပိုင်ခွင့်ရှိတာကို သိလာရတာ။ ဒါကြောင့် ဒီလုပ်သက်ခွင့်လစာကို
တောင်းဆိုကြတာပါ" ဟု အလုပ်သမားတစ်ဦးဖြစ်သည့် ကိုနေလင်းထွန်းက ပြောသည်။

၎င်းက ဆက်လက်ပြီး " စက်ရုံမှာက အချိန်ပိုလည်း မရှိဘူး။ ဒီတော့ ကျွန်တော်တို့ လစာတစ်ခု
လေးထဲနဲ့က အဆင်မပြေဘူး။ ကျွန်တော်တို့ အချိန်ပိုတွေ လုပ်ရမှာ အဆင်ပြေမှာ" ဟု ဆိုသည်။

စက်ရုံရှိ အလုပ်သမားအားလုံးမှာ အနိမ့်ဆုံးလုပ်ခလစာ တစ်ရက် ၃၆၀၀ ကျပ်နှုန်းဖြင့် တစ်လလျှင်
၁၀၈၀၀၀ ကျပ်သာ ရရှိကြပြီး လုပ်သက်ကျွမ်းကျင်ကြေးအဖြစ် ၆၀၀၀ မှ ၈၀၀၀ အထိ ထပ်ပေါင်း
ရရှိကြသည်ဟု အလုပ်သမားများထံမှ သိရသည်။

"ဒီလုပ်သက်ခွင့်လစာက အလုပ်သမားကို ပေးကို ပေးရမယ့်ဟာပါ။ လုပ်သက်ခွင့်လစာကို
ဥပဒေမှာလည်း အတိအကျပြဌာန်းပြီးသားပါ။ ဒီလုပ်သက်ခွင့်လစာကို ညှိနှိုင်းတောင်းဆိုနေဖို့ကို
လုံးဝမလိုတာ။ စက်ရုံဘက်က ပေးကို ပေးရမှာ။ အလုပ်သမားအနေနဲ့ တောင်းဆိုနေဖို့ကို
မလိုတာ" ဟု အဆိုပါ အငြင်းပွားမှုအား ညွှန်ကြားဖြေရှင်းပေးနေသည့် အင်းစိန်မြို့နယ်
အလုပ်သမားညွှန်ကြားမှု ဦးစီးဌာနမှ ဦးစီးအရာရှိ ဦးသန်းထိုက်က မြန်မာတိုင်း(မ်)ကို ပြောသည်။

အဆိုပါ လုပ်သက်ခွင့်လစာများပေးချေရန်အတွက် မြို့နယ်အဆင့် အလုပ်ရုံများနှင့် အလုပ်သမားဥပဒေ
စစ်ဆေးရေး ဦးစီးဌာနကလည်း စက်ရုံတာဝန်ရှိသူများကို သတိပေးစာ ထုတ်ပြန်ထားသည်ဟု
၎င်းက ပြောခဲ့သည်။

မူလက စက်ရုံတာဝန်ရှိသူများက အဆိုပါ လုပ်သက်ခွင့်လစာများအား ဧပြီ ၅ ရက်တွင် ပေးချေမည်ဟု
ကတိပြုထားခဲ့ပြီး၊ လက်ရှိတွင် မတ်လ ၃၁ ရက်နေ့တွင် ပေးချေပေးမည်ဟု သက်ဆိုင်ရာ
အလုပ်သမားဌာနများထံ ပြန်လည် သတင်းပို့ထားသည်ဟုလည်း ဦးသန်းထိုက်က ပြောသည်။

အဆိုပါ အငြင်းပွားနှင့် ပတ်သက်ပြီး အထည်ချုပ်စက်ရုံ မန်နေဂျာဖြစ်သူထံ မတ်လ ၃၀ ရက်တွင်း
ဖုန်းဖြင့် ဆက်သွယ်ခဲ့သော်လည်း ဖုန်းစက်ပိတ်ထားသဖြင့် မေးမြန်းနိုင်ခဲ့ခြင်း မရှိခဲ့ပေ။

အဆိုပါ ယူအိုဘီမြန်မာ အထည်ချုပ်စက်ရုံမှာ ရွှေပြည်သာစက်မှုဇုန် ၃ တွင် ၂၀၀၅ ခုနှစ်ကတည်းက
ဖွင့်လှစ်လုပ်ကိုင်နေသည့် စက်ရုံတစ်ခုဖြစ်သည်။

ဤအကြောင်းအရာနှင့် ပက်သက်၍ ထင်မြင်ချက်ပေးလိုပါက ...
[email protected] သို့ ပေးပို့နိုင်ပါသည်။


ရာသီဥတုအခြေအနေ - ရန်ကုန်

အကြည့်အများဆုံး - ရန်ကုန်သတင်း