အမှုလက်ကျန်ပေါင်း ၁,၀၀၀ ကျော်သည့် မြို့နယ်တရားရုံး လေးရုံးအနက် လှိုင်သာယာမြို့နယ် အများဆုံးဖြစ်

ရန်ကုန်တိုင်းဒေသကြီးအတွင်း စစ်ဆေးဆဲ မပြီးပြတ်သေးသောအမှု လက်ကျန်ပေါင်း ၁,၀၀၀ ကျော်
ကျန်ရှိသည့် မြို့နယ်တရားရုံး လေးရုံးရှိပြီး ယင်းအနက် လှိုင်သာယာမြို့နယ်တရားရုံးသည်
အမှုလက်ကျန် အများဆုံးဖြစ်ကြောင်း ရန်ကုန်တိုင်းဒေသကြီးလွှတ်တော်အမတ် ဦးကျော်ကျော်ထွန်းက
ပြောသည်။

ရန်ကုန်တိုင်းဒေသကြီးအတွင်း လှိုင်သာယာ၊ မြောက်ဥက္ကလာပ၊ မှော်ဘီနှင့် တောင်ဒဂုံမြို့နယ်
တရားရုံးများတွင် စစ်ဆေးရန် ကျန်ရှိသည့် မပြီးပြတ်သေးသော အမှုလက်ကျန်ပေါင်း ထောင်ကျော်စီ
ကျန်ရှိနေခြင်းဖြစ်ပြီး လှိုင်သာယာမြို့နယ် တရားရုံးတွင် အမှုလက်ကျန် ၁,၅၇၂ မှု။
မြောက်ဥက္ကလာပမြို့နယ်တရားရုံးတွင် အမှုလက်ကျန် ၁,၃၁၆ မှု၊ မှော်ဘီမြို့ နယ်တရားရုံးတွင်
အမှုလက်ကျန် ၁,၂၀၀ မှုနှင့် တောင်ဒဂုံမြို့နယ် တရားရုံးတွင် အမှု လက်ကျန် ၁,၁၁၂ မှု
ကျန်ရှိနေခြင်းဖြစ်သည်။

"တရားရုံးတွေ လေ့လာတဲ့အခါမှာ သူတို့ ဆီမှာရှိတဲ့ စာရင်းချုပ် အမှုလက်ကျန်တွေကို
တင်ပြထားတာ။ ဒါတွေက လေ့လာခဲ့တဲ့ အချိန် က အချက်အလက်၊ အခြားအသေးစိတ်
အချက်လက်တွေက သီးခြားရှိသေးတယ်။ သူတို့ဘက်ကလည်း တကယ်တမ်း အမှုကြန့်ကြာတာတွေ
ရှိတဲ့အကြောင်း၊ မလိုလားအပ်တဲ့ ကြန့်ကြာမှုတွေ မဖြစ်အောင် ဆောင်ရွက်နေတယ်လို့ပြောတယ်"ဟု
ဦးကျော်ကျော်ထွန်းက ပြောသည်။

ပြည်ထောင်စု တရားလွှတ်တော်ချုပ်၏ တရားစီရင်ရေးဆိုင်ရာ မဟာဗျူဟာစီမံကိန်းအရ
ရန်ကုန်တိုင်းဒေသကြီးရှိ မြို့နယ်ပေါင်း ၄၄ မြို့နယ်အနက် တရားစီရင်ရေးနှင့် တရားဥပဒေ
စိုးမိုးရေးဆိုင်ရာ အချက်အလက်များကို လေ့လာကောက်ယူခဲ့ခြင်းဖြစ်ပြီး ထိုလေ့လာတွေ့ရှိချက်များကို
မြို့နယ်တရားရုံး ၄၀ တွင် အမှုလက်ကျန်ပေါင်း ၅၀၀ ကျော်အထက်ရှိ မြို့နယ်တရားရုံးကိုးရုံးကိုလည်း
တွေ့ရှိခဲ့ရကြောင်း ယင်းတို့မှာ သင်္ဃန်းကျွန်းမြို့နယ် တရားရုံးတွင် အမှုလက်ကျန် ၉၉၆ မှု၊
ရွှေပြည်သာမြို့နယ် တရားရုံးတွင် အမှုလက်ကျန် ၇၁၃ မှု၊ သန်လျင်မြို့နယ်တရားရုံးတွင် အမှုလက်ကျန်
၅၉၀ မှု၊ တိုက်ကြီးမြို့နယ်တရားရုံးတွင် အမှုလက်ကျန် ၅၈၉ မှု၊ လှည်းကူးမြို့နယ်တရားရုံးတွင်
အမှုလက်ကျန် ၅၆၈ မှု၊ သာကေတမြို့နယ် တရားရုံးတွင် အမှုလက်ကျန် ၅၃၂ မှု၊
မင်္ဂလာတောင်ညွှန့်မြို့နယ် တရားရုံးတွင် အမှုလက်ကျန် ၅၃၀ မှု၊ တွံတေးမြို့နယ်တရားရုံးတွင်
အမှုလက်ကျန် ၅၁၉ မှု၊ မင်္ဂလာဒုံမြို့နယ် တရားရုံးတွင် အမှုလက်ကျန် ၅၁၀ မှုဖြစ်သည်။

ကျန်ရှိသည့် အမှုလက်ကျန်ပေါင်း ၅၀၀ အောက်ရှိ မြို့နယ်တရားရုံးများအနက် မရမ်းကုန်း၊ မြောက်ဒဂုံ၊
အရှေ့ဒဂုံနှင့် လှိုင်မြို့နယ် တရားရုံးများမှာ သတင်းအချက်အလက် အပြည့်အစုံ မရှိခဲ့သည့်အတွက်
ဖော်ပြထားခြင်းမရှိသေးကြောင်း၊ အဆိုပါ တရားရုံးဆိုင်ရာ အချက်အလက်များကို ၂၀၁၆ ခုနှစ်၊
ဩဂုတ် မှ ၂၀၁၇ ခုနှစ်၊ ဇန်န၀ါရီအထိ ကောက်ယူခဲ့ခြင်း ဖြစ်ကြောင်း လွှတ်တော်ကိုယ်စားလှယ်
ဦးကျော်ကျော်ထွန်းက ပြောသည်။

လေ့လာတွေ့ရှိချက်များအရ အမှုများ ကြန့်ကြာရခြင်းမှာ ရုံးချိန်းများတွင် သက်သေ ထွက်ဆိုရမည့်
ရဲဝန်ထမ်းများနှင့် မှုခင်းဆရာဝန်များက တရားရုံးချိန်းများသို့ လာရောက်နိုင်ခြင်းမရှိသဖြင့်
တရားရုံးချိန်းများပြန်လည်ချိန်းဆိုရခြင်းကြောင့် အမှုများကျန့်ကြာနေခြင်းဖြစ်ပြီး တရားသူကြီးများသည်
တစ်ဦးလျှင် ပျမ်းမျှ အမှု ၁၀၀ မှ ၁၅၀ အထိ စစ်ဆေးနေကြရပြီး တရားရုံးများသည် တရားရုံး၏
ဖွဲ့စည်းပုံအရ ပြည့်စုံမှု မရှိဘဲ လိုအပ်ချက်ရှိနေ သည့်အတွက် တရားခွင်များတွင် တရားသူကြီး
နေရာများ လစ်လပ်လျက်ရှိကြောင်း ၎င်းက ပြောသည်။

"အမှုသည်တွေကလည်း ဝေးကွာလှတဲ့ ကျေးရွာဒေသတွေကနေ အလုပ်ပျက်ပြီး အမှုမပြီးမချင်း
ဒုက္ခခံကြရပါတယ်။ တရားရုံး ပရ၀ုဏ်ကလည်း ကျဉ်းမြောင်းတဲ့အတွက် အခက်အခဲရှိတာ
တွေ့ရတယ်။ လွှတ်တော်မှာ တိုင်းတရားသူကြီးချုပ် သူဖြေတာက အပြု သဘောတော့ဆောင်ပါတယ်။
ပူးပေါင်းလုပ် ဆောင်နေတယ်လို့ ပြောတယ်။ ဒီမေးခွန်းကလည်း သူ့တို့အတွက် တစ်စုံတစ်ရာ
ထိရောက်မယ်လို့ ယူဆပါတယ်" ဟု ဦးကျော်ကျော်ထွန်း က ပြောသည်။

တရားရုံး အမှုတွဲများ စစ်ဆေးဆောင်ရွက်ရာတွင် တရားသူကြီးများနှင့် ရှေ့နေများသည် အမှုကိစ္စ
အများအပြားကို ဆောင်ရွက်နေရသည့်အတွက် ယခုကဲ့သို့ အချိန်ကြန့်ကြာ ရခြင်းဖြစ်ပြီး ကြန့်ကြာမှု
မဖြစ်စေရန် အကောင်အထည်ဖော် ဆောင်ရွက်လျက်ရှိကြောင်း ရန်ကုန်တိုင်းဒေသကြီး
တရားလွှတ်တော် တရားသူကြီးချုပ် ဦးဝင်းဆွေက ပြောသည်။

ဤအကြောင်းအရာနှင့် ပက်သက်၍ ထင်မြင်ချက်ပေးလိုပါက ...
[email protected] သို့ ပေးပို့နိုင်ပါသည်။


ရာသီဥတုအခြေအနေ - ရန်ကုန်

အကြည့်အများဆုံး - ရန်ကုန်သတင်း