လယ်သမားဟုဆိုကာ စက်ရုံ လုပ်ငန်းရှင်များထံ ငွေတောင်းခံနေမှုခြိမ်းခြောက်ငွေညစ်မှုသာဖြစ်

 

လှိုင်သာယာမြို့နယ်တွင် ဆောက်လုပ်ရေးလုပ်ငန်းတစ်ခုမှ တွေ့မြင်ရသည့် ကျူးကျော်နေအိမ်များ။ အောင်မြင်ရဲဇော်/ မြန်မာတိုင်း(မ်)လှိုင်သာယာမြို့နယ်တွင် ဆောက်လုပ်ရေးလုပ်ငန်းတစ်ခုမှ တွေ့မြင်ရသည့် ကျူးကျော်နေအိမ်များ။ အောင်မြင်ရဲဇော်/ မြန်မာတိုင်း(မ်)

လှိုင်သာယာစက်မှုဇုန်နှင့် ရွှေလင်ပန်းစက်မှုဇုန်များရှိ စက်ရုံအလုပ်ရုံလုပ်ငန်းရှင်များကို
လယ်သမားဟုဆိုသူများက ငွေတောင်းခံနေခြင်းများသည် မြေယာအငြင်းပွားမှု ပြဿနာ
မဟုတ်ဘဲ ခြိမ်းခြောက်ငွေညစ်သည့်အမှုသာဖြစ်ကြောင်း ရန်ကုန်တိုင်းဒေသကြီးအစိုးရအဖွဲ့
နယ်စပ်ရေးရာနှင့် လုံခြုံရေးဝန်ကြီး ဗိုလ်မှူးကြီးတင်အောင်ထွန်းက ယခုလ ၅ ရက်က
ပြုလုပ်သော တိုင်းလွှတ်တော်အစည်းအဝေးတွင် ပြောသည်။

''လှိုင်သာယာမြို့နယ်၊ ရွှေလင်ပန်းစက်မှုဇုန်အတွင်းရှိ လုပ်ငန်းလည်ပတ်လျက်ရှိသော
စက်ရုံများရှေ့တွင် လူနေတဲများပိတ်ဆို့တည်ဆောက်ပြီး အဓမ္မငွေညှစ်ခြိမ်းခြောက်နေ
မှုများသည် မြေယာအငြင်းပွားမှုများ ဟုတ်ပါသလား''ဟု ဆိပ်ကြီးခနောင်တို မဲဆန္ဒနယ်
အမှတ်(၁) လွှတ်တော်ကိုယ်စားလှယ် ဒေါ်စန္ဒာမင်းက အဆိုပါနေ့ တိုင်းလွှတ်တော်
အစည်းအဝေးတွင် မေးမြန်းခဲ့ရာ၌ ဗိုလ်မှူးကြီးတင်အောင်ထွန်းက ပြန်လည်
ဖြေကြားခဲ့ခြင်းဖြစ်သည်။

အဆိုပါ ခြိမ်းခြောက်ငွေညစ်မှုများကို မည်သည့်အတွက်ကြောင့် ကာကွယ်တားဆီးမှု
မပြုလုပ်နိုင်သလဲဟု လွှတ်တော်ကိုယ်စားလှယ် ဒေါ်စန္ဒာမင်းက မေးမြန်းခဲ့ခြင်းဖြစ်ပြီး
ထိုပြဿနာများကို သက်ဆိုင်ရာ အာဏာပိုင် အဖွဲ့အစည်းများက မဖြေရှင်းပေးဘဲ
လုပ်ငန်းရှင်များကိုယ်တိုင် ပြေလည်အောင် ဖြေရှင်းနေရခြင်းသည် နည်းလမ်းကျ၊ မကျ
သိရှိလိုကြောင်း မေးမြန်းခဲ့ခြင်းဖြစ်သည်။

''ပိတ်ဆို့ကျူးကျော်မှုနဲ့ ပတ်သက်ပြီး စက်ရုံတာဝန်ရှိသူတွေကိုယ်တိုင်
ရဲစခန်းမှာတိုင်တန်းတာနဲ့ချက်ချင်း ကျွန်တော်တို့ ဥပဒေလုပ်ထုံးလုပ်နည်းနဲ့အညီ
အမှုဖွင့်အရေးယူပြီးဖြစ်ပါတယ်။ တရားရုံးကိုလည်း တင်ထားပြီးဖြစ်ပါတယ်''ဟု
တိုင်းဒေသကြီး နယ်စပ်ရေးရာနှင့် လုံခြုံရေးဝန်ကြီး ဗိုလ်မှူးကြီးတင်အောင်ထွန်းက
ပြောသည်။

ဒေါ်စန္ဒာမင်းဒေါ်စန္ဒာမင်း

တရားမမှုဖြင့် ဆက်နွှယ်နေသည့် အမှုအခင်းများသည် ရဲအရေးမပိုင်သည့်
အမှုအခင်းများဖြစ်ခြင်းကြောင့် တရားရုံးသို့သာ ဦးတိုက်လျှောက်ထားရမည့်
အမှုများဖြစ်ကြောင်း၊ ဖြစ်စဉ်များတွင် ပါဝင်ခဲ့သည့် ရာဇဝတ်မှုများကို ရဲတပ်ဖွဲ့က
အချိန်နှင့်တစ်ပြေးညီ အရေးယူဆောင်ရွက်ထားပြီးဖြစ်ကြောင်း ၄င်းက ပြောသည်။

''ကာယကံရှင် လာမတိုင်သေးသရွေ့ကတော့ ကျွန်တော်တို့အနေနဲ့ သွားစစ်လို့
မရပါဘူး။ ကာယကံရှင်တွေအနေနဲ့ ကိုယ့်ကို စော်ကားခံရတယ်၊ မတရား
အလုပ်ခံရတယ်လို့ ယူဆရင်ချက်ချင်းမြို့နယ်တရားရုံးမှာ အမှုဖွင့်တိုင်ကြားဖို့လိုပါတယ်''ဟု
ဗိုလ်မှူးကြီးတင်အောင်ထွန်းက ပြောသည်။

စက်မှုဇုန်အတွင်းရှိ စက်ရုံများရှေ့တွင် ကျူးကျော်တဲများ ပိတ်ဆို့တည်ဆောက်ပြီး
လူမိုက်ဆန်ဆန် ငွေညှစ်ခြိမ်းခြောက်တောင်းခံနေမှုများကို ၂ဝ၁၅ ခုနှစ်က စပြီး
လူတစ်စုက စတင်လုပ်ဆောင်လာခဲ့သည်ကို စစ်ဆေးတွေ့ရှိခဲ့ကြောင်း၊ ငွေတောင်းခံသူများကို
စစ်ဆေးရာတွင်လည်း အဆိုပါ စက်ရုံမြေနေရာကို ပိုင်ဆိုင်ခဲ့သည့် လယ်သမားဖြစ်ကြောင်း
ခိုင်မာသော အထောက်အထားများ ပြသနိုင်ခြင်း မရှိသော်လည်း ရပ်ကျေးဥက္ကဋ္ဌများက
ငွေညှစ်ခြိမ်းခြောက်သူများဘက်မှ ထောက်ခံပေးထားသည်ကို စစ်ဆေးတွေ့
ရှိထားကြောင်း လွှတ်တော်အမတ် ဒေါ်စန္ဒာမင်းက ပြောသည်။

''ဘယ်လောက်ထိ အခြေအနေဆိုးဆိုလဲဆိုရင် သူတို့တွေရဲ့ ငွေညစ်တောင်းခံမှုတွေက
တရားဝင်သလား။ မဝင်ဘူးလားဆိုတာတောင် မသိပါဘူး။ အထက်တန်းရှေ့နေတစ်ဦးက
ခြိမ်းခြောက်သူတွေဘက်ကနေ စက်ရုံပိုင်ရှင်ကို နို့တစ်စာပို့ပြီး ငွေတောင်းခံတာကို
အံ့အားသင့်စွာတွေ့ရှိနေရပါတယ်''ဟု လွှတ်တော်ကိုယ်စားလှယ်ဖြစ်သူ ဒေါ်စန္ဒာမင်းက
ပြောသည်။

ဗိုလ်မှူးကြီးတင်အောင်ထွန်း ဗိုလ်မှူးကြီးတင်အောင်ထွန်း

လှိုင်သာယာမြို့နယ်တွင် စက်ရုံလုပ်ငန်းရှင်များနှင့် ဒေသခံလယ်သမားများအကြား
ဖြစ်ပွားသည့် မြေယာပိုင်ဆိုင်မှု အငြင်းပွားမှုများတွင် လူမိုက်များကအခကြေးငွေယူပြီး
ဥပဒေမဲ့ ဝင်ရောက်ဖြေရှင်းခြင်းများအပြင်၊ လယ်သမား အစစ်အမှန်မဟုတ်ဘဲ
လုပ်ငန်းရှင်များထံ ငွေကြေးတောင်းခံသည့် ဖြစ်ရပ်များရှိနေကြောင်း မြို့ခံများက
ဆိုသည်။

''လယ်သမားအတုအယောင်ရယ်၊လူမိုက်အဖွဲ့ရယ်ပေါင်းပြီး လုပ်စားနေတာများတယ်။
ကိုယ်တွေလိုက်ဖြေရှင်းပေးဖူးသလောက်တော့ အဲဒီလို လုပ်စားနေကြတာ တွေ့ရတယ်။
တစ်ဖွဲ့ဆိုရင် စက်ရုံကလည်း ဘာဖြစ်သလဲမသိဘူး သိန်း ၆ဝဝ တောင်ပေးတယ်။ ဒါကို
လယ်သမားဆိုသူတွေက မယူဘူး။ ထပ်တိုးတောင်းတော့ အမှုဖြစ်နေတယ်''ဟု
လှိုင်သာယာမြို့နယ် အမျိုးသားဒီမိုကရေအင်အားစုပါတီဥက္ကဋ္ဌဟောင်းဖြစ်သူ
ဦးမြင့်သိန်းက မြန်မာတိုင်း(မ်)ကို ပြောသည်။

ဤအကြောင်းအရာနှင့် ပက်သက်၍ ထင်မြင်ချက်ပေးလိုပါက ...
[email protected] သို့ ပေးပို့နိုင်ပါသည်။


ရာသီဥတုအခြေအနေ - ရန်ကုန်

အကြည့်အများဆုံး - ရန်ကုန်သတင်း