တရားဥပဒေစိုးမိုးရေးအတွက် တရားစီရင်ရေး ဥပဒေစနစ်ကို ပြင်ရမည်ဟု ကော်မတီဥက္ကဌ ပြော

မြန်မာနိုင်ငံတွင် တရားဥပဒေစိုးမိုးရေးအတွက် ကိုလိုနီအင်္ဂလိပ်လက်ထက်မှ ဆက်ခံကျင့်သုံးခဲ့သော
တရားစီရင်ရေး ဥပဒေစနစ်များကို ပြုပြင်ပြောင်းလဲရမည်ဖြစ်ကြောင်း ရန်ကုန်တိုင်းဒေသကြီး
တရားဥပဒေစိုးမိုးရေးနှင့် တရားမျှတမှုဆိုင်ရာလုပ်ငန်းများ ပေါင်းစပ်ညှိနှိုင်းရေးအဖွဲ့ခွဲ ဥက္ကဌ
ဦးစိန်လှ(နိုတြိပဗ္ဗလစ်နှင့် တရားလွှတ်တော်ရှေ့နေ)က ပြောသည်။

ဇွန်လ ၂၃ ရက်နေ့က ရန်ကုန်တိုင်းဒေသကြီးတရားလွှတ်တော် အဆောက်အဦးတွင် ပြုလုပ်သည့်
ရန်ကုန်တိုင်းဒေသကြီး တရားဥပဒေစိုးမိုးရေးနှင့် တရားမျှတမှုဆိုင်ရာလုပ်ငန်းများ ပေါင်းစပ်ညှိနှိုင်းရေး
အဖွဲ့ခွဲဌာန ဖွင့်ပွဲတွင် ကိုလိုနီအင်္ဂလိပ်လက်ထက် မှကျင့်သုံးခဲ့သော တရားစီရင်ရေးဥပဒေစနစ်များကို
ပြုပြင်ပြောင်းလဲရမည်ဖြစ်ကြောင်း ၎င်းက ပြောကြားခဲ့ခြင်းဖြစ်သည်။

"ကျွန်တော်အမြင် ပြောရရင် အင်္ဂလိပ်စနစ်ကိုက ပြင်စရာ ရှိနေတယ်။ တရားလိုက ပြောချင်တာပြော
တရားခံဘက်က ပြောချင်တာပြော။ ဟိုဘက်ဒီဘက် မတင်ချင်တာ မတင်ဘူး။ အဲတော့ အဓိက
အမှန်တရား ရှာဖွေရတာ ရမလာဘူး။ ဘယ်လိုစဉ်းစားမလဲဆိုတော့ အင်္ဂလိပ် က ပေးသွားတဲ့
ဒီစနစ်ကိုက ပြင်စရာရှိနေတယ်လို့ မြင်တယ်" ဟု ဥက္ကဌ ဦးစိန်လှက ပြောသည်။

အင်္ဂလိပ်ခေတ်တွင် ပြဌာန်းခဲ့သော ဥပဒေစနစ်များသည် မြန်မာ့ လူနေမှုစနစ်အကြောင်း ထင်ဟပ်ခြင်း
မရှိသကဲ့သို့ ဓမ္မသတ်၊ ရာဇသတ်နှင့် အမိန့်တော်ပြန်တမ်းများကို မတွေ့ရှိရကြောင်း၊ လက်ရှိအချိန်တွင်
ကိုလိုနီခေတ် အင်္ဂလိပ်ဥပဒေများကို ပြန်လည် ပြင်ဆင်ရန် လေ့လာသုံးသပ်နေကြောင်း၊
ဘိုးဘွားလက်ထက်က ထားရှိခဲ့သော ပညာရပ်များကို တဆင့်ထက်တဆင့် ပိုမိုကောင်းမွန်အောင်
ပြင်ဆင်ဆောင်ရွက်ကြရမည်ဖြစ်ကြောင်း ၎င်းက ဆိုသည်။

တရားဥပဒေစိုးမိုးရေးနှင့် တရားမျှတမှုဆိုင်ရာလုပ်ငန်းများ ပေါင်းစပ်ညှိနှိုင်းရေးအဖွဲ့ခွဲသည်
ပေါင်းစပ်ညှိနှိုင်းရေးလုပ်ငန်းများကို ဆောင်ရွက်ရန် ရန်ကုန်တိုင်းဒေသကြီး အထွေထွေအုပ်ချုပ်ရေး
ဦးစီးဌာန၊ တိုင်းဒေသကြီး ရဲတပ်ဖွဲ့မှူး၊ တိုင်းဒေသကြီးတရားလွှတ်တော် တရားရေးဦးစီးမှူး၊
တိုင်းဒေသကြီး ဥပဒေချုပ်ရုံး ဥပဒေအရာရှိနှင့် အရပ်ဖက်တရားလွှတ်တော်ရှေ့နေ အပါအဝင် ၇ ဦးဖြင့်
ဖွဲ့စည်းထားသည်။

ပေါင်းစပ်ညှိနှိုင်းရေးအဖွဲ့ခွဲသည် တရားစီရင်ရေးကဏ္ဍနှင့် စပ်လျဉ်းသည့် အခက်အခဲများကို
လေ့လာကာ အခြေခံအကြောင်းအရင်းကိစ္စရပ်များကို သုံးသပ်တင်ပြခြင်း၊ မဟာဗျူဟာများ
ချမှတ်ရေးဆွဲခြင်း၊ အများပြည်သူ၏ ယုံကြည်ကိုးစားမှု ရရှိအောင် ဆောင်ရွက်ပေးခြင်း၊ တရားစီရင်ရေး
ကဏ္ဍနှင့် စပ်လျဉ်းသည့် အများပြည်သူကို အသိပညာပေးခြင်းနှင့် သတင်းအချက်အလက်များကို
ထုတ်ပြန်ပေးရမည် ဖြစ်သည်။

ရာဇသတ်ကြီးဆိုင်ရာ ဥပဒေတွင် လူတစ်ယောက် ပါးရိုက်ခံရမှုသည် ရဲအရေးမပိုင်မှုဖြစ်ပြီး
ကိုယ်တိုင် တရားရုံးများတွင် သွားရောက် လျှောက်ထားကြရသော်လည်း လူတစ်ယောက်ပိုင်ပစ္စည်း
ပျောက်ဆုံးမှုနှင့်ခိုးယူခံရမှုတို့တွင် ရဲအရေးယူပိုင်ခွင့် ပေးအပ်ထားကြောင်း၊ ထိုအချက်တို့သည်
လူကျင့်ဝတ်သိက္ခာတို့ကို အလေးမထားခြင်းသဘောကို သက်ရောက်သည့်အတွက်
မြန်မာဓလေ့ထုံးတမ်းများနှင့် ကိုက်ညီမှု မရှိသဖြင့် ပြင်ဆင်ရမည့် ဥပဒေစနစ်ပါ အချက်အလက်များ
ဖြစ်ကြောင်း ဦးစိန်လှက ပြောသည်။

ရန်ကုန်တိုင်းဒေသကြီးဥပေဒချုပ်ရုံးသည် ပေါင်းစပ်ညှိနှိုင်းရေး အဖွဲ့ခွဲ၏ ရုံးလုပ်ငန်းနှင့် အုပ်ချုပ်မှုဆိုင်ရာ
ကိစ္စရပ်များကို တာဝန်ယူဆောင်ရွက်ပေးမည် ဖြစ်သည်။

အဆိုပါ ကော်မတီကို တိုင်းဒေသကြီးနှင့် ပြည်နယ်များအလိုက် ဖွဲ့စည်းဆောင်ရွက်ပေးထားပြီး
ရန်ကုန်တိုင်းဒေသကြီး တရားဥပဒေစိုးမိုးရေးနှင့် တရားမျှတမှုဆိုင်ရာလုပ်ငန်းများ ပေါင်းစပ်ညှိနှိုင်းရေး
အဖွဲ့ခွဲ၏ ဆောင်ရွက်ချက်များကို မြန်မာနိုင်ငံ တရားဥပဒေစိုးမိုးရေးနှင့် တရားမျှတမှုဆိုင်ရာလုပ်ငန်းများ
ပေါင်းစပ်ညှိနှိုင်းရေးအဖွဲ့၏ အဖွဲ့ဝင်ဖြစ်သူ ဒေါက်တာ ခင်ချစ်ချစ်(ရန်ကုန်တက္ကသိုလ် ဥပဒေပညာဌာန)
က တာဝန်ခံ ကြီးကြပ်မည်ကာ ဆောင်ရွက်ချက်များအပေါ် ဗဟိုအဖွဲ့သို့ တင်ပြရမည် ဖြစ်သည်။

အဆိုပါကော်မတီသည် တရားဥပဒေစိုးမိုးရေးအတွက် တရားမျှတမှုဆိုင်ရာလုပ်ငန်းများ
ပေါင်းစပ်ညှိနှိုင်းရေးအဖွဲ့ဖြစ်သည့် အတွက် ကော်မတီ၏ လွတ်လပ်သည့် ဖွဲ့စည်းပုံနှင့် ဦးဆောင်
ပါဝင်သူများအတွက် အားရကျေနပ်ပြီး ရည်ရွယ်ချက်နှင့် လုပ်ငန်း တာဝန်များကို အောင်မြင်စွာ
ဆောင်ရွက်နိုင်မည်ဖြစ်ကြောင်း တရားလွှတ်တော်ရှေ့နေ ဦးအောင်စိုးက ပြောသည်။

ဤအကြောင်းအရာနှင့် ပက်သက်၍ ထင်မြင်ချက်ပေးလိုပါက ...
[email protected] သို့ ပေးပို့နိုင်ပါသည်။


ရာသီဥတုအခြေအနေ - ရန်ကုန်

အကြည့်အများဆုံး - ရန်ကုန်သတင်း