ဘီပီအိုင်၏ တတိယမြောက် ဆေးဝါးထုတ်လုပ်မှုစက်ရုံ ဇူလိုင်လတွင် စတင်လည်ပတ်မည်

အင်းစိန်ဘီပီအိုင်ဆေးဝါးစက်ရုံအတွင်း ဆေးဝါးများ ထုတ်လုပ်နေသည်ကို ယခုလ ၂၇ ရက်က တွေ့ရစဉ်။ ရှင်မိုးမြင့်/မြန်မာတိုင်း(မ်)အင်းစိန်ဘီပီအိုင်ဆေးဝါးစက်ရုံအတွင်း ဆေးဝါးများ ထုတ်လုပ်နေသည်ကို ယခုလ ၂၇ ရက်က တွေ့ရစဉ်။ ရှင်မိုးမြင့်/မြန်မာတိုင်း(မ်)

စက်မှုဝန်ကြီးဌာန လက်အောက်ရှိ မြန်မာ့ဆေးဝါးလုပ်ငန်း၊ ဆေးဝါးစက်ရုံ (အင်းစိန်) က
ဆောင်ရွက်လျက်ရှိသည့် ခေတ်မီဆေးဝါးတိုးမြှင့် ထုတ်လုပ်မှု စီမံကိန်းအရ တတိယမြောက်
ဆေးပြား/ဆေးတောင့်ထုတ်လုပ်မှု အဆောက်အအုံကို လာမည့် ဇူလိုင်လအတွင်း
ဖွင့်လှစ်သွားမည်ဖြစ်ကြောင်း ဆေးဝါးစက်ရုံ (အင်းစိန်) မှ ဒုတိယစက်ရုံမှူး ဒေါက်တာအောင်ဇော်က
ယခုလ ၂၇ ရက်တွင် ပြောသည်။

အဆိုပါ အဆောက်အအုံကို အိန္ဒိယနိုင်ငံက ဒီဇိုင်းရေးဆွဲဆောင်ရွက်ခဲ့ပြီး ဂျာမနီနှင့် အီတလီနိုင်ငံများမှ
ထုတ်လုပ်သော စက်ပစ္စည်းများ တပ်ဆင်ထားကာ ထုတ်လုပ်ရေး အခန်းများ၏ အပူချိန်စိုထိုင်းဆနှင့်
လေဖိအားကို အဆောက်အအုံလုံးဆိုင်ရာ ထိန်းချုပ်ရေးစနစ် (Building Management System) ဖြင့်
ဆောင်ရွက်မည်ဟု ၎င်းက ပြောသည်။

"အင်းစိန်ဆေးဝါးစက်ရုံက ဘီပီအိုင်အမှတ်တံဆိပ်နဲ့ ဆေးဝါးတွေကို ၂၀၁၂ ကတည်းက
ထုတ်လုပ်ပေးနေတာဖြစ်တယ်။ ၂၀၁၅-၁၆ ခုနှစ်က စပြီးတော့ ခေတ်မီဆေးဝါး တိုးမြှင့်ထုတ်လုပ်မှု
စီမံကိန်း စတင်ခဲ့တယ်။ တတိယအဆင့်အနေနဲ့ ဆေးပြား/ဆေးတောင့် ထုတ်လုပ်မှု
အဆောက်အအုံကို လာမည့် ဇူလိုင်လအတွင်းမှာ ဖွင့်လှစ်သွားဖို့ ရှိတယ်" ဟု
ဒေါက်တာအောင်ဇော်က ပြောသည်။

အင်းစိန်ဘီပီအိုင်စက်ရုံသည် ပြီးခဲ့သည့် နှစ်တွင် ဆေးပြားနှင့် ဆေးတောင့်အရေအတွက်
သန်း ၈၀၀ ခန့် ထုတ်လုပ်ခဲ့ပြီး၊ တတိယမြောက် ထုတ်လုပ်ရေး အဆောက်အအုံ လည်ပတ်ပါက
ဆေးပြားနှင့် ဆေးတောင့် အရေအတွက် သန်း ၁,၃၀၀ မှ ၁,၄၀၀ အထိ တိုးမြှင့်ထုတ်လုပ်နိုင်မည်
ဟုလည်း ၎င်းက ပြောသည်။

ခေတ်မီဆေးဝါးထုတ်လုပ်မှုစီမံကိန်း (New BPI Project) ကို ၂၀၁၃-၁၄ ဘဏ္ဍာနှစ်တွင်
စတင်အကောင်အထည်ဖော်ခဲ့ပြီး၊ ခေတ်မီဆေးဝါးများ တိုးမြှင့်ထုတ်လုပ်ရန် အဆောက်အအုံ
ငါးလုံးလည်ပတ်မည်ဖြစ်ပြီး၊ လက်ရှိတွင် အဆောက်အအုံနှစ်လုံးကို စတင် လည်ပတ်နေပြီဖြစ်သည်။

အင်းစိန်ဆေးဝါးစက်ရုံမှ BPI အမှတ်တံဆိပ်ဖြင့် ထိုးဆေး၊ သောက်ဆေး၊ ပဋိဇီဝ ဆေးဝါးများ၊
မြွေဆိပ်ဖြေဆေး၊ ကာကွယ်ဆေး၊ ဆေးရည်၊ လိမ်းဆေး၊ ဆေးမှုန့်၊ သွေးကြောသွင်းဆေး အပါအ၀င်
ဆေးအမျိုးအစားပေါင်း ၁၈၀ ကျော် ထုတ်လုပ်ပေးလျက်ရှိသည်။

ဒေါက်တာ အောင်ဇော်။ ရှင်မိုးမြင့်/မြန်မာတိုင်း(မ်)ဒေါက်တာ အောင်ဇော်။ ရှင်မိုးမြင့်/မြန်မာတိုင်း(မ်)

ဆေးဝါးအမည် သစ်ခြောက်မျိုးခန့်ကို ၂၀၁၇-၁၈ ဘဏ္ဍာနှစ်အတွင်း ထပ်မံ ထုတ်လုပ်ရန် စီစဉ်နေသည်
ဟုလည်း ဒေါက်တာအောင်ဇော်က ပြောသည်။

"ဘီပီအိုင်အနေနဲ့ တစ်နိုင်ငံလုံး ဆေးဝါး လိုအပ်ချက်ရဲ့ ၁၃ ရာခိုင်နှုန်းအထိ ထုတ်လုပ်ပေးနေတယ်လို့
ပြောလို့ရတယ်။ ဒါပေမဲ့ ကျွန်တော်တို့ရော၊ ဆေးဝါးလုပ်ငန်းရှင်တွေရော ခန့်မှန်းချက်အရဆိုရင်
၈ ရာခိုင်နှုန်းလောက်ပဲ ထုတ်လုပ်ပေးနိုင်တယ်။ ဒီနှစ်မှာ ၃၆ ဘီလျံဖိုး ထုတ်လုပ်ပေးမယ်ဆိုရင်တောင်
လိုအပ်ချက်ရဲ့ ၁၅ ရာခိုင်နှုန်းလောက်အထိပဲ ထုတ်လုပ်ပေးနိုင်မှာဖြစ်တယ်"ဟု ၎င်းက ပြောသည်။

ဆေးဝါးစက်ရုံ(အင်းစိန်)မှ ထုတ်လုပ်သည့် ဆေးဝါးများကို ကျန်းမာရေးနှင့် အားကစား ၀န်ကြီးဌာန၊
ကာကွယ်ရေးဝန်ကြီးဌာနသို့ အဓိကရောင်းချပေးနေပြီး၊ လက်ရှိဘဏ္ဍာနှစ် မှစတင်ကာ ဘီပီအိုင်(BPI)
ဆေးဝါးများကို အရောင်းကိုယ်စားလှယ်ဖြင့် ရောင်းချပေး နေသည့်စနစ်ကို ဖျက်သိမ်း၍ တိုက်ရိုက်
အရောင်းဆိုင်များ ဖွစ်လှစ်ထားသည်ဟု ဒေါက်တာအောင်ဇော်က ပြောသည်။

ပဏာမအဆင့်အနေဖြင့် ဘီပီအိုင်ဆေးဝါး အရောင်းဆိုင်ပေါင်း ၁၇ ဆိုင်ခန့်ဖွင့်လှစ်ထားရှိ ပြီးဖြစ်ကာ
ရန်ကုန်၊ မန္တလေး၊ နေပြည်တော်၊ ဟားခါး၊ ဘားအံ၊ ပြည်၊တောင်ကြီး၊ အောင်လံ၊ မြစ်ကြီးနားနှင့်
မုံရွာတွင် ဖွင့်လှစ်ထားသည်ဟု ဆိုသည်။

"ဒီနှစ်ကစပြီး အရောင်းကိုယ်စားလှယ် မထားတော့ဘူး။ လူတိုင်းရရှိနိုင်အောင်ပါ။ စီးပွားဖြစ်
ပြန်လည်ရောင်းချဖို့အတွက် မရောင်းပေးပါဘူး။ ပုဂ္ဂလိကအထူးကု ဆေးရုံ၊ ဆေးခန်းတွေ
အနေနဲ့ကတော့ စက်ရုံမှာ တိုက်ရိုက် ၀ယ်ယူရရှိနိုင်မှာဖြစ်ပါတယ်" ဟု ဒေါက်တာအောင်ဇော်က
ပြောသည်။

ဤအကြောင်းအရာနှင့် ပက်သက်၍ ထင်မြင်ချက်ပေးလိုပါက ...
[email protected] သို့ ပေးပို့နိုင်ပါသည်။


ရာသီဥတုအခြေအနေ - ရန်ကုန်

အကြည့်အများဆုံး - ရန်ကုန်သတင်း