ရန်ကုန်တိုင်းဒေသကြီးအတွင်း ငှက်ဖျားရောဂါဖြစ်ပွားမှုနှုန်း သိသိသာသာကျဆင်း

ရန်ကုန်တိုင်းဒေသကြီးအတွင်း၌ ငါးနှစ်အတွင်း ငှက်ဖျားရောဂါဖြစ်ပွားသူဦးရေနှင့် သေဆုံးသူဦးရေ
သိသိသာသာ ကျဆင်းလာပြီး လာမည့်သုံးနှစ်အတွင်း ငှက်ဖျားရောဂါကင်းစင်ဒေသအဖြစ်
သတ်မှတ်နိုင်ရန် ဆောင်ရွက်မည်ဖြစ်ကြောင်း တာဝန်ရှိသူများက ပြောသည်။

၂ဝ၁၁ ခုနှစ်တွင် ရန်ကုန်တိုင်းဒေသကြီးအတွင်း ငှက်ဖျားရောဂါဖြစ်ပွားသူ ၂,ဝဝဝ ကျော်နှင့် သေဆုံးသူ
လေးဦးခန့်ရှိရာမှ ၂ဝ၁၆ ခုနှစ်တွင် ရောဂါဖြစ်ပွားသူ ၅၂ ဦးအထိလျော့ကျခဲ့ပြီး သေဆုံးသူ
မရှိခဲ့ကြောင်း ရန်ကုန်တိုင်းဒေသကြီး၊ ပြည်သူ့ကျန်းမာရေးဦးစီးဌာန ဌာနမှူး ဒေါက်တာဝင်းလွင်က
ပြောသည်။

''ငှက်ဖျားရောဂါ ကြိုတင်ကာကွယ်ရေးလုပ်ငန်းမှာဆိုရင် အဓိကက ကျန်းမာရေး အသိပညာပေးတာ၊
ခြင်ကိုက်မခံရအောင် ငှက်ဖျားခြင်ရှိတဲ့ ဒေသတွေမှာ ဆေးစိမ်ခြင်ထောင်နဲ့အိပ်ဖို့ ပညာပေးတာတွေ
လုပ်ခဲ့တယ်''ဟု ၄င်းက ပြောသည်။

ကျန်းမာရေးနှင့်အားကစားဝန်ကြီးဌာနသည် ရန်ကုန်တိုင်းဒေသကြီးအပါအဝင် တိုင်းနှင့် ပြည်နယ်
ငါးခုကို ၂ဝ၂ဝ ပြည့်နှစ်တွင် ငှက်ဖျားကင်းစင်ဒေသများအဖြစ် သတ်မှတ်နိုင်ရန် ဆောင်ရွက်နေပြီး
အာဆီယံနိုင်ငံများနည်းတူ ငှက်ဖျားကင်းစင်ရေး ရည်မှန်းချက်၂ဝ၃ဝ ကို ပြည့်မီနိုင်ရန် ရည်မှန်း
ထားသည်။

''၂ဝ၃ဝ မှာ ငှက်ဖျားရောဂါကို ပြည်သူ့ကျန်းမာရေးပြဿနာအဖြစ်ကနေ ဖယ်ထုတ်ဖို့ မျော်မှန်း
ထားတယ်။ ဒေသတွင်းကူးစက်မှုတွေကို ရပ်တန့်ဖို့ ရည်ရွယ်ချက်နဲ့ ၂ဝ၂ဝ မှာ တိုင်းနဲ့ပြည်နယ်
ငါးခုမှာ အရင်ဆောင်ရွက်မယ်'' ဟု ဒေါက်တာဝင်းလွင်က ပြောသည်။

ရန်ကုန်တိုင်းဒေသကြီးအတွင်း ငှက်ဖျားရောဂါကာကွယ်ထိန်းချုပ်ရေးလုပ်ငန်းများကို ရောဂါ
တွေ့ရလေ့ရှိသည့် ရန်ကုန်/တောင်ပိုင်းခရိုင် ရှစ်မြို့နယ်နှင့် မြောက်ပိုင်းခရိုင်က မှော်ဘီ၊ တိုက်ကြီး၊
လှည်းကူးမြို့နယ်အပါအဝင် စုစုပေါင်းမြို့နယ် ၁၁ ခုတွင် အဓိကထားဆောင်ရွက်နေကြောင်း
ရန်ကုန်တိုင်းပြည်သူ့ကျန်းမာရေးဦးစီးဌာနမှ လက်ထောက် ညွှန်ကြားရေးမှူး ဒေါက်တာ
အေးမွန်မွန်ကျော်က ပြောသည်။

၂ဝ၂ဝ ပြည့်နှစ်တွင် ရန်ကုန်၊ ပဲခူး၊ ဧရာဝတီ၊ မကွေးနှင့် မန္တလေးတိုင်းဒေသကြီးများကို ငှက်ဖျားရောဂါ
ကင်းစင်ဒေသအဖြစ် သတ်မှတ်နိုင်ရန် ဆောင်ရွက်မည်ဖြစ်ပြီး ရောဂါ ကူးစက်ဖြစ်ပွားမှုကို
လူ ၁,ဝဝဝ တွင် တစ်ဦးအောက်လျော့ချနိုင်ရန် ရည်မှန်းထားသည်။

ဤအကြောင်းအရာနှင့် ပက်သက်၍ ထင်မြင်ချက်ပေးလိုပါက ...
[email protected] သို့ ပေးပို့နိုင်ပါသည်။


ရာသီဥတုအခြေအနေ - ရန်ကုန်

အကြည့်အများဆုံး - ရန်ကုန်သတင်း