လက်တစ်ဆုပ်စာ မြန်မာမြေကြီးနဲ့ ရောစပ်ထုလုပ်ထားတဲ့ အမေရိကန် ပန်းပုဆရာရဲ့ ရုပ်တုများ

အမေရိကန် ပန်းပုဆရာကို ဦးဝင်းတင် ပုံတူပန်းချီကားနှင့်အတူ တွေ့ရစဉ်။ ကောင်းထက်/မြန်မာတိုင်း(မ်)အမေရိကန် ပန်းပုဆရာကို ဦးဝင်းတင် ပုံတူပန်းချီကားနှင့်အတူ တွေ့ရစဉ်။ ကောင်းထက်/မြန်မာတိုင်း(မ်)

သတင်းစာဆရာကြီး ဟံသာဝတီ ဦးဝင်းတင်ရဲ့ ပုံတူရုပ်တုဟာ အရေးအကြောင်း အတွန့်အခေါက်
တွေနဲ့ အသက် ၈၀ ကျော်အဘိုးကြီးရဲ့ မျက်နှာသွင်ပြင်မျိုးထက် ခေါင်းမာပြီးရဲရင့်တဲ့ အတွင်းစရိုက်
သဏ္ဌာန်နဲ့ ပိုပြီး သက်ဝင်ထင်ရှားနေပါတယ်။

ဒီရုပ်တုကို အမေရိကန်လူမျိုး ပန်းပုဆရာ ဂျင်မက်နေး (Jim Mc Nails) က အီတလီမြေစေးနီနှင့်
မြန်မာ့မြေကြီးကို ရောစပ်ထုလုပ်ထားတာ ဖြစ်ပါတယ်။

ရွှံ့စေးပန်းပုကို အမေရိကန်နိုင်ငံ၊ ဖလော်ရီဒါက သူ့စတူဒီယိုမှာ ဂုဏ်ပြုထုဆစ်ခဲ့ပြီး မြန်မာပြည်ကို
ယူဆောင်လာကာ ဒီဇင်ဘာ ၁၁ ရက်နေ့မှာ ပန်မြန်မာအဖွဲ့ကို လွှဲပြောင်းပေးအပ်ခဲ့ပါတယ်။

"ကျွန်တော် မြန်မာပြည်ကို ကိုယ်တိုင်လာပြီး ကျွန်တော် ဂုဏ်ပြုထုလုပ်ထားတဲ့ ဦးဝင်းတင်ရဲ့
ပန်းပုကို လွှဲပြောင်းပေးခွင့်ရတဲ့အတွက် အလွန် ၀မ်းသာပါတယ်။ ဒီပန်းပုဟာ ကျွန်တော့်ရဲ့ 
Democracy Heroes of Burma ပန်းပုစီးရီးထဲက ပန်းပုရုပ်တစ်ရုပ် ဖြစ်ပါတယ်" လို့ ပန်းပုဆရာ
ဂျင်မက်နေး က ပြောပြပါတယ်။

ပန်းပုဆရာရဲ့ ငယ်ဘ၀အိပ်မက်တွေမှာ လွှမ်းမိုးခဲ့တဲ့ လူစွမ်းကောင်း cowboy တွေအပြင်
လက်တွေ့ဘ၀က သူရဲကောင်းတွေအကြောင်းကို ပွင့်ပွင့်လင်းလင်း ပြောပါတယ်။

"ကျွန်တော်ငယ်ငယ်တုန်းက သူရဲကောင်းတွေအကြောင်း ရိုက်ကူးထားတဲ့ ရုပ်ရှင်တွေနဲ့
သူရဲကောင်းတွေအကြောင်း ရေးထားတဲ့ စာအုပ်တော်တော်များများ ဖတ်ရပါတယ်။ အမေရိကန်မှာ
cowboy ဇာတ်လမ်းတွေ တော်တော်ခေတ်စားပါတယ်။ မကောင်းတဲ့ လူဆိုးတွေက လူကောင်း
တစ်ယောက်ကို ဒုက္ခပေးတော့မယ်ဆို Cowboy က ရုတ်တရက်ပေါ်လာပြီး ကောင်းတဲ့သူတွေကို
ကယ်တင်လေ့ရှိတဲ့ သူရဲကောင်းပါ။"

ဟံသာဝတီ ဦးဝင်းတင်ရုပ်ထု ထုလုပ်ရခြင်း အကြောင်းရင်းကိုလည်း သူ လေးစားအားကျခဲ့တဲ့
စိတ်ရင်းအခံအကြောင်းနဲ့ ယှက်ပြီးပြောပါတယ်။

"ကျွန်တော် ကြီးလာတဲ့အခါ တဖြည်းဖြည်း သိလာတာ တကယ့် သူရဲကောင်းဆိုတာ
သာမန်လူတွေပါပဲ။ ဥပမာ ဦးဝင်းတင်ဆို ထောင်ထဲမှာ နှစ် ၂၀ နေခဲ့ရတယ်။ အနှိပ်စက်ခံခဲ့ရတယ်။
တိုက်ပိတ်ခံရတယ်။ သူရသတ္တိနဲ့ ပြည့်စုံတဲ့ ဒီပုဂ္ဂိုလ်ဟာ ဘယ်လိုခြိမ်းခြောက်မှုမျိုးမဆို ကြံ့ကြံ့ခံပြီး
ရသင့်ရထိုက်တဲ့ လူ့အခွင့်အရေးအတွက် ခေါင်းမာမာနဲ့ တောင်းဆိုသွားခဲ့တယ်။ သူ့ကို
သူရဲကောင်းလို့ပဲ ကျွန်တော် သတ်မှတ်ချင်တယ်။ သူ့လိုလူမျိုးတွေ မြန်မာပြည်မှာ အများကြီးပဲ။
ကျွန်တော့်ကို လှုံ့ဆော်ပေးနိုင်ခဲ့တဲ့ အဲဒီလိုပုဂ္ဂိုလ်မျိုးကို ကျွန်တော် ပန်းပုထုချင်ခဲ့တယ်" လို့
ဦးဝင်းတင်ရဲ့ ပန်းပုထုလုပ်ရခြင်း ရည်ရွယ်ချက်ကို ရှင်းပြခဲ့ပါတယ်။

သတင်းစာဆရာကြီး ဦးဝင်းတင်ဟာ အစိုးရစစ်ဘက်ရဲ့ အဖိနှိပ်ခံ ဒီမိုကရေစီအရေး လှုပ်ရှားသူ
တစ်ဦးဖြစ်ပြီး နှစ်ပေါင်းနှစ်ဆယ်နီးပါးခန့် နိုင်ငံရေးအကျဉ်းသားတစ်ဦး ဖြစ်ခဲ့ပါတယ်။

ယခုနှစ် ဧပြီလ၂၁ ရက်နေ့က ကျောက်ကပ်ရောဂါဖြင့် ကွယ်လွန်ခဲ့ပြီး နာမကျန်းဖြစ်နေသည့်တိုင်
အစိုးရရဲ့ နိုင်ငံရေးဆောင်ရွက်ချက်များအပေါ် အမြဲတစေ ထောက်ပြ ဝေဖန်နေခဲ့သူ ဖြစ်ပါတယ်။

ဂျင်မက်နေးကတော့ သာမန် အမေရိကန်နိုင်ငံသား တစ်ဦးပါပဲ။ ပန်းပုပညာကို ကျောင်းတွေမှာ
တတ်မြောက်သင်ကြားခဲ့သူ မဟုတ်ပါဘူး။

တစ်ရက်မှာ 'ဝေါလ်ဒစ္စနေးလ်က သင့်ကို အလိုရှိသည်'ဆိုတဲ့ ကြော်ငြာကို စတင်တွေ့ခဲ့ရာကနေ
အလုပ်လျှောက်ခဲ့ပြီး ဝေါလ်ဒစ္စနေးလ်ရဲ့ အနုပညာဒါရိုက်တာတစ်ဦး ဖြစ်လာခဲ့သူပါ။

အလုပ်က ထွက်ခဲ့ပြီးနောက် ကမ္ဘာပတ်ဖို့ ကြံရွယ်ရင်း ထိုင်း - မြန်မာနယ်စပ်ကို
ရောက်လာခဲ့ပါတယ်။

မြန်မာပြည်ကနေ ရောက်လာတဲ့ ဒုက္ခသည်တွေအကြောင်း သိလာရင်း မြန်မာပြည်ကို
စိတ်ဝင်စားလာခဲ့ကာ ပြည်တွင်းက ဒီမိုကရေစီအရေးလှုပ်ရှားသူ သူရဲကောင်းတွေရဲ့ ရုပ်တုတွေကို
ထုလုပ်ဖုိ့ စိတ်ကူးရလာခဲ့တာပါ။

မြန်မာပြည်အကြောင်းကို နှစ်ပေါင်း ၂၀ ကျော်ကြာ စိတ်ဝင်စား လေ့လာနေခဲ့တဲ့ ပန်းပုဆရာ
ဂျင်မက်နေးဟာ ဒေါ်အောင်ဆန်းစုကြည်၊ မင်းကိုနိုင်၊ ဇာဂနာ၊ ပါပါကြီးနှင့် ပါပါလေး နှုတ်ခမ်းမွေး
ညီနောင်နှင့် ဒေါက်တာစင်သီယာမောင် တို့ရဲ့ ပန်းပုတွေကို သူတတ်ကျွမ်းတဲ့ ပန်းပုပညာကို
အသုံးပြုပြီး ဂုဏ်ပြု ထုလုပ်ပြီးခဲ့ပါပြီ။

မြန်မာ့သူရဲကောင်းတွေရဲ့ ပန်းပုတွေအားလုံးကို သူ့ရဲ့ စတူဒီယိုရှိတဲ့ ဖလော်ရီဒါမှာ ထုလုပ်ခဲ့ပေမယ့်
ပန်းပုတွေအားလုံးမှာ မြန်မာအငွေ့အသက်တွေ ပါဝင်အောင် မြန်မာနိုင်ငံထဲက သူရောက်ဖူးသမျှ
နေရာတွေက စုဆောင်းလာတဲ့ မြေကြီးတွေကို သူသုံးနေကျ အီတလီ မြေစေးနီနဲ့
ရောစပ်ထုလုပ်ခဲ့တာပါ။

ပန်းပုဆရာ ဂျင်မက်နေးကို ၎င်းကိုယ်တိုင် ထုလုပ်ထားတဲ့ ဟံသာဝတီ ဦးဝင်းတင် ရုပ်တုနှင့်အတူ တွေ့ရစဉ်။ ကောင်းထက်/မြန်မာတိုင်း(မ်)ပန်းပုဆရာ ဂျင်မက်နေးကို ၎င်းကိုယ်တိုင် ထုလုပ်ထားတဲ့ ဟံသာဝတီ ဦးဝင်းတင် ရုပ်တုနှင့်အတူ တွေ့ရစဉ်။ ကောင်းထက်/မြန်မာတိုင်း(မ်)

"ကျွန်တော် ပထမဆုံး မြန်မာပြည်ရောက်လာတုန်းက ပုဂံကို သွားလည်တယ်။ ဘုရားဖူးပြီး
ကျွန်တော်တည်းတဲ့ ဟိုတယ်ကိုရောက်တော့ မထင်မှတ်ဘဲ ကျွန်တော့် ဘောင်းဘီအစွန်းလေး
တွေမှာ ရွှံ့တွေ လာကပ်နေတာကို တွေ့တယ်။ ကပ်ပါလာတဲ့ ရွှံ့တွေကို ခွာလိုက်ပြီး မပစ်ခဲ့ဘဲ
ပလတ် စတစ်အိတ်ထဲကို ထည့်သိမ်းထားမိတယ်"လို့ ပန်းပုဆရာ ဂျင်မက်နေးရဲ့ ပြောပြချက်ကို
ပန်မြန်မာအဖွဲ့ရဲ့ ဥက္ကဋ္ဌ စာရေးဆရာမ မသီတာ(စမ်းချောင်း) က တိုက်ရိုက်ဘာသာပြန်
ပေးခဲ့ပါတယ်။

၁၉၉၀ ၀န်းကျင်အချိန်ခန့်က မြန်မာပြည်သူတွေ တော်တော်များများ ပြောနေကြတာက သူတို့ရဲ့
ဟီးရိုးက ဒေါ်အောင်ဆန်းစုကြည် ဆိုတာပါ။ သူ ဒီနာမည်ကို ထပ်တလဲလဲ ကြားခဲ့ရတယ်။

ဒါနဲ့ သူဖလော်ရီဒါကို ရောက်ရင် ဒီအမျိုးသမီးရဲ့ ပန်းပုကို စထုမယ်လို့ သူစိတ်ကူးခဲ့ပါတယ်။

ဒါကြောင့် ဒေါ်အောင်ဆန်းစုကြည် ရေးခဲ့တဲ့ စာအုပ်တွေ (Voice of Hope)ကို သူဖတ်ခဲ့တယ်
လို့လည်း ပြောပါတယ်။

ဒေါ်အောင်ဆန်းစုကြည် ပန်းပုကို ထုလုပ်တဲ့အချိန်မှာ သူဟာ ကမ္ဘာသိ ပုဂ္ဂိုလ်တစ်ဦး
မဟုတ်သေးပါဘူး။

ဒေါ်အောင်ဆန်းစုကြည်ရဲ့ ပန်းပုကို သူယူလာတဲ့ မြေကြီးလက်တစ်ဆုပ်နဲ့ သုံးနေကျ မြေစေးနီကို
ရောပြီး ထုလုပ်ခဲ့တယ်။

ပြီးစီးသွားတဲ့ ပန်းပုရုပ်ကို ၀ါရှင်တန်ဒီစီက ရုံးကို လွှဲပေးခဲ့ပါတယ်။

"အဲဒီကို အမိမြန်မာပြည်နဲ့ ဝေးနေတဲ့ မြန်မာလူမျိုးတော်တော်များများ ရောက်နေကြတယ်။
ဖွင့်ပွဲနေ့မှာ ကျွန်တော့် ပန်းပုကို အုပ်ထားတဲ့ အ၀တ်စကို ဖယ်လိုက်ပြီးတဲ့နောက် သူတို့ကို
ကိုင်ခွင့်ပေးခဲ့တယ်။ သူတို့ မျက်နှာတွေကို ကြည့်ရတာ မြန်မာ့မြေကို ပြန်ထိတွေ့ခွင့်ရသလို
ခံစားမှုမျိုး ရသွားသလို ကျွန်တော် မြင်လိုက်ရတယ်။ အဲဒီလိုနဲ့ ကျွန်တော် နောက်ထုမယ့်
မြန်မာပြည်က ကျွန်တော်လေးစားတဲ့ လူတွေရဲ့ ပန်းပုတွေမှာ မြန်မာ့မြေ လက်တစ်ဆုပ်စာ
ရောစပ်ဖို့ စိတ်ကူးရခဲ့တယ်။ ကျွန်တော် မြန်မာပြည်ရောက်တိုင်း မြေကြီးတွေကို မှတ်မှတ်ရရ
နည်းနည်းစီ လိုက်စုတယ်" လို့ ဂျင်က ပြောပါတယ်။

သူဟာ ပန်းပုထုတယ်ဆိုတာ သုံးဘက်မြင်အရုပ်ကို ဖန်တီးတာမဟုတ်ဘဲ အဲဒီလူရဲ့ စရိုက်ကို
ပေါ်လွင်ထင်ရှားရမယ်၊ အဲဒီလူအပေါ် ပန်းပုဆရာ မြင်တဲ့အမြင်ကို ပေါ်အောင် ထုတယ်လို့
ခံယူထားတာပါ။

စရိုက်လက္ခဏာကို ပေါ်အောင်ထုရတဲ့အတွက် အဲဒီလူကို သူသိသွားပြီးမှ ထုလုပ်ချင်တဲ့
ဆန္ဒရှိတယ်လို့ ဆိုပါတယ်။

အဲဒီအခါမှာ ပန်းပုဟာ ၄၅ မိနစ်နဲ့လည်း ပြီးသွားနိုင်သလို ဒီထက်မြန်မြန်လည်း ပြီးသွားနိုင်ပါတယ်
လို့ သူက ပြောပါတယ်။

"ဒေါ်အောင်ဆန်းစုကြည် ပန်းပု ထုလုပ်စဉ်မှာ သူ့ကို မမြင်ဖူးတဲ့အတွက်ကြောင့် သူ့ပင်ကို စိတ်ကို
နားလည်အောင် သူရေးတဲ့ စာတွေ ဖတ်ရပါတယ်။ ဒါကြောင့် ပန်းပုထုချိန်ဟာ သုံးလထိအောင်
ကြာမြင့်ခဲ့တယ်။ ဦးဝင်းတင် ပန်းပုကို ထုချိန်မှာတော့ ကျွန်တော် သူ့အကြောင်း တော်တော်
သိနေပြီ။ သူနဲ့ ပတ်သက်ပြီးလည်း တော်တော် ခံစားမိနေပြီ။ ဒါကြောင့် တစ်ပတ်ပဲကြာမြင့်ခဲ့တယ်"
လို့ သူက ပြောပါတယ်။

ဖလော်ရီဒါက သူ့စတူဒီယိုမှာ ဘဘဦးဝင်းတင်လို အင်မတန် စွမ်းအားကြီးပြီး မြင့်မြတ်တဲ့သူတွေရဲ့
ရုပ်တုတွေ ထုလုပ်နေရင်း သူမနိုင်လို့ ပင်ပန်းလာတဲ့အခါ စိတ်လက်ပေါ့ပါးသွားအောင်
အချိုပွဲစားသလို ရုရှားသမ္မတ ပူတင်နဲ့ မြောက်ကိုရီးယားခေါင်းဆောင် ကင်ဂျုံအီးတို့ရဲ့
ရုပ်ပြောင်ပန်းပုတွေလည်း ထုလေ့ ရှိပါတယ်။

"ဒီရုပ်တု ထုလုပ်ပြီး ဦးဝင်းတင်ကို ဂုဏ်ပြုလိုက်နိုင်တယ်လို့ ဆိုပေမယ့် တကယ်တမ်း
အကျိုးကျေးဇူးရတာဟာ ကျွန်တော် ကိုယ်တိုင်ပါပဲ။ ပန်းပုကို မထုခင်က ကျွန်တော်ဟာ
ပန်းပုထုပြီး ကိုယ့်ကိုယ်ကိုယ် နောက်တစ်ယောက် ဖြစ်သွားသလို ခံစားရတယ်။
ဆရာဦးဝင်းတင် အကြောင်း လေ့လာပြီး သူ့ပန်းပုထုလိုက်တာဟာ ကျွန်တော့်ဘ၀ကို
မြှင့်တင်ပေးလိုက်တာနဲ့ တူပါတယ်"လို့ သူက ပြောပါတယ်။

"မြန်မာပြည်ကို ကျွန်တော် တစ်နှစ်တစ်ခေါက် လာတယ်။ ဒီက လူတွေရဲ့ အခက်အခဲတွေကို
ကျွန်တော် ကိုယ်တိုင်မြင်တွေ့ရတယ်။ ဒီအပေါ်မှာ လူတွေက ဘယ်လိုတုံ့ပြန်သွားသလဲ
ဆိုတာလည်း ကျွန်တော်သိရတယ်။ အခက်အခဲတွေကြားထဲက နှစ်ပေါင်းများစွာ ကြံ့ကြံ့ခံ
ဖြတ်သန်းသွားခဲ့တဲ့ လူမျိုးတွေကို ကျွန်တော် အထင်ကြီးလေးစားတယ်" လို့ သူက ပြောပါတယ်။

သတင်းစာဆရာ စာရေးဆရာကြီး ဦးဝင်းတင်ရဲ့ ပန်းပုကို ပန်မြန်မာအဖွဲ့မှာ ထားမှာဖြစ်ပြီး
ဦးဝင်းတင်ပြတိုက် ဖွင့်လှစ်ဖြစ်ခဲ့ရင် ပြတိုက်ကို လွှဲပြောင်းပေး မှာဖြစ်ပါတယ်။

"ဆရာဦးဝင်းတင်ရဲ့ ပန်းပုကို ကျွန်မတို့ ပန်မြန်မာ ရုံးခန်းမှာ အမြဲတမ်း မြင်တွေ့နေရတော့မယ့်
အတွက် ဆရာကြီးရဲ့ အကြောင်းကိုလည်း အမြဲပြောဖြစ်နေဦးမှာပါ"လို့ ဆရာမ မသီတာ
(စမ်းချောင်း) ကပြောပါတယ်။

ဤအကြောင်းအရာနှင့် ပက်သက်၍ ထင်မြင်ချက်ပေးလိုပါက ...
[email protected] သို့ ပေးပို့နိုင်ပါသည်။


အကြည့်အများဆုံး - လူမှုဘ၀ရသစုံလင်