မိုင်းအိုက်ကော် ရေးသားပြုစုတဲ့ တအန်း(ပလောင်) လူမျိုးသမိုင်း (အစဲန်ခြိူဝ်းတအာင်း)

သင်္ကြန်ရက်များအပြီးမှာ စိတ်ဝင်စားစရာ ကောင်းတဲ့ စာအုပ်တစ်အုပ် ထွက်ရှိလာတာ တွေ့ရပါတယ်။

ဒီစာအုပ်ကတော့ သမိုင်းဆိုင်ရာ စာအုပ်တစ်အုပ်လို့ ဆိုနိုင်သလို တိုင်းရင်းသားလူမျိုးဆိုင်ရာ
စာအုပ်လို့လည်းဆိုနိုင်တဲ့ 'တအန်း(ပလောင်)လူမျိုး သမိုင်း (အစဲန်ခြိူဝ်းတအာင်း)'လို့
အမည်ပေးထားတဲ့ စာအုပ်ဖြစ်ပါတယ်။

ဒီစာအုပ်ကို ရေးသားပြုစုသူကလည်း တအန်းအမျိုးသား တိုင်းရင်းသား မိုင်းအိုက်ကော်ဆိုသူပါ။

မိုင်းအိုက်ကော်က အမှာစာမှာ 'စာရေးသူသည် သမိုင်းပညာရှင် မဟုတ်သည့်အတွက်
ပြည့်စုံလုံလောက်သော သမိုင်းစာအုပ်ဟု ဆိုနိုင်မည်ကား မဟုတ်ချေ'ဟု ဆိုထားပေမဲ့
သူ့ရဲ့စာအုပ်ဟာ မဂ္ဂဇင်းဆိုက်ကြီးနဲ့ပဲ စာမျက်နှာ ၃၉၀ ကျော်ရှိတာကြောင့် ဘယ်လောက်
အားထုတ်ကြိုးပမ်းထားသလဲဆိုတာကို ခန့်မှန်းကြည့်လို့ ရပါတယ်။

မိုင်းအိုက်ကော်ဟာ ဒီစာအုပ်ကို အခန်း လေးခန်းခွဲပြီး တင်ပြထားပါတယ်။ ပထမဆုံးအခန်းကတော့
'တအန်းလူမျိုးများ၏ သမိုင်းခြေရာများ'ဆိုတဲ့ အခန်းပါ။ ဒီအခန်းအောက်မှာ အခန်းငယ်ပေါင်း ၂၁ ခန်းနဲ့
ဓာတ်ပုံကဏ္ဍပါဝင်ပြီး တအန်းလူမျိုးများ ဆင်းသက်လာရာ သမိုင်းကြောင်းကို ခြေရာကောက်ပြ
ထားသလို ကချင်တိုင်းရင်းသားများနဲ့ ဆက်ဆံရေး အခြေအနေတွေကို သုံးသပ်တင်ပြထားပါတယ်။

ဒုတိယအခန်းကတော့ 'တအန်းအမျိုး သားလွတ်မြောက်ရေး လှုပ်ရှားမှုသမိုင်း' ဆိုတာပါ။ ဒီစာအုပ်မှာ
ဒီဒုတိယအခန်းက ဆွဲဆောင်မှုအရှိဆုံး အခန်းလို့ ဆိုနိုင်ပါတယ်။ တအန်း အမျိုးသားလွတ်မြောက်ရေး
အတွက် လက်နက်စွဲကိုင် တော်လှန်ရခြင်း အကြောင်းရင်းကစပြီး ၁၉၉၁ ခု စစ်အစိုးရ နဲ့ ငြိမ်းချမ်းရေး
ရယူတဲ့အကြောင်းနဲ့ TNLA အဖွဲ့ ပေါ်ပေါက်လာရခြင်း အကြောင်းရင်း နောက်ခံများကို
ကျယ်ကျယ်ပြန့်ပြန့် ဖတ်ရှုရမှာဖြစ်ပါတယ်။ ဒီအခန်းမှာ အခန်းငယ်ပေါင်း ၃၈ ခန်းပါဝင်ပါတယ်။

တတိယအခန်းကတော့ တအန်းစာပေ သမိုင်းအခန်းဖြစ်ပြီး စတုတ္ထအခန်းမှာတော့ တအန်းလူမျိုးတို့ရဲ့
ဝိသေသလက္ခဏာများ၊ နာမည်ပေးရိုးရာ၊ တအန်းရိုးရာ ၁၂ လရာသီ ပွဲတော်များကို
ဖော်ပြထားပါတယ်။

ဒီစာအုပ်ရဲ့ ထူးခြားမှုနောက်တစ်ခုကတော့ ခန့်ချုပ်နဲ့ ရိုးရိုးချုပ်ဆိုပြီး အမျိုးအစား နှစ်မျိုး
ခွဲခြားထုတ်ဝေထားခြင်း ဖြစ်ပါတယ်။ ရိုးရိုးချုပ်က ကျပ် ၇,၀၀၀ ဖြစ်ပြီး ခန့်ချုပ်က ကျပ် ၉,၀၀၀
ဖြစ်ပါတယ်။

ဒီစာအုပ်ကို ရန်ကုန်မြို့၊ ပုဇွန်တောင်မြို့နယ်၊ ရေကျော်လမ်း၊ အမှတ်(၄)မှာရှိတဲ့ ဒီပါစိုးစာပေ
(ဖုန်း- ၀၉-၅၄၀-၃၉၈၆)က ထုတ်ဝေဖြန့်ချိထားပါတယ်။

ဤအကြောင်းအရာနှင့် ပက်သက်၍ ထင်မြင်ချက်ပေးလိုပါက ...
[email protected] သို့ ပေးပို့နိုင်ပါသည်။