အကြောက်တရားကို ဆားလိုသုံးပြီး စီမံခေါင်းဆောင်ပါ

ကမ္ဘာ့တိုက်ကြီးတွေဆီကို ကုန်သယ်ပို့တဲ့ သင်္ဘောလိုင်းက ကပ္ပတိန်အတော်များများဟာ
လက်အောက်ဝန်ထမ်းတွေကို စီမံခန့်ခွဲရာမှာ ပါးနပ်သူတွေဖြစ်တယ်လို့ သင်္ဘောသားတစ်ဦးက
ပြောဘူးပါတယ်။

နိုင်ငံစုံကပါလာတဲ့ သင်္ဘောသားတွေရဲ့ အလုပ်အပေါ် သဘောထားဟာလည်း သင်္ဘောဦးလှည့်ရာနဲ့
အတူပြောင်းလဲနေတတ်တယ်လို့လည်း သူကဆိုပါတယ်။

သင်္ဘောသားတွေလုပ်ရတဲ့ အလုပ်တွေမှာ လုပ်ချင်တာရော၊ မလုပ်ချင်တာပါ ရောနေတတ်တာကြောင့်
အထက်အရာရှိကို အထွန့်တက်တာတွေ၊ သင်္ဘောသားအချင်းချင်း ခိုက်ရန်ဖြစ်တာတွေလည်း
ကြုံရတယ်လို့ဆိုပါတယ်။

ဒါပေမယ့် လိုရာကိုပြီးမြောက်ချင်တဲ့ ကပ္ပတိန်တွေဟာ သင်္ဘောဦးက အာရှတိုက်ဖက်ဦးတည်နေရင်
အာဖရိကသားတွေ မလုပ်ချင်တဲ့အလုပ်ကို အာရှသားတွေကိုခိုင်းသလို သင်္ဘောဦးက
အာဖရိကတိုက်ကိုဦးတည်နေရင် အာရှသားတွေမလုပ်ချင်တဲ့ အလုပ်ကို အာဖရိကသားတွေကို
ခိုင်းပါသတဲ့။

အလုပ်ထဲမှာ ပြဿနာရှိသူတွေကို ကပ္ပတိန်က အလုပ်ထုတ်ချင်ရင် သင်္ဘောလိုင်းကုမ္ပဏီက
အဲဒီ သင်္ဘောသားကို သူ့နိုင်ငံရောက်အောင် လေယာဉ်လက်မှတ် ၀ယ်ပေးရတဲ့ ထုံးစံကြောင့်
ဒီလိုလုပ်တာလို့ ဆိုပါတယ်။

သင်္ဘောက အာရှတိုက်ဆီ ဦးတည်သွားချိန်မှာ အာရှတိုက်သား သင်္ဘောသားတစ်ယောက်ကို
သူ့နိုင်ငံ၊ ဒါမှမဟုတ် သူ့နိုင်ငံနဲ့နီးတဲ့ ဆိပ်ကမ်းမှာ ချပြီး လေယာဉ်လက်မှတ် ၀ယ်ပေးလိုက်ရရင်
ကုမ္ပဏီမှာ စရိတ်သက်သာတာကြောင့် အာရှတိုက်သားတွေကို အာရှဒေသေရောက်မှ
အလုပ်ထုတ်လေ့ ရှိသလို အာဖရိကသား၊ ဥရောပသားတွေကို လည်း သူ့နိုင်ငံနဲ့ နီးတဲ့ ဆိပ်ကမ်းကို
ရောက်မှ အလုပ်ထုတ်လေ့ရှိတာပါ။

ဒီအစဉ်အလာကို သိနေတဲ့ သင်္ဘောသားတွေဟာ အလုပ်ထုတ်ခံရမှာစိုးလို့ သင်္ဘောက
ကိုယ့်နိုင်ငံရှိတဲ့ဖက်ကို ဦးတည်နေချိန်မှာ အထွန့်မတက်ရဲတော့ဘဲ ခိုင်းသမျှလုပ်လေ့ရှိတယ်လို့
ရှင်းပြဖူးပါတယ်။

သင်္ဘောလိုင်းကပေးတဲ့ ဒီဥပမာကို အရင်းစစ်ကြည့်ရင် "အကြောက်တရား" ကို ဟင်းအိုးမှာ ခတ်တဲ့
ဆားလို ပါးပါးနပ်နပ် သုံးပြီး စီမံအုပ်ချုပ်တာဟာ တစ်ချို့နေရာတွေမှာ အထူးထိရောက်မှုရှိပုံကို
ဆင်ခြင်နိုင်ပါတယ်။

ဟင်းအိုးမှာဆားများ သွားရင် ဟင်းပွဲပျက်စီးရသလို စီမံခန့်ခွဲမှု ယန္တယားမှာလည်း အကြောက်တရားကို
သုံးတာများရင် မလိုလားအပ်တဲ့ တင်းမာမှုတွေဖြစ်ပြီး၊ ပုန်ကန်မှုတွေဖြစ်လာနိုင်သလို၊
အကြောက်တရားဆိုတာ မရှိသလောက် ဖြစ်နေရင်လည်း ဆားပေါ့တဲ့ ဟင်းအရသာမဲ့သလို
စီမံခန့်ခွဲမှုယန္တယားစွမ်းအားပြည့် မလည်ပတ်နိုင်တဲ့အပြင် မသမာမှုတွေနဲ့ မင်းမဲ့စရိုက်ဆန်မှုတွေ
ဖြစ်လာနိုင်ပါတယ်။

ဟင်းအိုးအခြေအနေ ကြည့်ပြီး ဆားတန်အောင် ခတ်တတ်ရင်တော့ ထက်မြက်တဲ့ စီမံမှုပြုနိုင်ပြီပေါ့။

ဤအကြောင်းအရာနှင့် ပက်သက်၍ ထင်မြင်ချက်ပေးလိုပါက ...
[email protected] သို့ ပေးပို့နိုင်ပါသည်။