ခရီးစဉ်ဒေသတစ်ခု ဖြစ်မြောက်ရေး မာန်အောင်ကျွန်းသို့ ခရီးသွားလုပ်ငန်း လေ့လာရေးအဖွဲ့ စေလွှတ်မည်

ရခိုင်ပြည်နယ်ရှိ မာန်အောင်ကျွန်းကို ခရီးစဉ်ဒေသတစ်ခုဖြစ်မြောက်ရေးအတွက်
အကောင်အထည်ဖော်ရန် လေ့လာရေးအဖွဲ့ကို မိုးရာသီအကုန်တွင် စေလွှတ်သွားမည်ဖြစ်ကြောင်း
ဟိုတယ်နှင့် ခရီးသွားလာရေး ၀န်ကြီးဌာန ပြည်ထောင်စုဝန်ကြီး ဦးအုန်းမောင်က ပြောကြားသည်။

"မာန်အောင်ကျွန်း ခရီးသွားလုပ်ငန်း ဖွံ့ဖြိုးတိုးတက်ရေးအတွက် ခရီးစဉ်ဒေသတစ်ခုဖြစ်မြောက်ရေး
လေ့လာရေးအဖွဲ့ကို မိုးရသီအပြီးကာလမှာ သွားရောက်လေ့လာစေရန် အစီအစဉ်ထားရှိပြီး
ဖြစ်ပါတယ်" ဟု ယခုလ ၂၀ ရက်က ကျင်းပခဲ့သည့် ပြည်သူ့လွှတ်တော် အစည်းအဝေးတွင်
၎င်းက ပြောကြားသည်။

မာန်အောင်ကျွန်းသည် ရှည်လျားသော ပင်လယ်ကမ်းခြေလေးခုရှိပြီး မြန်မာနိုင်ငံတွင်
ဒုတိယအကြီးဆုံး ကျွန်းဖြစ်ကြောင်း မာန်အောင်မြို့နယ် ပြည်သူ့လွှတ်တော် ကိုယ်စားလှယ်
ဦးတင်နု ခေါ် ဦးတင်နုအောင် က ပြောသည်။

တစ်ဆက်တစ်စပ်တည်း အရှည် ၁၇ မိုင် ကျော်ရှိသော ပင်လယ်ကမ်းခြေရှိနေခြင်းနှင့်
ပတ်သက်၍လည်း "ကမ္ဘာမှာ ၁၇ မိုင်ရှည်လျားတဲ့ ပင်လယ်ကမ်းခြေရဲ့အလှကို ကျွန်တော်တို့
မာန်အောင်ကျွန်းပေါ်မှာပဲ တွေ့ရပါတယ်"ဟု ၎င်းက ပြောသည်။

ရခိုင်ပြည်နယ် စီးပွားရေးဖွံ့ဖြိုးတိုးတက်ရေးနှင့် ပြည်နယ်သူ ပြည်နယ်သားများ အလုပ်အကိုင်
အခွင့်အလမ်းများ ပေါ်ပေါက်လာစေရန် ခရီးသွားဒေသတစ်ခုအဖြစ် ဖော်ထုတ်ပေးသင့်ကြောင်း
ဦးတင်နုအောင် က ပြောသည်။

မာန်အောင်ကျွန်း ခရီးသွားလုပ်ငန်း ဖွံ့ဖြိုးတိုးတက်ရေးအတွက် ပို့ဆောင်ရေးနှင့် ဆက်သွယ်ရေး
ဝန်ကြီးဌာနက လေယာဉ်ကွင်းပြေးလမ်း တိုးချဲ့ရေးဆောင်ရွက်လျက် ရှိသကဲ့သို့ ဆက်သွယ်ရေး
ဖွံ့ဖြိုးစေရန်လည်း ဂျီအက်စ်အမ် မိုဘိုင်းစခန်း တစ်ခုကို မာန်အောင်မြို့နယ်တွင်
တပ်ဆင်လျက်ရှိကြောင်း ဦးအုန်းမောင်က ပြောသည်။

မာန်အောင်ကျွန်း ၂၄ နာရီ ဓာတ်အားရရှိရေးအတွက် မာန်အောင်အများပိုင်ကုမ္ပဏီနှင့်
အက်ဖ်အမ်အိုင်ကုမ္ပဏီတို့ ပူးပေါင်းပြီး နေရောင်ခြည်စွမ်းအင်သုံး ၂ မဂ္ဂါဝပ် လျှပ်စစ်ဓာတ်အားပေး
စက်ရုံ တည်ဆောက်ရေးအတွက် လျှပ်စစ်နှင့် စွမ်းအင်ဝန်ကြီးဌာနက ပြည်နယ်အစိုးရထံ
တင်ပြဆောင်ရွက်လျက်ရှိသည်။

ကျန်းမာရေးနှင့် အားကစားဝန်ကြီးဌာန ကလည်း ပြည်သူ့ဆေးရုံတိုးချဲ့ ဆောက်လုပ်နေသကဲ့သို့
စီမံကိန်းနှင့် ဘဏ္ဍာရေးဝန်ကြီးဌာနကလည်း ဘဏ်ခွဲတစ်ခုဖွင့်လှစ်ထားပြီး ဖြစ်ကြောင်း
ဦးအုန်းမောင်က ပြောကြားခဲ့သည်။

ရခိုင်ပြည်နယ်အစိုးရသည် ဟိုတယ်နှင့် ခရီးသွားလုပ်ငန်း အပါအ၀င် မာန်အောင်ကျွန်းတစ်ခုလုံး
ဖွံ့ဖြိုးရေးအတွက် ပြည်နယ်အစိုးရ၊ မာန်အောင်အများပိုင်ကုမ္ပဏီနှင့် အက်ဖ်အမ်အိုင်ကုမ္ပဏီတို့
ပူးပေါင်းပြီး လုပ်ငန်းများကို ၂၀၁၆ ခုနှစ်မှစ၍ ဆောင်ရွက်လျက်ရှိသည်ဟု ၎င်းက ပြောသည်။

ဤအကြောင်းအရာနှင့် ပက်သက်၍ ထင်မြင်ချက်ပေးလိုပါက ...
[email protected] သို့ ပေးပို့နိုင်ပါသည်။


အကြည့်အများဆုံး - ဟိုတယ်နှင့် ခရီးသွား