သဘာဝပတ်ဝန်းကျင် ညစ်ညမ်းမှုကြောင့် သေဆုံးသူ ၁၂ သန်းကျော်ရှိခဲ့ဟု ကမ္ဘာ့ကျန်းမာရေးအဖွဲ့ဆို

ဂျနီဗာ - ကမ္ဘာပေါ်တွင် သေဆုံးသူလေးဦးလျှင်တစ်ဦးမှာ သဘာဝပတ်ဝန်းကျင်ရှိ လေ၊ ရေနှင့်
မြေညစ်ညမ်းမှုများ၊ လမ်းအန္တရာယ်များနှင့် အလုပ်ခွင် စိတ်ဖိစီးမှုများစသည့် ပတ်ဝန်းကျင်
အခြေအနေများကြောင့်ဖြစ်သည်ဟု ကမ္ဘာ့ကျန်းမာရေးအဖွဲ့ အစီရင်ခံစာက မတ် ၁၅ ရက်က
ဆိုသည်။

ထိုအစီရင်ခံစာအရ ကျန်းမာရေးနှင့်မညီညွတ်သော သဘာဝပတ်ဝန်းကျင်များတွင် နေထိုင်
အလုပ်လုပ်ကိုင်ရခြင်းကြောင့် ၂ဝ၁၂ ခုနှစ်တွင် ခန့်မှန်းခြေလူပေါင်း ၁၂ ဒသမ ၆ သန်း သေဆုံးခဲ့ပြီး
ယင်းမှာ ကမ္ဘာ့သေဆုံးမှု အားလုံး၏ ၂၃ ရာခိုင်နှုန်းဖြစ်သည်။

အထက်ပါအစီရင်ခံစာတွင် ပတ်ဝန်းကျင်ဆိုင်ရာ အကြောင်းတရားများကို ပတ်ဝန်းကျင်ညစ်ညမ်းမှု၊
ဓာတုအဆိပ်သင့်မှု၊ ရာသီဥတုပြောင်းလဲမှု၊ ခရမ်းလွန်ရောင်ခြည် လွန်ကဲမှုများမှသည် လက်နက်
ခဲယမ်းရရှိနိုင်မှုနှင့် ရောဂါဘယနှင့် ဒဏ်ရာအမျိုးမျိုးစသည်ဖြင့် အကြောင်းရင်း ၁ဝဝ ကျော်ရှိသည်။

အဆိုပါသေဆုံးသူ ၁၂ ဒသမ ၆ သန်းတွင် ၈ ဒသမ ၂ သန်းမှာ လေထုညစ်ညမ်းမှုကြောင့်ဖြစ်ပြီး ၄င်းတွင် ဆေးလိပ်ငွေ့တစ်ဆင့်ခံရှူမိခြင်းကြောင့်ဖြစ်ပွားသော နှလုံးရောဂါ၊ ကင်ဆာနှင့် အသက်ရှူ
လမ်းကြောင်းဆိုင်ရာ ရောဂါများပါဝင်သည်ဟု ဖော်ပြထားသည်။

သဘာဝပတ်ဝန်းကျင် အခြေအနေနှင့်ဆက်စပ်သည့် သေဆုံးမှုအများဆုံး ဖြစ်ပွားရာနေရာမှာ
သေဆုံးသူ ၃ ဒသမ ၈ သန်းရှိခဲ့သော အရှေ့တောင်အာရှ ဒေသဖြစ်ပြီး ဒုတိယမှာ ၃ ဒသမ ၅ သန်း
သေဆုံးခဲ့သော အနောက် ပစိဖိတ်ဒေသ ဖြစ်သည်။ အနည်းဆုံးဒေသမှာ သေဆုံးသူ ၈၄၇,ဝဝဝ
ခန့်ရှိခဲ့သော အမေရိကတိုက်ဖြစ်ပြီး အာဖရိကတိုက်နှင့် ဥရောပတိုက်တွင် ၂ ဒသမ ၂ သန်းနှင့်
၁ ဒသမ ၄ သန်း အသီးသီး သေဆုံးခဲ့ကြသည်။

ကလေးငယ်များမှာ အသက်ရှူလမ်းကြောင်း ရောဂါများနှင့် ဝမ်းပျက်ဝမ်းလျှောရောဂါများရပြီး
ပတ်ဝန်းကျင်အခြေအနေကြောင့် သေဆုံးမှုများတွင် ၁ ဒသမ ၇ သန်းမှာ ငါးနှစ် အောက်ကလေး
ငယ်များဖြစ်နေပြီး ပတ်ဝန်းကျင်အခြေအနေကို ဂရုစိုက်စီစဉ်ခြင်းဖြင့် ကာကွယ်တားဆီးနိုင်ကြောင်း
WHO က ဖော်ပြခဲ့သည်။ 

ကျော့ဒါလီလင်း ဘာသာပြန်သည်။

ဤအကြောင်းအရာနှင့် ပက်သက်၍ ထင်မြင်ချက်ပေးလိုပါက ...
comment.myanmar@mmtimes.com သို့ ပေးပို့နိုင်ပါသည်။


အကြည့်အများဆုံး - ကမ္ဘာ့သတင်း

အကြည့်အများဆုံး - အာရှသတင်း