၂၀၁၃ ခုနှစ် အာဆီယံနိုင်ငံများ စိတ်အေးသက်သာနေရဖွယ်

အနားယူတော့မည့် အာဆီယံအတွင်းရေးမဈချုပ် ပစ်ဆူဝမ်။ (ဓာတ်ပုံ-အေအက်ဖ်ပီ)အနားယူတော့မည့် အာဆီယံအတွင်းရေးမဈချုပ် ပစ်ဆူဝမ်။ (ဓာတ်ပုံ-အေအက်ဖ်ပီ)

ကသိကအောက်ဖြစ်ရသော ခလုတ် တံသင်းတိုက်မှုများသည် သန်မာသော လူကြီးများပင်
တွေ့ကြုံရတတ်သည့် မတော်တဆမှုဖြစ်သည်။

ယခုနှစ် လန်ဒန် အိုလံပစ်တွင် တုတ်တိုများ လက်ပြောင်း လက်လွှဲပြုမှု မသေသပ်သော
ကြောင့် ဗြိတိသျှ လက်ဆင့်ကမ်း ပြေးပွဲ ယှဉ်ပြိုင်သူ များ အရေးရှုံးနိမ့်ခဲ့ရသည်။

ပြီးခဲ့သည့် ပေကျင်းနှင့် အေသင် အားကစားပွဲများတွင် အမေရိကန်မှ ထိပ်တန်း တာတို
ပြေးသမားများသည် ကိုင်ဆောင်သော ၀ါရင်းတုတ်တိုကို လွှတ်ချမိသဖြင့် ဆုတံဆိပ်မှ
လွဲခဲ့ရသည်။

ထို့ကြောင့် ကမ္ဘောဒီးယားနိုင်ငံက ၎င်း၏ အာဆီယံဥက္ကဋ္ဌတာဝန်ရယူ ထားသည့် ပြီးခဲ့
သည့်တစ်နှစ်တာအတွင်း ၎င်းပြိုင်ပွဲတွင်ကိုင်ဆောင်သည့် တုတ်ကို ထပ်ခါတလဲ
ကျစေခဲ့ခြင်းအတွက် ပြစ်တင်ဝေဖန်မှုများ တစ်ဆိတ်တော့ လျှော့ပေါ့သင့်ပေလိမ့်မည်။

အဓိကကျသော ဆွေးနွေးပွဲများနှင့် ထိပ်သီးညီလာခံများတွင် ကမ္ဘောဒီးယား က တရုတ်
နိုင်ငံအား အလေးအမြတ် ပြုပြီးနောက် ၎င်းတို့၏ တောင်တရုတ် ပင်လယ်တွင်း အချုပ်
အခြာအာဏာ ပိုင်ဆိုင်မှုကိစ္စနှင့်ပတ်သက်၍ စဉ်းစား ခန်းဝင် ဆွေးနွေးကြရာတွင် မိတ်ဆွေ
နိုင်ငံများအား ထောက်ခံအားပေးရန် ပျက်ကွက်မှုများကြောင့် ၎င်းတို့အား ပွင့်ပွင့်လင်းလင်း
ဆန့်ကျင်မှုများ ပေါ်ပေါက်ခဲ့ရသည်။

ယင်းသို့ဖြစ်ပျက်မှုသည် ကမ္ဘောဒီး ယားက အာဆီယံခေါင်းဆောင်များ ဘက်မှ နှစ်ဖက်
အငြင်းပွားနေသော ရေပိုင်နက်ပိုင်ဆိုင်မှု ပြဿနာကို နိုင်ငံ တကာပါဝင်ဖျန်ဖြေမှုပြုရန်
လက်မခံ နိုင်ကြောင်း သဘောတူညီခဲ့ကြသည်ဟု ပြီးခဲ့သည့်လ ထိပ်သီးဆွေးနွေးပွဲတွင်
မဟုတ်မမှန်ပြောကြားခဲ့စဉ်က ပေါ်လွင် ထင်ရှားခဲ့သည်။

အာဆီယံအဖွဲ့ဝင် အုပ်စုနိုင်ငံများ၏ ထက်ဝက်က ကမ္ဘောဒီးယား၏ ယင်းသို့ လွဲမှားစွာ
ပြောကြားခဲ့ခြင်းကို ဆန့်ကျင် ချေပခဲ့ကြပြီး ကမ္ဘောဒီးယားက ပေကျင်း လက်ခံနှစ်
သက်သော စကားအသုံး အနှုန်းကို သုံးစွဲပြောကြားရန် ဇွတ်မှိတ် ကြိုးပမ်းရာတွင်လည်း
၎င်း၏ အာဆီယံ လုပ်ဖော်ကိုင်ဖက်နိုင်ငံများက အတိုက် အခံပြုခဲ့ကြပြီး အပြီးသတ်တွင်
ထုတ်ပြန်သော ကြေညာချက်မှ အဆိုပါ စကားလုံး အသုံးအနှုန်းများကို ထုတ် ပယ်ပစ်
ခဲ့ကြပေသည်။

ယင်းအဖြစ်အပျက်မှာ အလွန် ရှက်ဖွယ်ကောင်းသောကြောင့် အာဆီယံ အုပ်စု၏ အတွင်း
ရေးမှူးချုပ် ဆူရင်ပစ်ဆူ ၀မ်အား အဆိုပါအဖြစ်အပျက်သည် အာဆီယံအဖွဲ့တွင်း၌
ယုံကြည်လေးစား မှုဆိုင်ရာ အကျပ်အတည်းတစ်ရပ် ဖြစ်ပေါ်စေခဲ့ကြောင်း ဖွင့်ဟပြော
ကြား ခဲ့သည့်အဖြစ်သို့ ရောက်ရှိစေခဲ့သည်။

ဒီဇင်ဘာလ ၁၃ ရက်နေ့တွင် နိုင်ငံတကာအကျပ်အတည်း ဖြေရှင်းရေး အုပ်စု၏ အာဆီယံ
ဒေသဆိုင်ရာ ဒါရိုက်တာ ဂျင်မ်ဒဲလား ဂိုင်ယာကိုမာက ပြီးခဲ့သည့်နှစ်အတွင်း ပေါ်ပေါက်ခဲ့
သည့် အဖြစ်အပျက်များက အာဆီယံ၏ စုံလင် ထွေပြားသော အဖွဲ့ဝင်နိုင်ငံများ အကြား
တွင် တည်ရှိနေသည့် နက်ရှိုင်းသော ပြတ်ရွေ့ကြောကြီးကို လှစ်ပြလိုက်သကဲ့ သို့ရှိကြောင်း
ပြောကြားလိုက်သည်။

သို့သော် အဆိုပါအဖြစ်ဆိုးကြီး၏ အချိန်တာသည် အနည်းဆုံး ကုန်ဆုံးလု အခြေသို့
ရောက်ရှိလာပြီဖြစ်သည်။

ထို့နောက် အားလုံး စိတ်သက်သာရာ ရစေရန် ယင်းလုပ်ပိုင်ခွင့် အဆောင် အယောင် နံပါတ်
တုတ်တိုကို ကမ္ဘောဒီး ယားလက်မှ ဘရူနိုင်းလက်သို့ လာမည့် လတွင် လွှဲပြောင်းပေးအပ်ရ
တော့မည် ဖြစ်သည်။

နိုင်ငံပင်ငယ်သော်ငြားလည်း ဘရူ နိုင်းသည် အာဆီယံရေးရာများတွင် ပိုမိုအတွေ့အကြုံ
ကြွယ်ဝပြီး အုပ်စု၏ အခြေခံနိုင်ငံများ သဘောထားကိုက်ညီ လက်ခံမှု သဘာဝကို ပိုမို
သဘောပေါက် နားလည်သည့် နိုင်ငံဖြစ်သည်။

ထို့ပြင် ၎င်းနိုင်ငံတွင် အတွေ့အကြုံ ရင့်ကျက်၍ အခြားအာဆီယံအဖွဲ့ဝင် နိုင်ငံများက အမှန်
တကယ် ချစ်ခင် လေးစားသော နိုင်ငံရေးသမားစုံတွဲ ဖြစ်သည့် နိုင်ငံခြားရေးဝန်ကြီး မင်းသား
ကြီး မိုဟာမက် ဘိုလ်ကီးယားနှင့် လက်ထောက် ၀န်ကြီး ဂျင်မ်ဂျောက် ဆန်တို့လည်း ရှိနေကြ
ပါသည်။

ကမ္ဘောဒီးယား၏ နိုင်ငံခြားရေး ၀န်ကြီး ဟော်နမ်ဟောင်းသည်လည်း အတွေ့အကြုံရှိသူ
ဖြစ်ပါသည်။ အမှန် စင်စစ် အသက် ၇၇ နှစ်ရှိပြီး ၎င်းထမ်း ဆောင်ခဲ့ပြီးနောက်တွင် ၎င်း၏
ထိရောက် သော အရွယ်လွန်သွားပြီဖြစ်သည်။

မထောက်မကွယ် ပြောရမည်ဆိုပါက ၎င်းအား အာဆီယံလုပ်ဖော်ကိုင်ဖက် အများအပြား
က နှစ်သက်ခြင်းမရှိကြ သည့်ပြင် ၎င်းတို့သည် သူ၏အမည်ကို ကြားရုံမျှဖြင့်ပင် မျက်စိ
မျက်နှာ ပျက်သွား ကြကြောင်း တွေ့ရှိရသည်။

ယင်းအဖြစ်အပျက် အခြေအနေမျိုး စကားနည်းသော်လည်း နွေးထွေးသည့် ဘရူနိုင်းနိုင်ငံ
၏ မိုဟာမက်တွင်သော် လည်းကောင်း၊ လူငယ်များအပေါ် ကြင်နာရင်းနှီးတတ်သောလင်မ်
တွင် သော်လည်းကောင်း မတွေ့ရှိရပေ။

မိုဟာမက်သည် ဆူလ်တန်ဘုရင်၏ ညီတော်ဖြစ်သောကြောင့်သာ အဆိုပါ ရာထူးကိုရရှိ
ခဲ့ခြင်းဖြစ်ကြောင်းနှင့် လင်မ် သည် ၎င်းတို့ထဲတွင် ကြံရည်ဖန်ရည် ရှိသည့် ပုဂ္ဂိုလ်ဖြစ်
ကြောင်းတော့ ယိုးစွပ်မှုများရှိခဲ့ဖူးပါသည်။

ယိုးစွပ်မှုများ မှန်သည်ဖြစ်စေ၊ မှားသည်ဖြစ်စေ ၎င်းတို့သည် အရည် အချင်းပြည့်ဝ၍
နှစ်လို့ဖွယ်ကောင်းသည့် အတွဲအဖြစ် ရပ်တည်ခဲ့ကြကြောင်း တွေ့ရှိရသည်။ ယင်းအဖြစ်
အပျက်ကပင်လျှင် ကြိုဆို လက်ခံထိုက်သော အချက်ဖြစ်သည်။

ဘရူနိုင်းနိုင်ငံငယ်ကလေးသည် အဓိကကျသော အစီအစဉ်သစ်များ တစ်စုံတစ်ခုမျှ
တက်ကြွစွာ လုပ်ဆောင် ဖွယ်မရှိသည်မှာ မှန်ကန်သော်ငြားလည်း ယင်းသည်ပင်လျှင်
လောလောဆယ် တွင် သင့်လျော်သော အနေအထား ဖြစ်ပါသည်။

အာဆီယံအဖွဲ့၏ ယခု လိုလားအပ်သော အခြေအနေမှာ အုပ်စုနိုင်ငံများအတွင်း
တစ်နှစ်တာ ချစ်ချစ်ခင်ခင်နှင့် စည်းလုံးညီညွတ်စွာ နေထိုင်ကြရန်သာ ဖြစ်သည်။

ယင်းဖြစ်စဉ်သည် ယခုလအကုန်တွင် လူတော်တစ်ယောက် ဖြစ်သော်လည်း စိတ်လက်
မြန်ဆန်သည့် ထိုင်းနိုင်ငံမှ ပစ်ဆူဝမ်နေရာတွင် ဆံပင်များဖြူစပြု နေပြီဖြစ်သော သတိဖြင့်
လုပ်ဆောင် တတ်သူ ဗီယက်နမ်နိုင်ငံ ဒုတိယနိုင်ငံခြား ရေးဝန်ကြီး လီလုံမင်း အစားထိုး
ခန့်သော အခါ ပိုမိုပီပြင်လာဖွယ်ရှိပေသည်။

၎င်း၏ သဘောသဘာဝအတိုင်း ဆူရင်ပစ်ဆူဝမ်က လီလုံမင်းအား အာဆီယံတစ်ဖွဲ့လုံး
ကိုယ်စား လုပ်ဆောင်ပိုင်ခွင့် အာဏာပိုမိုပေးအပ် ရန် အဖွဲ့အား တိုက်တွန်းခဲ့သော်ငြား
လည်း ယင်းကဲ့သို့ ဖြစ်လာရန် အခြေ အနေမပေးသည့်အတွက် လီစိတ်သက် သာရာရခဲ့
သည်။

လီက ၎င်းတာဝန်ထမ်းဆောင်ရမည့် ငါးနှစ်သက်တမ်းအတွင်း တောင်တရုတ် ပင်လယ်
ပြဿနာ ဖြေရှင်းရာတွင် လိုက်နာရမည့် စည်းကမ်းချက်များနှင့် ပတ်သက်သည့် ဆွေးနွေး
ပွဲ လုပ်ဆောင် ရန်ကိစ္စနှင့် ဒေသတွင်း နျူကလီးယား လက်နက်ကင်းမဲ့ရေးဇုန် ဖြစ်မြောက်
ရေး သည် ၎င်း၏ဦးစားပေးတာဝန်များ ဖြစ်ကြောင်း ပြောကြားသည်။

၎င်း၏ အထက်ပါရည်မှန်းချက် နှစ်ရပ် စလုံး အောင်မြင်ပါစေဟုဆုတောင်းလိုက် ပါသည်။
သို့သော် ဒုတိယရည်မှန်းချက် ပန်းတိုင်ကိုမူ အမေရိကန်ပြည်ထောင်စု၊ တရုတ်နိုင်ငံနှင့်
အိန္ဒိယတို့က လက်ခံရန် အကြောင်းမတွေ့ရှိရပေ။

၎င်းပြင် ပင်လယ်တွင် အချုပ်အခြာ အာဏာပိုင် ဆိုင်မှုကိစ္စ အငြင်းပွားမှုများနှင့် ပတ်သက်
၍ ဆွေးနွေးမှုများ ပေါ်ပေါက်မည်ဖြစ် သော်လည်း ၎င်းတို့ ထိထိရောက်ရောက် ဖြစ်မြောက်
လာရန် အလားအလာများ မတွေ့ရပေ။

(အေအက်ဖ်ပီ)

ခင်အောင် ဘာသာပြန်သည်။

ဤအကြောင်းအရာနှင့် ပက်သက်၍ ထင်မြင်ချက်ပေးလိုပါက ...
comment.myanmar@mmtimes.com သို့ ပေးပို့နိုင်ပါသည်။


အကြည့်အများဆုံး - အာရှသတင်း