ဇွန် ၂၄ ရက်က ပြင်ဦးလွင်မြို့နယ် ၆ မိုင်အပန်းဖြေစခန်းတွင် မသန်စွမ်းသူများအပေါ် ခွဲခြား
ဆက်ဆံမှု လျော့နည်းလာစေရန် လူထုလှုပ်ရှားမှု ပြုလုပ်ပြီးနောက် ထိုကဲ့သို့ လှုပ်ရှားမှုများကို
ဆက်လက်ပြုလုပ်သွားမည်ဖြစ်ကြောင်း ရွှေပုသိမ်အနာဂတ်ကွန်ရက်ဥက္ကဋ္ဌ ဦးလင်းနိုင်က
ပြောသည်။

''ဇူလိုင် ၁ဝ ရက်မှာ ဦးပိန်တံတားမှာလုပ်မယ်။ အဲဒါပြီးရင် မနော်ရမ္မံရကစားကွင်းမှာ
ဆက်လုပ်မယ်'' ဟု ၄င်းက ပြောသည်။

လူထုလှုပ်ရှားမှုပြုလုပ်ရာတွင် လက်ကမ်းစာစောင်များ ဖြန့်ဝေခြင်း၊ ပန်းချီပြခန်းများပြသခြင်း၊
မျက်လှည့်ပြသခြင်း၊ ပညာပေးဟောပြောခြင်းတို့ ပြုလုပ်ခဲ့ပြီးမသန်စွမ်းသူများနှင့် ပတ်သက်သော
သတင်းအချက်အလက်များ ဖြန့်ဝေရန်နှင့် ပြည်သူလူထုထံ အသိပညာပေးရန်၊ မသန်စွမ်းသူများ
ကျန်းမာရေး စောင့်ရှောက်မှုပိုမိုရရှိစေရန်၊ လူတိုင်း အကျုံးဝင်ပညာရေးစနစ်တွင် မသန်စွမ်း
သူများ ပိုမိုပါဝင်လာနိုင်စေရန်၊ မသန်စွမ်းသူများအလုပ်အကိုင် အခွင့်အလမ်းများ ပိုမိုရရှိစေရန်၊
မသန်စွမ်းသူများ အခွင့်အရေးဥပဒေကို ပိုမိုသိရှိလာစေရန် ရည်ရွယ်ကြောင်း
သိရသည်။

မသန်စွမ်းသူများအပေါ် ခွဲခြားဆက်ဆံမှု လျော့ကျလာသော်လည်း မသိမသာခွဲခြားဆက်ဆံမှုများ
ရှိနေသေးကြောင်း ရွှေမင်းသား ဖောင်ဒေးရှင်း၏ ပုသိမ်ကြီးမြို့နယ်တာဝန်ခံ ဦးကျော်သူအောင်က
ပြောသည်။

''မနှစ်က သူငယ်နာအကြောတင် ဖြစ်နေတဲ့ကလေးတစ်ယောက် ကျောင်းအပ်တုန်းက
အသက်ငယ် သေးတယ်ဆိုပြီး လက်မခံဘူး။ ဒီနှစ်ကျောင်းအပ်တော့လည်း ကျောင်းက
မလိုလားတဲ့ပုံစံပြတယ်။ လုံးလုံးငြင်းပစ်တာတော့ မဟုတ်ဘူး။ အဲဒါကို ကျွန်တော်တို့သွားပြီး
ပညာပေးခဲ့ရတာ ရှိတယ်''ဟု ၄င်းက ပြောသည်။

မသန်စွမ်းသူများကို ခွဲခြားဆက်ဆံရာတွင် မိသားစုဝင်များကိုယ်တိုင်ပါဝင်နေပြီးအသိပညာပေး
မှုများကို ပြုလုပ်နေရကြောင်း၄င်းက ပြောသည်။

''ကျွန်တော်တို့ မသန်စွမ်းစာရင်း သွားကောက်ရင် တချို့အိမ်တွေဆို ပြောပြရမှာ အရမ်းရှက်ကြတယ်။
မရှိဘူးဆိုပြီး ပြောလွှတ်တယ်''ဟု ၄င်း၏ အတွေ့အကြံုကို ပြောပြသည်။

၂ဝ၁၄ ခုနှစ်၊ မြန်မာနိုင်ငံ လူဦးရေသန်းခေါင်စာရင်းအရ မသန်စွမ်းသူဦးရေသည် နိုင်ငံ့
လူဦးရေ၏ ၄ ဒသမ ၆ ရာခိုင်နှုန်း (၂,၃၁၁,၂၅ဝ ဦး) ရှိပြီး ကိုယ်အင်္ဂါမသန်စွမ်းသူ ၉၅၇,၇၃၆ ဦး၊
အမြင်အာရုံမသန်စွမ်းသူ ၉,၈၃၅,၅၉၈ ဦး၊ အကြားအာရုံ မသန်စွမ်းသူ ၆၇၃,၁၂၆ ဦး၊
ဉာဏ်ရည်မသန်စွမ်းသူ ၈၃၅,၅၉၈ ဦးရှိသည်။