အစိုးရသစ်၏ ပထမ ရက် ၁၀၀ ကာလအတွင်း ဆောင်ရွက်ခဲ့မှု များနှင့် ပတ်သက်သည့်
သတင်းစာရှင်းလင်းပွဲကို သြဂုတ်လ ၁၂ ရက်မှ စတင်၍ နေပြည်တော်ရှိ ပြန်ကြားရေးဝန်ကြီးဌာန၊
၀န်ကြီးရုံး၊ စုပေါင်းအစည်းအဝေးခန်းမ၌ အပတ်စဉ်ပြုလုပ်သွားမည်ဖြစ်ကြောင်း ပြန်ကြားရေး
၀န်ကြီးဌာန၏ လူမှုကွန်ရက်စာမျက်နှာတွင် သြဂုတ်လ ၉ ရက်နေ့က ဖော်ပြထားသည်။

အဆိုပါအစီအစဉ်အရ သြဂုတ်လ ၁၂ ရက် မွန်းလွဲ ၁ နာရီတွင် နိုင်ငံခြားရေးဝန်ကြီးဌာန၊
နယ်စပ်ရေးရာဝန်ကြီးဌာန၊ လျှပ်စစ်နှင့် စွမ်းအင်ဝန်ကြီးဌာန၊ လူမှုဝန်ထမ်း၊ ကယ်ဆယ်ရေးနှင့်
ပြန်လည် နေရာချထားရေးဝန်ကြီးဌာနတို့က ရှင်းလင်းဖြေကြားသွားမည် ဖြစ်ကြောင်း
ဖော်ပြထားသည်။

ယခုအပတ်တွင် ကျင်းပသည့် သတင်းစာရှင်းလင်းပွဲသို့ တက်ရောက် သတင်းရယူလိုသည့်
သတင်းဌာနများအနေဖြင့် ပြန်ကြားရေးဝန်ကြီးဌာန၊ ပြည်တွင်း/ပြည်ပဆက်ဆံရေးနှင့်
သတင်းပြန်ကြားရေး ဌာနခွဲ၊ Email: [email protected] သို့ လိပ်မူ၍
အမည်၊ မှတ်ပုံတင်အမှတ်၊ သတင်းဌာန၊ ဆက်သွယ်ရန် ဖုန်းနံပါတ်၊ လိပ်စာ (အီးမေးလ်လိပ်စာ) တို့ကို
ပြည့်စုံမှန်ကန်စွာ ဖြည့်စွက်ပြီး ယနေ့ သြဂုတ်လ ၉ ရက် နေ့မှစ၍ သြဂုတ်လ ၁၁ ရက်
နံနက် ၁၀ နာရီအထိ စာရင်းပေးသွင်းနိုင်ကြောင်းနှင့် အပတ်စဉ် သတင်းစာရှင်းလင်းပွဲများ
ပြုလုပ်သွားမည်ဖြစ်ပြီး ကျင်းပမည့်ရက်နှင့် ရှင်းလင်းမည့် ၀န်ကြီးဌာနများစာရင်းကို
ထုတ်ပြန်ပေးသွားမည် ဖြစ်ကြောင်း သိရှိရသည်။