ပြည်ထောင်စုလွှတ်တော်က အတည်ပြုပြီး ပေးပို့ထားသော လူဦးရေတိုးပွားနှုန်းထိန်းညှိခြင်းဆိုင်ရာ
ကျန်းမာရေးစောင့်ရှောက်မှု ဥပဒေကြမ်းနှင့် ပတ်သက်ပြီး အသုံးအနှုန်းများကိုပြင်ဆင်ရန်
သမ္မတဦးသိန်းစိန်က ပြည်ထောင်စုလွှတ်တော်သို့ သဘောထားမှတ်ချက် ပြန်လည်ပေးပို့ခဲ့သည်။

အဆိုပါဥ ပဒေကြမ်းတွင်ပါရှိသော ပြဋ္ဌာန်းချက်များတွင် သုံးနှုန်းထားသည့် အသုံးအနှုန်းများသည်
လက်ရှိတွင် ပြင်ဆင်ဖွဲ့စည်းခဲ့သည့် ကျန်းမာရေးဝန်ကြီးဌာန၏ ဖွဲ့စည်းပုံပါ ရာထူး၊ ဌာန
အသုံးအနှုန်းများနှင့် ကိုက်ညီမှု မရှိသောကြောင့် ပြင်ဆင်သင့်ကြောင်း ဧပြီလ ၉ ရက်နေ့
ရက်စွဲဖြင့်ပေးပို့ထားသည့် ပြန်ကြားစာတွင် ဖော်ပြထားသည်။

ဥပဒေကြမ်းတွင် ကျန်းမာရေးဦးစီးဌာနဟု ဖော်ပြထားသော အသုံးအနှုန်းများအား
ပြည်သူ့ကျန်းမာရေးဦးစီးဌာနဟု ပြင်ဆင်သင့်ကြောင်း၊ မြို့နယ်ကျန်းမာရေးမှူးဟူသည့်
စကားရပ်အစား မြို့နယ်ပြည်သူ့ ကျန်းမာရေး ဦးစီးဌာနမှူးဟု ပြင်ဆင်သင့်ကြောင်း ပြန်ကြားစာတွင်
ဖော်ပြထားသည်။

ပြည်ထောင်စုလွှတ်တော်သည် အထက်ပါ ဥပဒေကြမ်းကို ဧပြီလ ၆ ရက်နေ့တွင် အတည်ပြု
ပြီးနောက် သမ္မတထံသို့ လက်မှတ်ရေးထိုး ထုတ်ပြန်နိုင်ရန် ပေးပို့ထားခဲ့ခြင်းဖြစ်သည်။

ပြင်ဆင်ချက်များနှင့် ပတ်သက်ပြီး ဆွေးနွေးလိုသည့် လွှတ်တော်ကိုယ်စားလှယ်များက
မေ ၁၃ ရက်နေ့တွင် နောက်ဆုံးထား အမည်စာရင်း ပေးရမည်ဖြစ်သော်လည်း ကျန်းမာရေး
၀န်ကြီးဌာန၏ ပြင်ဆင်ဖွဲ့စည်းပုံအရ အသုံးအနှုန်းများကိုသာ ပြင်ဆင်ရန်ဖြစ်သောကြောင့်
ကန့်ကွက်ဆွေးနွေးလိုသူ မရှိနိုင်ကြောင်း ချင်းတိုင်းရင်းသားလွှတ်တော် ကိုယ်စားလှယ်
ဦးနိန်းခင်းပေါင်က ပြောကြားသည်။