ယခုနှစ်သင်္ကြန်ကာလအတွက် နေပြည်တော် ဟိုတယ်ဇုန်အတွင်း ကုမဏီကြီးများမှ သင်္ကြန်ရေကစားမဏ္ဍပ်နှင့် ဖျော်ဖြေရေးမဏ္ဍပ်များ လျှောက်ထားမှုမှာ ယခုချိန်ထိ တစ်ခုသာရှိကြောင်း နေပြည်တော် စည်ပင်သာယာရေးကော်မတီမှ သိရသည်။
အစိုးရသစ်လက်ထက် ပြီးခဲ့သည့်သင်္ကြန်ကာလ၌ နေပြည်တော်ဟိုတယ်ဇုန်အတွင်း သင်္ကြန်ရေကစားမဏ္ဍပ်များ ဆောက်လုပ်ခွင့်အတွက် လျှောက်ထားမှုများမရှိခဲ့ဘဲ နေပြည်တော်သင်္ကြန်ဖြစ်မြောက်မှုမရှိခဲ့ရာမှ ယခုနှစ်တွင်လည်း နေပြည်တော်ဟိုတယ်ဇုန် တွင် သင်္ကြန်ရေကစားမဏ္ဍပ်နှင့်ဖျော်ဖြေရေးကမဏ္ဍပ်လျှောက်ထားမှုမှာ ရွှေသံလွင်ကုမ္ပဏီလိမိတက်တစ်ခု သာ လာရောက်လျှောက်ထားပြီး လက်ရှိဆောက်လုပ်ရေးလုပ်ငန်းများ စတင်ဆောင်ရွက်နေပြီဖြစ်သည်။
ယခင်အစိုးရလက်ထက်တွင် နေပြည်တော်ဟိုတယ်ဇုန်အတွင်း ကုမ္ပဏီကြီးများ၏ရေကစားမဏ္ဍပ်၊ ဖျော်ဖြေရေးမဏ္ဍပ် စုစုပေါင်း ခုနှစ်ခုခန့်ထိ ရှိပြီးသင်္ကြန်တွင်းရေပက်ခံထွက်သူများ၊ ရေကစားကြသူများဖြင့် စည်ကားခဲ့သော်လည်း ယခုအစိုးရသစ်လက်ထက်တွင် နေပြည်တော်သင်္ကြန်ကာလတွင် အစည်ကားဆုံးနေရာတစ်ခုဖြစ်သည့် နေပြည်တော်ဟိုတယ်ဇုန်တွင် သင်္ကြန်ရေကစားမဏ္ဍပ်များ တည်ဆောက်မှုမရှိဖြစ်ခဲ့သည်။
" မနှစ်ကတော့ ဟိုတယ်ဇုန်မှာသင်္ကြန်မဏ္ဍပ်ဆောက်ခွင့်လာရောက်လျှောက်ထားမှု တစ်ခုမှမရှိခဲ့ပါဘူး။ ဒီနှစ်တော့ သင်္ကြန်မဏ္ဍပ်တည်ဆောက်ခွင့်ကတော့ လျှောက်သလောက်ခွင့်ပြုပေးသွားဖို့တော့ ရှိပါတယ်။ ဒါပေမဲ့ ခုချိန်ထိ တစ်ဦးတည်းပဲလျှောက်ထားမှုရှိပါသေးတယ်" ဟု နေပြည်တော်စည်ပင်သာယာရေးကော်မတီဝင် ဦးမင်းသူကပြောပြသည်။
ပြည်ထောင်စုနယ်မြေ၊ နေပြည်တော်တစ်ခုလုံး မြို့နယ် ရှစ်ခုတွင် လက်ရှိချိန်ထိ ရေကစားမဏ္ဍပ်လျှောက်ထားမှု ၁၇ခု ထိရှိကြောင်း၊ ထို့ပြင် ပျဉ်းမနားမြို့တွင် ပထမဆုံးအနေဖြင့် ယခုနှစ်သင်္ကြန်တွင် ပထမဆုံးလမ်းလျှောက်သင်္ကြန်ကို ကျင်းပပြုလုပ် သွားမည်ဖြစ်ကြောင်း သိရသည်။
" ဒီနှစ် ကျွန်တော်တို့မြို့တော်ဝန်မဏ္ဍပ်မှ ထူးထူးခြားခြားအနေနဲ့ကတော့ ငြိမ်းချမ်းရေးဂီတပြိုင်ပွဲက အဆိုတော်တွေ ၁၀ ဦးလောက် လာရောက်ဖျော်ဖြေဖို့ရှိပါတယ်။ မြန်မာ့ရိုးရာသင်္ကြန်ပုံစံပြုလုပ်သွားမှာပါ။ မြန်မာ့အသံခေတ်ပေါ်တေးဂီတအဖွဲ့က တီးခတ်ပေးမှာပါ။ အခြားနာမည်ကြီးအဆိုတော်တွေလဲ ငှားထားပါတယ်။ ဘယ်သူတွေဆိုတာတော့ မသိရသေးပါဘူး" ဟု ဦးမင်းသူကပြောသည်။
