မေ ၃၁ ရက်နေ့ ည ၉ နာရီ အချိန်ခန့်တွင် မန္တလေးမြို့ အမရပူရမြို့နယ်၊ စွယ်တော်ကားကြီး ကွင်းအရှေ့ဘက် ၆၂ လမ်းမကြီးပေါ်တွင် လူငယ် ၂၀ ဦးခန့်သည် ဓားရှည်များကိုင်ဆောင်ကာ ရမ်း ကား နေကြောင်း သက်ဆိုင်ရာက သွားရောက်စစ်ဆေးခဲ့သည်။

စုံစမ်းချက်အရ မန္တလေးခရိုင် မှုခင်းနှိမ်နင်းရေးအဖွဲ့မှ ရဲအုပ်အောင်ကိုဝင်းနှင့်အဖွဲ့က အောင်မြေသာစံမြို့မရဲစခန်း (ပ)၁၉၅/၁၈၊ ရဇသတ်ကြီးပုဒ်မ ၃၈၆ မှ ၃၉၅/ကျင့်၅၁၂ အရ တရားစွဲတင်ထားသောအမှုမှ တရားခံပြေး ကျော်ကျော်(ခ) မင်းသိန်း (ခ) ကျားပေါက် (ခ) ပေါက်စ နှင့် အောင်ကျော်(ခ) ဂျီဆက်တို့ နှစ်ဦးသည် ၆၆×၆၇လမ်းကြား၊ B လမ်းရှိ ထမင်းဆိုင်တွင် ရောက်ရှိနေကြောင်းသတင်းအရသွားရောက်ဖမ်းဆီးခဲ့သည်။

အဆိုပါနေရာတွင် ၄င်းတို့ကို မတွေ့ရှိဘဲ စွယ်တော်ကားကြီးကွင်းအရှေ့ဘက် ၆၂ လမ်းမကြီးပေါ်တွင် ကျော်ကျော်(ခ) မင်းသိန်း(ခ) ကျားပေါက်(ခ)ပေါက်စ နှင့် အောင်ကျော်(ခ) ဂျီဆက်တို့ ၂ ဦးကို တွေ့ရှိဖမ်းဆီးစဉ် လူငယ် ၂၀ ဦးခန့်က မကျေနပ်သဖြင့် ဓားရှည်များကိုင်ဆောင်ကာ ရမ်းကားခဲ့ခြင်း ဖြစ်ကြောင်းသိရသည်။

အဆိုပါဖြစ်စဉ်နှင့်ပတ်သက်၍ ည ၁၀နာရီခွဲ အချိန်ခန့်တွင် မြစ်ငယ်ရဲစခန်းမှ ဒုရဲအုပ် သူရအောင် ဦးစီးသည့် ရဲတပ်ဖွဲ့ဝင် ၈ဦးသည် MA-13 ၃ လက်၊ ၎င်းကျည် ၃၀တောင့်နှင့်အတူ သွားရောက် ရှင်းလင်းရာ အဆိုပါလူငယ်အဖွဲ့မှ ပြန်လည်ခုခံရန်ပြုသဖြင့် ဒုရဲအုပ် သူရအောင်မှ MA-13 ဖြင့် ၁ ချက်၊ ရဲတပ်ကြပ်သက်နိုင်မှ MA-13 ဖြင့် ၃ ချက် ခြောက်လှန့်ပစ်ခတ်ခဲ့သည်။

ထိုသို့ပစ်ခတ်ခြောက်လှန့်စဉ် ပြည်ကြီးတံခွန်မြို့နယ်နေ ငဆက်(ခ)ဟိန်းမင်းဆက် ၂၄ နှစ် တွင် လည်ပင်းနှင့် ကျောကုန်းတွင် ပေါက်ထွက်ဒဏ်ရာရရှိကာ အခင်းဖြစ်နေရာတွင် သေဆုံးခဲ့ပြီး၊ စိုင်းထူးအောင် ၂၃ နှစ်မှာ ပါးပေါက်ဒဏ်ရာရရှိခဲ့ရာ မန္တလေးပြည်သူ့ဆေးရုံကြီးသို့ တင်ပို့ကုသထား ကြောင်း ရဲတပ်ဖွဲ့ သတင်းထုတ်ပြန်ထားသည်။