အဆင်မပြေ

အမေရိကန်က မဟာမိတ်နိုင်ငံများကိုပါ သွင်းကုန်ခွန်များတိုးကောက် ခြင်းကြောင့် မဟာမိတ်နိုင်ငံများကလည်း အမေရိကန်ကို တန်ပြန် အခွန်တိုးကောက်ရန်စီစဉ်နေသဖြင့် တင်းမာမှုများဖြစ်ပွားကာ ခုနစ် နိုင်ငံအစည်းအဝေးသည် အဆင်မပြေဖြစ်ခဲ့ရသည်။ ပူးတွဲကြေညာချက်တွင် စက်မှုထိပ်သီးခုနစ်နိုင်ငံသည် စည်းမျဉ်းစည်းကမ်းကိုအခြေခံသော ကုန်သွယ်ရေးစနစ်ထူထောင်မည်ဟု ကြေညာထားခြင်းကို အမေရိကန်သမ္မတထရမ့်က လက်ခံအသိအမှတ်ပြုရန် ငြင်းဆန်ခဲ့ သည်။ ဂျီ-ဆဲဗင်းအဖွဲ့တွင် ကနေဒါ၊ အမေရိကန်၊ ဗြိတိန်၊ ပြင်သစ်၊ အီတလီ၊ ဂျပန်နှင့်ဂျာမနီတို့ပါဝင်ပြီး ကမ္ဘာ့စီးပွားရာခိုင်နှုန်း ၆ဝ အထိကို ကိုယ်စားပြုထားသည်။

ဇူလိုင် ၁ ရက်မှစတင်ကာ ဂျီ-ဆဲဗင်းမဟာမိတ်နိုင်ငံများက အမေရိကန်ကို တန်ပြန်အခွန်တိုးကောက်မည်ဖြစ်ကြောင်း၊ သမ္မတထရမ့်သည် ကိုယ်ကျိုးကြည့်အမျိုးသားဝါဒကိုစွဲကိုင်ကာ မျှတစွာကုန်သွယ်ရေးကို မျက်ကွယ်ပြုနေကြောင်း ကနေဒါဝန်ကြီးချုပ်ထရူဒိုက စွပ်စွဲခဲ့သည်။ 

အမေရိကန်က မထောက်ခံလျှင်ပင် ဂျီ-ဆဲဗင်းနိုင်ငံများအနေဖြင့် ပူးတွဲကြေညာချက်အတိုင်း လက်ခံကျင့်သုံးသွားမည်ဖြစ်ကြောင်း ဗြိတိန် အစိုးရတာဝန်ရှိသူများက ပြောသည်။ သမ္မတထရမ့်သည် ဇွန် ၁၂ ရက်တွင် စင်ကာပူ၌ မြောက်ကိုရီးယားခေါင်းဆောင် ကင်ဂျုံအွန်နှင့် တွေ့ဆုံရန်အတွက် ကနေဒါနိုင်ငံ ကွီးဘတ်ပြည်နယ် လာမယ်ဘာရီ မြို့ရှိ ဂျီ-ဆဲဗင်းအစည်းအဝေးမှ စောစီးစွာထွက်ခွာခဲ့သည်။

ဂျီ-ဆဲဗင်းနိုင်ငံများသည် ကမ္ဘာတစ်ဝန်းအမျိုးသမီးငယ်များ ပညာ ရေးအတွက် ဒေါ်လာသန်း ၃ဝဝဝ ရန်ပုံငွေစိုက်ထူအသုံးပြုသွားရန် ကတိပြုခဲ့ကြသည်။ လာမည့်ငါးနှစ်အတွင်း ကမ္ဘာ့ဘဏ်က ဒေါ်လာ သန်း ၂ဝဝဝ၊ ဗြိတိန်က ဒေါ်လာသန်း ၂၅ဝ ၊ ကနေဒါက ဒေါ်လာ သန်း ၃၁ဝ အထိထည့်ဝင်ရန် ကတိပြုထားသည်။