အထက်လွှတ်တော်တွင်း ဥပဒေကြမ်းနှင့်ပတ်သက်၍ မဲခွဲခဲ့ရာ ထောက်ခံမဲများစွာရရှိခဲ့သည်။ အလှကုန်ပစ္စည်းများတွင် ပိုမိုချောမွေ့စေရန်သုံးသည့် ပလတ်စတစ်အမှုန်ငယ်များ၊ ပလစ်စတစ်အစေ့များနှင့် အစအနများစွန့်ပစ်မှုလျှော့ချရန် ရည်ရွယ်ပြီး ဥပဒေကြမ်းကို အတည်ပြုခဲ့ခြင်းဖြစ်သည်။ ကုန်စုံဆိုင်များမှ ပလတ်စတစ်ခွက်ယောက်များနှင့် ပလတ်စတစ်အစအနများသည် ကမ္ဘာ့သမုဒ္ဒရာများသို့ရောက်ရှိသွားပြီး ရေနေသတ္တဝါများ သေဆုံးစေကာ သဘာဝပတ်ဝန်းကျင်ကို ထိခိုက်စေခဲ့သည်။
    ပလတ်စတစ်အစအနများက လူသား၏ကျန်းမာရေးအပေါ် မည်ကဲ့သို့ အကျိုးသက်ရောက်မှုရှိသည်ကို မသိရှိသေးသော်လည်း သိပ္ပံပညာရှင်များကမူ ရေသန့်ဘူးများမှစ၍ ပင်လယ်စာများအထိ အရာရာတွင် ပလတ်စတစ်မှုန်များကို တွေ့ရနေကြောင်း ပြောဆိုခဲ့သည်။ အချင်း ငါးမီလီမီတာအောက်သေးငယ်သော ပလတ်စတစ်များကို မိုက်ခရိုက်ပလတ်စတစ်သို့မဟုတ် ပလတ်စတစ်အစအနလေးများဟု သတ်မှတ်ထားသည်။
    ဂျပန်နိုင်ငံတစ်ဝန်း၌ ဖမ်းဆီးမိခဲ့သော ငါးများအနက် ၄၀ ရာခိုင်နှုန်း၏ အစာချေစနစ်များတွင် မိုက်ခရိုက်ပလတ်စတစ်များကို တွေ့ရှိခဲ့ကြောင်း ဂျပန်သုတေသနပညာရှင်များကပြောဆိုခဲ့ပြီးဖြစ်သည်။ ကမ္ဘာ့နိုင်ငံခေါင်းဆောင်များကလည်း ပလတ်စတစ်အမှိုက်များကြောင့် စိုးရိမ်စရာရှိနေကြောင်း ပြောဆိုခဲ့ပြီး ပလတ်စတစ်ညစ်ညမ်းမှုကို ကန့်သတ်မည့် ချာတာစာတမ်းတစ်ခုကို ယခုလအတွင်း ကနေဒါ၌ ပြုလုပ်ခဲ့သည့် ဂျီ ၇ အစည်းအဝေး၌ လက်မှတ်ရေးထိုးခဲ့သည်။ သို့သော် ဂျပန်နှင့် အမေရိကန်တို့ကမူ လက်မှတ်ရေးထိုးခြင်းမပြုခဲ့ချေ။