ရာဇဝတ်မှု၊ပို့ကုန်သွင်းကုန်ဥပဒေတို့ဖြင့် တရားခံ ပြေးအဖြစ် ကြေညာထားသူကို ရဲတပ်ဖွဲ့က ရန်ကုန်တိုင်းဒေသကြီး တောင်ပိုင်းခရိုင် ကွမ်းခြံကုန်းမြို့နယ်တွင်သွားရောက်ဖမ်းဆီးစဉ် ပြန်လည်ခုခံသဖြင့် ရဲတပ်ဖွဲ့ ဝင် ၃ဦး ဒဏ်ရာရရှိခဲ့မှု ဇွန် ၁၆ ရက်က ဖြစ်ပွားခဲ့သည်။
ကွမ်းခြံကုန်းမြို့နယ်တရားရုံး၏ ရာဇဝတ်အထွေထွေ အမှုအမှတ်(၁၇/၁၈)ရာဇသတ်ကြီးပုဒ်မ ၂၉၄/၃၂၃/ကျင့် ၅၁၂ အမှု၊ ရာဇဝတ်အထွေထွေ အမှုအမှတ် (၁၈/၁၈)ပို့ကုန်သွင်းကုန်ဥပဒေပုဒ်မ ၈/ကျင့် ၅၁၂ အမှုတို့မှ ကွမ်းခြံကုန်း တောင်ဘက်ပိုင်း ရပ်ကွက်နေသူ တရားခံပြေး လင်းထွဋ်ဝင်း(၂၁)နှစ်သည်
တစ်ရပ်ကွက်တည်းနေ အသိဖြစ်သူ ဒေါ်စန်းအေး(၄၅)နှစ် နေအိမ်၌ရောက်ရှိနေကြောင်း သတင်းရရှိသဖြင့် ဇွန် ၁၆ ရက် မွန်းလွဲ ၂ နာရီ ၁၀ မိနစ်အချိန်တွင် ကွမ်းခြံကုန်းမြို့မရဲစခန်းမှ တပ်ဖွဲ့ဝင်များက သွားရောက်ဖမ်းဆီးခဲ့သည်။
ထိုသို့ ဖမ်းဆီးစဉ် လင်းထွဋ်ဝင်းနှင့် ၎င်း၏အစ်ကို
ကိုနိုင်(ခ)နိုင်မျိုးအောင်(၂၄)နှစ်တို့က ရဲတပ်ဖွဲ့ ဝင်များကိုဆဲဆိုကာပြန်လည်ခုခံ တိုက်ခိုက်သဖြင့် လုံးထွေးဖမ်းဆီးခဲ့ရပြီး ရဲတပ်ဖွဲ့ဝင်(၃)ဦးတွင် ဒဏ်ရာများရရှိခဲ့သောကြောင့် လင်းထွဋ်ဝင်းနှင့်
ကိုနိုင်(ခ)နိုင်မျိုးအောင် တို့(၂)ဦးကို အရေးယူပေးရန် တိုင်ကြားခဲ့သည်။
ကွမ်းခြံကုန်းမြို့မရဲစခန်းက(ပ)၂၈၆/၁၈၊ ရာဇသတ်ကြီးပုဒ်မ ၃၃၂/၂၉၄ အရအရေးယူထားသည်။
