အမေရိကန်ပြည်ထောင်စု တက္ကဆက်ပြည်နယ်တောင်ပိုင်းတွင် နယ်ခြားစောင့်ရဲတပ်ဖွဲ့က လိုက်လံဖမ်းဆီး၍ မောင်းနှင်ထွက်ပြေးခဲ့သည့် လူမှောင်ခိုများ၏ကားဟုသံသယရှိဖွယ် အက်စ်ယူဗွီကားတစ်စီးတိမ်းမှောက်ခဲ့၍ ငါးဦးသေဆုံးခဲ့သည်။
ယင်းကားပေါ်တွင် လူ ၁၄ ဦး ပါရှိလာပြီး တစ်နာရီ မိုင် ၁၀ဝ ကျော်နှုန်းဖြင့် ဇွန် ၁၇ ရက်က တက္ကဆက်အဝေးပြေးလမ်း ၈၅ ပေါ်တွင် မောင်းနှင်ထွက်ပြေးရာမှ တိမ်းမှောက်ခဲ့ခြင်းဖြစ်ကြောင်း ရဲများကပြောဆိုသည်။ ယင်းအက်စ်ယူဗွီကားနှင့်အတူ အခြားကားနှစ်စီးလည်း လိုက်ပါခဲ့ကြောင်း နယ်ခြားစောင့်ရဲတပ်ဖွဲ့က ဇွန် ၁၇ ရက်ညက ထုတ်ပြန်ခဲ့သည်။
လူမှောင်ခိုမှုသံသယရှိ ကားသုံးစီးအနက် ယင်းကားနှစ်စီးကိုမူ ရဲများက နှစ်နေရာတွင် အသီးသီးရပ်တန့်နိုင်စေခဲ့ကာ ကားပေါ်ပါသူများကို ဖမ်းဆီးနိုင်ခဲ့ကြောင်းလည်း ထုတ်ပြန်ခဲ့သည်။ ယင်းဒေသသည် မက္ကဆီကိုနယ်စပ်အနီးတွင် တည်ရှိသည်။
ဆေးရုံတင်ထားရသည့် အက်စ်ယူ ဗွီယာဉ်မောင်းနှင့် ခရီးသည်တစ်ဦးတို့သည် အမေရိကန်နိုင်ငံသားများ ဖြစ်ကြသော်လည်း ကျန်သူများသည် တရားမဝင် ဝင်ရောက်လာသူများဟု ယုံကြည်ရသည်။ ဒဏ်ရာရရှိသူအချို့ကို အရှေ့မြောက်ဘက် မိုင် ၉၀ အကွာရှိ ဆန်အန်တိုနီယိုသို့ ရဟတ်ယာဉ်ဖြင့် ပို့ဆောင်ခဲ့သည်။ ယာဉ်တိမ်းမှောက်မှုတွင် အသက်ဆုံးရှုံးခဲ့ရသူများ၏မိသားစုများအတွက် အလေးအနက်စာနာမှုကို ဖော်ပြ သည့်ထုတ်ပြန်ချက်ကို နယ်ခြားစောင့်ရဲတပ်ဖွဲ့က ထုတ်ပြန်ခဲ့သည်။
