ဇွန်လ၂၁ရက်နေ့ ညနေ ၃နာရီ အချိန်ခန့်က ဘားအံမြို့နယ်၊ ထောင်ကလပ်ကျေးရွာအုပ်စု၊ ကမော့ညော(ထူးဂုဏ်)ကျေးရွာတွင် ဓါးခုတ်မှုဖြစ်ပွားကြောင်းသတင်းအရ သွားရောက်စစ်ဆေးခဲ့သည်။

စစ်ဆေးချက်အရ ဓါးဖြင့်အခုတ်ခံရသူမှာ မျိုးသူ(ခ)ပန်းကြီး(၂၈နှစ်)ဖြစ်ကြောင်းသိရပြီး လည်ပင်းဇတ်ပိုးတွင် ပြတ်ရှဒဏ်ရာဖြင့် နေအိမ်အတွင်း လဲကျသေဆုံးနေသည်ကို အိန္ဒုနယ်မြေရဲစခန်းမှူး ရဲအုပ်မင်းအောင်ထွန်းနှင့်အဖွဲ့က စစ်ဆေးတွေ့ရှိခဲ့သည်။

အမှုနှင့်ပတ်သက်၍ စုံစမ်းချက်များအရ နံနက် ၈ နာရီခန့်တွင် သေဆုံးသူနှင့် တစ်ရွာတည်းနေ နိုင်ဝင်း(ခ)နိုင်ကြီး(၃၅နှစ်)တို့ တောင်ဝိုင်းတောင်သို့ မျှစ်အတူချိုးရန် သွားရောက် ခဲ့ပြီး မွန်းလွဲ ၁နာရီခန့်တွင် ပြန်လည်ရောက်ရှိခဲ့ကြသည်။

ထိုသို့ပြန်လာစဉ် နိုင်ဝင်း(ခ)နိုင်ကြီး၏ နေအိမ်တွင် အရက်သောက်ထမင်းအတူစားခဲ့ပြီး နောက် စကားအချေအတင်ပြောဆိုရာမှ စကားများခဲ့ကြပြီး နိုင်ဝင်း (ခ)နိုင်ကြီးက အနီးရှိ အရှည် နှစ်ပေခွဲခန့်အရှည်ရှိသောဓါးရှည်ဖြင့် မျိုးသူ(ခ)ပန်းကြီး၏ လည်ပင်း ဇတ်ပိုးကို ခုတ်ပိုင်းခဲ့ခြင်းဖြစ်ကြောင်း ၊ အခင်းဖြစ်ပွားပြီးနောက် နိုင်ဝင်း (ခ)နိုင်ကြီးမှာ ထွက်ပြေးတိမ်းရှောင်သွားခြင်းမရှိဘဲ သက်ဆိုင်ရာ မှလာရောက် စစ်ဆေးစဉ် ကိုယ်တိုင်အဖမ်းခံခဲ့ကြောင်းသိရသည်။

အမှုနှင့်ပတ်သက်၍ နိုင်ဝင်း(ခ)နိုင်ကြီးကို အိန္ဒုနယ်မြေရဲစခန်းက ရာဇသတ်ကြီးဥပဒေပုဒ်မ ၃၀၂ အရ အမှုဖွင့် အရေးယူထားကြောင်းသိရသည်။