ဇွန် ၂၁ ရက်နေ့ ညနေ့ ၅ နာရီ ရှမ်းပြည်နယ်မြောက်ပိုင်းကွတ်ခိုင်မှ မန္တလေးသို့ ယာဉ်မောင်း ခင်မောင်သိန်း(ခ)မော်ကြီး မောင်းနှင်သည့် "စုပေါင်းလားရှိုး" ယာဉ်ငယ် အသင်းအမည်ပါ Wingroad မော်တောယာဉ်ကို သတင်းအရ ၂၄ မူးယစ်တပ်ဖွဲ့စု ၂၄ အဖွဲ့ဝင်များနှင့် စရဖ (နောင်ချို)အထူးတပ်ဖွဲ့များပါဝင်သည့်ပူးပေါင်းအဖွဲ့က နောင်ချိုမြို့အဝင် အိုရီယမ်တယ်ဟိုင်းဝေး တိုးဂိတ်အနီး တားဆီးစစ်ဆေးခဲ့သည်။

မော်တော်ယာဉ်ပေါ်တွင် မိုးညှင်းမြို့နေ မြင့်သူ၊  အေးဆိုင်မွန်း(ခ)သီရိခိုင် တို့ ၂ ဦးကို တွေ့ရပြီး ယာဉ်အမိုးပေါ်တွင် ၄င်းတို့၏ ပစ္စည်းများ ဟုဆိုသည့်  ပလက်စတစ်ကော်ပုံများကို ဖွင့်ဖောက်စစ်ဆေးခဲ့သည်။

ပုံးအတွင်း အဝါရောင်တိတ်/အနက်ရောင်ကျွတ်ကျွတ်အိတ်တို့ဖြင့် ပတ်ထားသည့် ဘိန်းဖြူဆပ်ပြာခွက်(တစ်ခွက်လျှင် ၁၁ ဂရမ်ပါ) စုစုပေါင်း ၆၆၀ ခွက် ၊ 88နဲ့ 1 စာတန်းတစ်ဘက်စီပါ စိတ်ကြွရူူးသွပ်ဆေးပြား ၃၇၈၀၀၀ ပြား တို့ကို တွေ့ရှိခဲ့သည်။

မူးယစ်ဆေးဝါးနဲ့အတူ ဖမ်းဆီးရမိခဲ့သည့် မြင့်သူ နှင့် အေးဆိုင်မွန်း(ခ)သီရိခိုင် တို့ ကို စစ်ဆေးချက်အရ ယခုနှစ် ဇွန်လ  ၁၇ ရက်နေ့တွင် ယခင်ကခင်မင်ခဲ့ဖူးသူ ကချင်ပြည်နယ်ဟိုပင်မြို့နေ ဒေါ်နှင်းရီ က ဖုန်းဖြင့်ဆက်သွယ်ကာ မူးယစ်ဆေးဝါးများ မန္တလေး သို့ ပို့ဆောင်ပေးပါက သယ်/ပို့ခ သိန်း ၁၂၀ ပေးမည်ဟုပြောဆိုခဲ့ကြောင်းဆိုသည်။ 

 ဇွန် ၁၉ ရက်နေ့တွင် မိုးညှင်းမြို့မှတစ်ဆင့်  မန္တလေးမြို့သို့ ထွက်ခွာလာခဲ့ကြောင်း၊ ဇွန် ၂၁ ရက်နေ့တွင် ကွတ်ခိုင်မြို့သို့ ရောက်ခဲ့ပြီး  ဇွန် ၂၁ ရက်နေ့ တွင် ဒေါ်နှင်းရီ က ဖုန်းဖြင့် ဆက်သွယ် ခဲ့ပြီး နောက်ရှမ်း/တရုတ် အမျိုးသား ၂ ဦး (စီစစ်ဆဲ) တို့က AD Van ခဲရောင်ယာဉ်ဖြင့် ရောက်လာပြီး ခရီးဆောင် ဆာလာအိတ် ၄ အိတ် ပလပ်စတစ်ရောင်စုံ ၄ ပုံး တို့ကို ပေးခဲ့ကြောင်းဆိုသည်။ 

အဆိုပါပစ္စည်းများကို "စုပေါင်းလားရှိူး" အသင်းမှ ယာဉ်ငယ်ကို ငှားရမ်းပြီး မန္တလေးမြို့ "ကြယ်သုံးပွင့်" ဟိုတယ်ကို ပို့ဆောင်ရန် ထွက်လာစဉ်ဖမ်းဆီးခံရကြောင်းထွက်ဆိုခဲ့သည်။

နောင်ချိုမြို့မရဲစခန်းက မယ(ပ) ၄၁/၁၈ မူး/စိတ်ပုဒ်မ ၁၉(က) ၂၀/၂၁ အရ အမှုဖွင့် အရေးယူထားသည်။

သက်ဆိုင်ရာက ဖမ်းဆီးရမိသည့် မူးယစ်ဆေးဝါး များ၏ ကာလတန်ဖိုးမှာ ကျပ် ၈၉၃၉၄၀,၀ ဖိုးခန့် ရှိပြီး မူးယစ်ဆေးဝါးများကို သယ်ဆောင်ခိုင်းသူ မနှင်းရီ ကို အဆိုပါနေ့ ည ၈ နာရီ ခန်တွင် မူးယစ်တပ်ဖွဲ့စု(၃)မိုးညှင်းမှ ဟိုပင်မြို့၊ မြသီတာရပ်ကွက်တွင် ဆက်လက်ဖမ်းဆီးခဲ့သည်။