သြဂုတ် ၁၈ ရက် ညပိုင်းတွင် မန္တလေးမြို့ မဟာမြတ်မုနိဘုရားကြီးရှိ ဘုရားဘဏ္ဍာပစ္စည်းများ သိမ်းဆည်းသည့်အခန်းအတွင်းမှ ငွေနှင့်ရွှေဆိုင်း ၅၆ သိန်းဖိုး ခိုးယူခံရမှု ဖြစ်ပွားခဲ့ကြောင်း ချမ်းမြသာစည်မြို့မရဲစခန်းမှ သိရသည်။
'' ငွေနဲ့ရွှေဆိုင်း ၅၆ သိန်းဖိုးအခိုးခံရတယ်လို့ ကျွန်တော်တို့ ကြားရတယ်။ သက်ဆိုင်ရာက စုံစမ်းစစ်ဆေးမှုတွေလုပ်နေတယ်။ တိတိကျကျတော့ ပြောလို့မရသေးဘူး။ စီစီတီဗီမှတ်တမ်းတွေရှိတဲ့ အတွက် အမှုအမြန်ဆုံးပေါ်ပေါက်မှာပါ"ဟု ချမ်းမြသာစည်မြို့နယ် တိုင်းဒေသကြီးအမှတ် ၂ လွတ်တော်ကိုယ်စားလှယ် ဦးမြင့်အောင်မိုးက ပြောသည်။ မဟာမြတ်မုနိဘုရားကြီးရှေ့တော်တွင်ထားရှိသည့် အလှူခံပုံး၏မှန်ကို ခွဲ၍ အတွင်းရှိ ရွှေဆိုင်း များ (တန်ဖိုး ၆ သိန်းခန့်)နှင့် အလှူငွေများ(ခန့်မှန်း သိန်း ၅၀ခန့်) စုစုပေါင်းတန်ဖိုး ခန့်မှန်း ၅၆သိန်း ကျော်ခန့်ကို ဖောက်ထွင်းခိုးယူခံရခြင်းဖြစ်ကြောင်း သိရသည်။
" ခေါင်မိုးသွပ်ကို လှန်ပြီး မျက်နှာကြက်ကိုဖော်ပြီး ဝင်ခိုးသွားတယ်။ မနက်ကမှသိကြတယ်။ ဂေါပကရုံးခန်းနဲ့ ကပ်နေတဲ့ ဘုရားဘဏ္ဍာပစ္စည်းတွေသိမ်းဆည်းထားတဲ့ အခန်းပါ"ဟု ချမ်းမြသာစည်မြို့နယ် ဘုရားကြီး အရှေ့ဘက်နေ ကိုအောင်ဝင်းခိုင်က ပြောသည်။
" လောလောဆယ် စုံစမ်းစစ်ဆေးနေတုန်းပါပဲ။ ဘာမှမလုပ်ရသေးပါဘူး" ဟု ချမ်းမြသာစည်မြို့မရဲစခန်းမှ တာဝန်ကျ ရဲအရာရှိတစ်ဦးက ပြောသည်။
