အသတ်ခံရသူသည် ကံလှအုပ်စု ရွှေစုကျေးရွာနေ မစုရည်ဖြိုး(ခ)မဘုတ်မဖြစ်ပြီး သတ်ပြီးထွက်ပြေး တိမ်းရှောင်သူမှာ ၎င်း၏ခင်ပွန်းဟောင်း အောင်စိုး(ခ)မောင်စိုး (၄၇ နှစ်)ဖြစ်ကြောင်း သိရသည်။
ဖြစ်စဉ်မှာ သြဂုတ် ၂၇ ရက်နေ့ နံနက် ၈ နာရီ အချိန်ခန့်တွင် နေပြည်တော် တပ်ကုန်းမြို့  ရှောက်ကုန်းလမ်းခွဲ တောင်ဘက် နွယ်ရစ်ဆီဆိုင်အနီးတွင် ရှေ့နေ မစုရည်ဖြိုး က ဆိုင်ကယ်မောင်းလာစဉ် ခင်ပွန်းဟောင်းဖြစ်သူ အောင်စိုးကို တွေ့ရှိသောကြောင့် ဆိုင်ကယ်ကိုရပ်ခဲ့ကြောင်း၊ထို့နောက်၎င်းတို့နှစ်ဦးစကားများခဲ့ပြီး အောင်စိုးက လွယ်အိတ်အတွင်းပါသည့် ဓားမြောင်ဖြင့် မစုရည်ဖြိုး လည်ပင်းကိုလှီးဖြတ်ကာ ထွက်ပြေးတိမ်းရှောင်ခဲ့ခြင်းဖြစ်ကြောင်း သိရသည်။
၎င်းတို့နှစ်ဦးသည် ပျော်ဖွယ်မြို့နယ် တရားရုံးတွင် တရားဝင်ကွာရှင်းထားပြီးဖြစ်ကာ မစုရည်ဖြိုးက ကွာရှင်းခွင့်ရရန်တရားရုံးသို့လျှောက်ထားခဲ့သည့်ကိစ္စနှင့်ပတ်သက်၍ အောင်စိုးကမကျေနပ်သောကြောင့် ရန်ရှာခဲ့ဖူးကြောင်းလည်း သိရသည်။
 တပ်ကုန်းမြို့မရဲစခန်းက(ပ)၂၁၈/၂၀၁၈၊ ရာဇသတ်ကြီး ပုဒ်မ ၃၀၂ အရ အမှုဖွင့်အရေးယူစုံစမ်းခဲ့သည်။ 
၄င်းကို တွေ့ရှိပါကသတင်းပေးရန် နေပြည်တော်ရဲတပ်ဖွဲ့က သြဂုတ် ၂၈ ရက်နေ့တွင် ထုတ်ပြန်ခဲ့သည်။ တပ်ကုန်းမြို့မရဲစခန်းမှူး ဒုရဲမှူး ဇော်မျိုးဝင်းနှင့်အဖွဲ့က အမှုမှတိမ်းရှောင်နေသူ၏ ညီဖြစ်သူနှင့် တွေ့ ဆုံခဲ့ပြီး ၄င်းတို့ ဆက်သွယ်ခဲ့သည့်ဖုန်းနံပါတ်မှတစ်ဆင့် အောင်စိုးကို ဆက်သွယ်ကာ ဥပဒေဘောင်အတွင်းမှ ရင်ဆိုင်ဖြေရှင်းရန် စည်းရုံးသိမ်းသွင်းပြောဆိုခဲ့ပြီးနောက် တပ်ကုန်းမြို့မရဲစခန်းသို့ လာရောက် အဖမ်းခံခဲ့ခြင်းဖြစ်ကြောင်း သိရသည်။