ဖောင်းပြင်မြို့နယ်၊မန်သဲအုပ်စု၊ကုန်းကြီးကျေးရွာ ဆုတောင်းပြည့်စေတီမှ စိန်ဖူးတော်ခိုးယူသူနှစ်ဦးကို သက်ဆိုင်ရာက အောက်တိုဘာ ၂၃ ရက်တွင် ဖမ်းဆီးရမိခဲ့သည်။
အောက်တိုဘာ ၂၂ ရက် ညနေ ၅ နာရီအချိန်ခန်တွင် မော်လိုက်ခရိုင် ဖောင်းပြင်မြို့နယ်၊မန်သဲအုပ်စု၊ကုန်းကြီးကျေးရာရှိ ဉာဏ်တော်(၁၈) တောင်ရှိ လိုတရပြည်လုံးချမ်းသာ လေးမျက်နှာဘုရားစိန်ဖူးတော်ခိုးယူခံကြောင်း ရွာဂေါပကအဖွဲ့က ကျေးရွာ တာဝန်ခံထံအကြောင်းကြားသဖြင့် သွားရောက်စစ်ဆေးခဲ့သည်။
စုံစမ်းချက်အရ အောက်တိုဘာ ၂၀ ရက် ညနေ ၆ နာရီအချိန်ခန့်တွင်ဓာတ်မီးရောင်မြင်ရကြောင်း ကုန်းကြီးကျောင်းထိုင်ဆရာတော်ထံလျှောက်ထားပြီး စစ်ဆေးရာ ဘုရားစိန်ဖူးတော်ခိုးယူခံရကြောင်း အောက်တိုဘာ ၂၂ ရက် မွန်းလွဲ ၃ နာရီအချိန်တွင် သိရှိခဲ့သည်။
ကျေးရွာဂေါပကအဖွဲ့များက ဆုတောင်းပြည့်စေတီအား စစ်ဆေးခဲ့ရာဘုရားရင်ပြင်တော်တောင်ဘက်ထောင့်မှ စိန်ဖူးတော်ထည့်သည့်ကြုတ်တစ်စုံ၊ဖန်စိန်ဖူးတော်အကျိုးတစ်ခု၊ဖန်စိန်ဖူးတော်အပဲ့တစ်ခု၊ ဉာဏ်တော်၃ လက်မနှင့် ၁ ဒသမ ၂ လက်မရှိ ကြေးဆင်းတုတော်နှစ်ဆူ၊သံဖြင့်ပြုလုပ်ထားသောပလ္လင်အသေးတစ်ခုနှင့် ပလ္လင်အမှီအကျိုးတစ်ခု၊ရွှေရောင်သွပ်ပြားဖြင့်ရေးသားထားသောဘုရားသမိုင်းစာပါတစ်ချပ်၊စိန်ဖူးတော်ထည့်သည့်ကြုတ်မှ ကွာကျနေသည့်ရောင်စုံဖန်ကျောက်ကိုးလုံးတို့ကိုတွေ့ရှိရ၍သိမ်းဆည်းထားခဲ့သည်။
ထို့နောက် စိန်ဖူးတော်ထည့်သည့်ကြုတ်အတွင်းမှ တန်ဖိုးကြီးပစ္စည်းများပျောက်ဆုံး နေပြီးမည်သည့်ပစ္စည်းများပျောက်ဆုံးနေသည်ကိုမသိရှိရကြောင်းဆိုကာ သက်ဆိုင်ရာရဲတပ်ဖွဲ့သို့ တိုင်ကြားခဲ့သည်။
ဖောင်းပြင်မြို့မရဲစခန်က (ပ)၁၀၃/၁၈ ရာဇသတ်ကြီးဥပဒေပုဒ်မ ၃၇၉/၂၉၅ အရအမှုဖွင့် ကာမြို့နယ်ရဲတပ်ဖွဲ့မှူး ရဲမှူးခင်မောင်ဦးစီး၍ မိုင်းချောင်းရဲကင်းမှရဲတပ်ဖွဲ့ဝင်များက အသေးစိတ်စုံစမ်းဖော်ထုတ်ခဲ့ရာ အမှုဖြင့် မသင်္ကာသူကုန်းကြီးရွာနေ အောင်ကြည်မြင့်(၂၇)နှစ်ကိုဖမ်ဆီးစစ်ဆေးခဲ့သည်။
၎င်းသည် ယခင်ဘုရားတည်စဉ်ကကျောင်းထိုင်သီတင်းသုံးနေထိုင်သွားသူဖြစ်ပြီး ယခုလူဝတ်ဖြင့် နေထိုင်ဖြစ်ပြီး စိန်ဖူးကို မောင်မြင့်(၂၈)နှစ်နှင့် အတူခိုးယူခဲ့ကြောင်း ပေါ်ပေါက်သဖြင့် မောင့်မြင့်ကို ၎င်း၏နေအိမ်မှ ဆက်လက်ဖမ်းဆီးခဲ့သည်။
၄င်းတို့နှစ်ဦးကိုဆက်လက်စစ်ဆေးရာ စိန်ဖူးတော်ကြုတ်အတွင်းမှကျောက်မျိုးစုံအား ဘိုင်းလယ်ရွာ လမ်းဆုံရှိလမ်းယာဘက်ချုံပုတ်အတွင်း၌ အောင်ကြည်မြင့်က ဝှက်ထားကြောင်း၊ကြုတ်အတွင်းမှရွှေရည်ကြိုခဲ(၁၈)ရွေးခန့်အား မောင်မြင့်က မိုင်းချောင်းရွာရွှေပန်းတိမ်ဆိုင်တွင်၁၃၆၀ဝ၀ ကျပ်ဖြင့်ရောင်းချပြီး နှစ်ဦးခွဲဝေယူခဲ့ကြောင်းစစ်ဆေး ပေါ်ပေါက်ခဲ့သဖြင့် လမ်းဆုံတွင်ဝှက်ထားသောကျောက်များကို သက်သေများရှေတွင်သိမ်းဆည်းခဲ့ပြီးရွှေထည်ပစ္စည်းများကို သိမ်းဆည်းရမိနိုင်ရေးဆက်လက်ဆောင်ရွက်ထားကြောင်းသိရသည်။
