ရှမ်းပြည်နယ်တောင်ပိုင်း ရွှေညောင်မြို့တွင် ကွန်ပျူတာဖြင့်ပြုလုပ်ထားသည့် ငါးထောင်ကျပ်တန်ငွေစက္ကူအတုဖြင့် ဈေးဝယ်သူအမျိုးသားနှစ်ဦးနှင့် အတုပြုလုပ်သူ တစ်ဦးအား အောက်တိုဘာ ၂၄ ရက်က ဖမ်းဆီးရမိခဲ့ကြောင်း သိရသည်။
အဆိုပါနေ့ မွန်းလွဲ ၂နာရီခွဲအချိန်တွင် ရွှေညောင်မြို့ရွှေဘုံသာရပ်ကွက်နယ်မြေ (၁)ကုန်စုံဆိုင်တွင် မသင်္ကာသူလူနှစ်ဦးက ဈေးဝယ်ရာတွင် အတုဟုယူဆရသည့် ငါးထောင်ကျပ်တန်ဖြင့် ဝယ်ယူခဲ့ကြောင်း သတင်းရရှိခဲ့သည်။
အဆိုပါငွေစက္ကူကို ရွှေညောင်နယ်မြေရဲစခန်းသို့ အပ်နှံစစ်ဆေးရာ ငွေအတုဖြစ်နေကြောင်း သိရသဖြင့် ရွှေညောင်နယ်မြေနယ်ထိန်းခေါင်းဆောင် ဒုရဲအုပ်ညီညီပိုင်မွှန်း ဦးစီးသည့်အဖွဲ့က သက်သေများနှင့်အတူ မသင်္ကာသူနှစ်ဦး ဖြစ်သည့် ရွှေဘုံသာရပ်ကွက် နယ်မြေ (၁)ခွာညိုလမ်းမတွင်နေထိုင်သူ ကျော်သူ (ခ)အီစွတ် ၁၉ နှစ် မိုးမြင့်မြတ် (ခ)ဂြိုလ်သား ၁၇ နှစ် တို့ကိုဖမ်းဆီးစစ်ဆေးခဲ့သည်။
၎င်းတို့ကို စစ်ဆေးခဲ့ရာ ကျော်သူ (ခ)အီစွတ်၏ အနက်ရောင်ပိတ်ဆံအိတ်အတွင်းမှ ငါးထောင်ကျပ်တန်ငွေစက္ကူ အတု ငါးရွက်အား တွေ့ရှိ သိမ်းဆည်းရမိခဲ့ပြီး ယင်းငွေစက္ကူအတုများကို ရွှေညောင်မြို့ ဓနသိဒ္ဓိရပ်ကွက် နယ်မြေ (၁)ရတနာလမ်းရှိ ကွန်ပျူတာ မိတ္တူနှင့် စာစီစာရိုက်လုပ်ငန်း လုပ်ကိုင်သူ မင်းထက်ကိုကိုထံမှ ရ ရှိကြောင်း ထွက်ဆိုခဲ့သည်။
ထို့ကြောင့် သက်ဆိုင်ရာက အဆိုပါ ဆိုင်အား ဆက်လက်စစ်ဆေးရာ ဆိုင်ခန်းအတွင်းမှ DELL တံဆိတ်ပါနက်ပြာ ကွန်ပျူတာလက်တော့ (၁)လုံး ကွန်ပျူတာသုံးကြိုး(၁) ချောင်း၊ Epson 1210 ဆေးဗူး (၄) ဗူးပါ ကာလာပရင်၁ လုံး ကာလာပရင်တာကြိုး ၁ ချောင်း၊ A4 စာရွက်ပေါ်တွင် တစ်သောင်းတန်ငွေစက္ကူ ပြုလုပ်ဆဲ (၄) ပုံနှင့် ၎င်း စာရွက်နောက်ကျောဘက်တွင် တစ်သောင်းတန်ငွေစက္ကူပြုလုပ်ဆဲ ( ၂) ပုံနှင့် ငွေစက္ကူအတုများဖြတ်ညှပ်သည်ဟု ယူဆရသည့် အပြာရောင်ကပ်ကျေး တစ်ချောင်း တို့ကို ရှာဖွေတွေ့ရှိ၍ မင်းထက်ကိုကိုအား ဖမ်းဆီးကာ ဆက်လက်စစ်ဆေးလျက်ရှိသည်။
