အင်းတော်ကြီးမြို့ ရွှေမဥ္ဇူဘုရားစျေးတန်းတွင် စကားများရန်ဖြစ်စဉ် စက်လှေမောင်းသူကိုဓားဖြင့်ထိုးသတ်ခဲ့သူ လူငယ်( ၃ )ဦးကို သက်ဆိုင်ရာကအောက်တိုဘာ ၂၆ ရက်တွင် ဖမ်းဆီးအရေးယူခဲ့သည်။
အောက်တိုဘာလ၂၄ရက် ည ၁၁နာရီ၄၅အချိန်တွင် လွဲမွန်ကျေးရွာအုပ်စု နန့်ပတဲကျေးရွာရွှေမဥ္ဇူဘုရားစျေးတန်း၌ စက်လှေမောင်းသမားတစ်ဦးနှင့်လူငယ်( ၃ )ဦးတို့စကားများရန်ဖြစ်ရာမှ လွဲမွန်ကျေးရွာနေ စက်လှေမောင်းသမား အသက် ၂၃ နှစ် အရွယ် နှင်းဝေအောင်ကို ဓားဖြင့်ထိုးခံရပြီး ဆေးရုံသို့တင်ပို့ကုသစဉ် သေဆုံးခဲ့သည်။
သက်ဆိုင်ရာက စစ်ဆေးခဲ့ရာ ၎င်း ၏ဦးခေါင်းညာဘက်ချိုစောင်းတွင် (၂)လက်မခန့်ပြတ်ရှဒဏ်ရာ(၁)ချက်၊ ဦးခေါင်းအလယ်တွင် (၂)လက်မခန့်ပြတ်ရှဒဏ်ရာ(၁)ချက်ဝမ်းဗိုက်၏ညာဘက်ဘေးတွင်ထိုးသွင်းဒစ်ရာ(၁)ချက် ၊ ဝမ်းဗိုက်၏ညာဘက်ရင်ညွှန့်ကြားတွင်ထိုးသွင်းဒဏ်ရာ(၁)ချက်တို့ရရှိထားကြောင်း ပေါ်ပေါက်ခဲ့သည်။
တုံနယ်မြေရဲစခန်းက (ပ)၄၃ /၁၈ ရာဇသတ်ကြီးပုဒ်မ -၃၀၂ အရ အမှုဖွင့်အရေးယူခဲ့သည်။
ဓားဖြင့်ထိုးခဲ့သည်ဆိုသူ လူငယ် ၃ ဦး ကို သက်ဆိုင်ရာက စုံစမ်းစစ်ဆေးခဲ့ရာ ရွှေအင်းသာရပ်ကွက်နေ နေလင်းထွန်း(ခ)ဖိုးလပြည့် ၂၀ နှစ် တောင်တန်းသာရပ်ကွက်နေ သားဇော်ကို(ခ)စိုင်းအောင် ၁၈ နှစ် ၊ ရွှေအင်းသာရပ်ကွက်နေ သန်းဇော်ထိုက်(ခ)သားလေး ၂၀ နှစ်တို့ ဖြစ်ကြောင်း သိရသဖြင့် ၎င်းတို့ကိုဖမ်းဆီးခဲ့ခြင်း ဖြစ်သည်။
