မန္တလေးတိုင်းဒေသကြီး၊ ပုသိမ်ကြီးမြို့နယ်၊ (၁၆)မိုင် ကျောက်ချောစစ်ဆေးရေးစခန်းတွင် ခရီးသည်တင် ယာဉ်ပေါ်လိုက်ပါသူထံမှ ကျပ်သိန်း ၁၀ဝ၀ ကျော်တန်ဖိုးရှိ စိတ်ကြွဆေးနှင့် ဘိန်းဖြူများကို သက်ဆိုင်ရာက အောက်တိုဘာ ၂၆ ရက်တွင် သိမ်းဆည်းရမိခဲ့သည်။
အဆိုပါနေ့ နံနက် ၄ နာရီ အချိန်ခန့်တွင် (၁၆)မိုင် ကျောက်ချောစစ်ဆေးရေးစခန်း၌ မူးယစ်ဆေးဝါးတားဆီးနှိမ်နင်းရေးရဲတပ်ဖွဲ့စု(၁၇) မှတပ်ဖွဲ့ဝင်များနှင့်ပူးပေါင်းအဖွဲ့ဝင်များသည်
သတင်းအရ ယာဉ်များကို ရှာဖွေစစ်ဆေးစဉ် မူဆယ်မှ မန္တလေးဘက်သို့ မောင်းနှင်လာသည့် ခရီးသည်တင် ယာဉ်ကို ရှာဖွေစဉ် ယာဉ်၏ဝမ်းဗိုက်ခန်း အတွင်းမှ ပစ္စည်းများအား ယူဆောင် စစ်ဆေးခဲ့သည်။ အဆိုပါပစ္စည်းများအနက် ယာဉ်ပေါ်တွင် စီးနင်းလိုက်ပါလာသည့် လွယ်ခန်ကျေးရွာ၊ ကွတ်ခိုင်မြို့နယ်နေ နော်ဘောက် ၄၉ နှစ်ယူဆောင်လာသည့် အဖြူရောင်ဆာလာအိတ်အတွင်းမှ တံဆိပ်မပါ ပန်းရောင်စိတ်ကြွရူးသွပ်ဆေးပြား ၁၂ဝဝဝ ပြား (ဒေသကာလပေါက် ဈေးတန်ဖိုးငွေကျပ် ၆ဝဝ သိန်းခန့်)၊ ဘိန်းဖြူမှုန့်ဆပ်ပြာခွက် ၁ ခွက်လျှင် ၁၂ ဂရမ်ခန့်စီပါ ဆပ်ပြာခွက် ၅၅ ခွက်၊ စုစုပေါင်းအလေးချိန် ၆၆ဝ ဂရမ်ခန့် (ဒေသကာလပေါက်ဈေးတန်ဖိုးငွေကျပ် ၄၆၂ သိန်းခန့်)နှင့် လက်ကိုင်ဖုန်း ၁ လုံးတို့အား တွေ့ရှိသိမ်းဆည်းရမိခဲ့ ခြင်းဖြစ်သည်။
အုန်းချောနယ်မြေရဲစခန်း မယ(ပ) ၈၄/၁၈၊ မူးယစ်ဆေးဝါးနှင့် စိတ်ကိုပြောင်းလဲစေသော ဆေးဝါးများဆိုင်ရာ ဥပဒေပုဒ်မ ၁၉(က)/၂၁ အရအမှုဖွင့် အရေးယူထားသည်။
