တရုတ်ငွေယွမ် ၅ သောင်းဖြင့် တရုတ်ညီအစ်ကိုနှစ်ဦးထံ လိမ်လည်ရောင်းစားခံရသူ ကိုယ်ဝန်သည်အမျိုးသမီးနှင့် ကချင်တိုင်းရင်းသူအမျိုးသမီးတစ်ဦးတို့ကို လူကုန်ကူးမှုတားဆီး ကာကွယ်ရေးအဖွဲ့(၂)က နိုဝင်ဘာလ ၆ ရက်တွင်ကယ်တင်နိုင်ခဲ့ကြောင်းသိရသည်။
အဆိုပါနေ့ မွန်းလွဲ ၁ နာရီ အချိန်ခန့်တွင်ကချင်ပြည်နယ် လွယ်ဂျယ်မြို့ လူကုန်ကူးမှုတားဆီး ကာကွယ်ရေး(၂)ထံသို့ တရုတ်ရဲတပ်ဖွဲ့က လူကုန်ကူးခံရသူ အမျိုးသမီး ၂ ဦးကို လာရောက် လွှဲပြောင်းခဲ့သည်။
အဆိုပါ ၂ ဦးအနက် ရန်ကုန်တိုင်းဒေသကြီး သန်လျင်မြို့နယ်နေ အသက် (၂၂)နှစ် အရွယ် အမျိုးသမီးမှာ ကိုယ်ဝန်(၆)လ ခန့်ရှိပြီး ကျန်တစ်ဦးမှာ ရှမ်းပြည်နယ် ကွတ်ခိုင်မြို့ လွယ်ကန်ကျေးရွာအုပ်စု နေ အသက် ၂၁ နှစ်အရွယ် ကချင်တိုင်းရင်းသူ တို့ ဖြစ်ကြောင်း လူကုန်ကူးမှုတားဆီးကာကွယ်ရေး(၂)ရဲတပ်ဖွဲ့ထံမှ သိရသည်။
၎င်းတို့ ၂ဦးသည် Wechat မှတစ်ဆင့် ယခုနှစ် ဖေဖော်ဝါရီလအတွင်းက မမိမော်(စီစစ်ဆဲ)နှင့် သိရှိခဲ့ပြီး ၎င်းတို့အား တရုတ်နိုင်ငံ အန်ဟွေးပြည်နယ်တွင် အိမ်အကူအလုပ်ရှိသဖြင့်လုပ်ကိုင်လိုပါက တရုတ်ပြည်ဝမ်ထိန်မြို့သို့ ကားဖြင့်လာကြိုကာ ခေါ်ဆောင်မည်ဖြစ်ကြောင်း စည်းရုံးခံခဲ့ရခြင်းဖြစ်သည်။
ထို့နောက် ဇူလိုင်လ ၁၄ ရက်တွင်မမိမော် က ကချင်အမျိုးသမီးထံသို့ ဆက်သွယ်ကာ မိမိမှာတရုတ်နိုင်ငံ၊ ဝမ်ထိန်မြို့၌့ရောက်ရှိနေပြီဖြစ်သောကြောင့် လာတွေ့ဆုံရန်ဆက်သွယ်ခဲ့သည်။
ထို့သို့ သွားရောက် တွေ့ဆုံခဲ့ရာတွင် ကျန်းဖုန်းမြို့ရှိနေအိမ် တစ်ခုသို့ သို့မမိမော်ကခေါ်ဆောင်သွားခဲ့ပြီး အဆိုပါညနေပိုင်းတွင် ကျန်းဖုန်းမြို့ပန်းခြံ၌ အသက်(၂၈)နှစ်အရွယ်ရှိတရုတ်အမျိုးသားတစ်ဦးနှင့်မိတ်ဆက်ပေးခဲ့သည်။
ထိုတရုတ်အမျိုးသားနှင့်အိမ်ထောင်ပြုပါက ယွမ် ၂၅,၀၀၀ ပေးမည်ဖြစ်ပြီး အန်ဟွေးပြည်နယ်သို့လိုက်သွားရမည်ဖြစ်ကြောင်း ထိုအရပ်၌အဆင်မပြေ၍မနေလု်ိပါက ၎င်းတရုတ်အမျိုးသားကိုကားဖြင့် ပြန်လည်ပို့ဆောင်ခိုင်း၍ရကြောင်း မမိမော်ကစည်းရုံးပြောဆိုခဲ့သောကြောင့် တရုတ်အမျိုးသားနှင့် လိုက်ပါသွားခဲ့သည်။
တရုတ်နိုင်ငံ ဟွေမင်မြို့သို့ရောက်ရှိခဲ့ပြီး ၎င်းကဲ့သို့ တရုတ်အမျိုးသားနှင့်လက်ထပ်ရန်ရောက်ရှိလာသူ သန်လျင်မြို့နေ အမျိုးသမီးနှင့်တွေ့ဆုံခဲ့သည်။
၎င်းတို့နှစ်ဦးကို တရုတ်အမျိုးသားနှစ်ဦးက ကားဖြင့် ၂ အိပ် ၂ ရက်ခန့်တင်ခေါ်ဆောင်ခဲ့ရာ ဇူလိုင် ၁၇ ရက်တွင် အန်းဟွေးပြည်နယ် အမ်းကျင်းမြို့ကလော့ဟယ်ကျေးရွာသို့ရောက်ရှိခဲ့ကြောင်း ၊ ၎င်းတရုတ်အမျိုးသား ညီအစ်အကို၂ ဦးနှင့်၎င်းတို့နှစ်ဦး လက်ထပ် ပေါင်းသင်းပါက ယွမ် ၂၅,၀၀၀ ကို Wechat မှလွဲပေးမည်ဟု မမိမော်ကပြောဆိုခဲ့သည်။
တရုတ်အမျိုးသားညီအစ်ကိုနှစ်ဦးက ဆေးစစ်ရန်ခေါ်ဆောင်သွားစဉ်ဆေးရုံအရောက်တွင် သန်လျင်တွင် နေထိုင်သူ အမျိုးသမီးတွင် ကျန်ခဲ့သည့်၎င်း၏ခင်ပွန်းနှင့်ရရှိသည့် ကိုယ်ဝန်မှာ(၃)လရှိနေပြီဖြစ်ကြောင်း သိရှိသွားခဲ့သောကြောင့် မြန်မာပြည်သို့ ပြန်ချင်ကြောင်း ပြောဆိုခဲ့သော်လည်း လက်မခံသည့်အတွက် တရုတ်ဖုန်းနံပတ်(၁၁၀)သို့ ဆက်သွယ်၍ အကူအညီတောင်းခံခဲ့ကြောင်း ရဲတပ်ဖွဲ့၏မေးမြန်းချက်တွင်ဖော်ပြထားသည်။
ဖုန်းဆက်သည့်နေ့ ၌ တရုတ်ရဲများက မမိမော် ကိုဖမ်းဆီးခေါ်ဆောင်လာသည်ကိုတွေ့ခဲ့ကြောင်း ၎င်းတို့နှစ်ဦးကိုလည်းမေးမြန်းစစ်ဆေးမှုများပြုလုပ်ပြီးနောက်တွင် တရုတ်ရဲများပြန်သွားခဲ့ကြောင်းဆိုသည်။
တရုတ်အမျိုးသားနှစ်ဦးနှင့် ၎င်းတို့ ၃ လခန့်အထိ လင်မယားအဖြစ်ပေါင်းသင်းနေထိုင်ပေးခဲ့ရပြီးနောက် နိုဝင်ဘာလ ၆ ရက်၌ မြန်မာနိုင်ငံ ကချင်ပြည်နယ်၊ လွယ်ဂျယ်မြို့ရှိ လူကုန်ကူးမှုတားဆီး ကာကွယ်ရေးရဲတပ်ဖွဲ့ (၂) ၏ကယ်တင်ခြင်းခံခဲ့ရကြောင်း သိရသည်။
သက်ဆိုင်ရာက ကယ်တင်ခဲ့ပြီး မြန်မာနိုင်ငံသို့ပြန်ရောက်ချိန်တွင် သန်လျင်မြို့နယ်နေသူတွင်ကိုယ်ဝန် ၆လခန့်ရှိနေပြီဖြစ်ကြောင်းသိရသည်။
တရုတ်နိုင်ငံ ချမ်းဆန်ရဲစခန်းတွင် မမိမော်(၃၀)နှစ်ကို ဖမ်းဆီးထိန်းသိမ်းပြီး အဆိုပါလူကုန်ကူးခံရသူ ၂ဦးကို နေရပ်သို့ပြန်လည်ပို့ဆောင်ရန် သက်ဆိုင်ရာက စီစဉ်လျက်ရှိကြောင်း သိရသည်။
