ရှမ်းပြည်နယ်မြောက်ပိုင်း သီပေါမြို့နယ် ပန်မိတ်ကျေးရွာအုပ်စု၊ ကောက်ဟိုင်ရွာ(ဒေသအခေါ် ကွန်ဟိုင်းကျေးရွာ) ကို နိုဝင်ဘာ ၉ရက် နံနက်၅ နာရီ အချိန်ခန့်တွင် မူးယစ်သတင်းအရ သီပေါမြို့နယ်ရဲတပ်ဖွဲ့မှူး ဦးစီးသည့် တပ်ဖွဲ့ဝင်အင်အား ၆၆ ဦးက ရုတ်တရက်ဝင်ရောက်စီးနင်းရှာဖွေခဲ့သည်။
အဆိုပါကျေးရွာနေ အောင်ကျော်မြင့်နှင့် ဇနီး နန်းဖော်တို့၏ နေအိမ်အိပ်ခန်းအတွင်းမှ ထုပ်ပိုးထားသည့် ဘိန်းဖြူ ၆၀ ဒသမ ၂ ဂရမ်နှင့် စိတ်ကြွဆေးပြား ၅၈၂၃၅ ပြား ၊ ရွှေဘီးကုတ် ၁၅ ပဲရည် ၁၂ ပဲသား ခန့်တစ်ခု၊ ကြေးပါကလစ်ဆံညှပ် ၁၅ ပဲရည် ၂ ပဲသား ၅ ရွေးခန့် ၁ ခု၊ ငွေကျပ် ၁၂၈၄၀၀ ကျပ် တို့ကို တွေ့ရှိသိမ်းဆည်းခဲ့သည်။
အလားတူ အိုက်ထွန်း၏ နေအိမ်အတွင်းမှ စိတ်ကြွဆေးပြား ၅၀ ပြား၊ ဘိန်းဖြူ သုည ဒသမ ၆၇၈ ဂရမ်နှင့် မူးယစ်ဆေးဝါးသုံးစွဲရာတွင် အသုံးပြုသည့် ပစ္စည်းများ၊ ငွေကျပ် ၉၉၂၀၀၀၀ နှင့် တူမီးသေနတ် ပြောင်းရှည်တစ်လက်ကို ဆက်လက်သိမ်းဆည်းခဲ့သည်။
ထိုနည်းတူ ဒေါ်နိုင်းအိမ် နှင့် ၎င်း၏ သားဖြစ်သူ စိုင်းကျော်ထွန်း ၏ နေအိမ်အတွင်းမှ စိတ်ကြွဆေးပြား ၈၃၀၅ပြား၊ ၁ကျပ်သားရွှေဆွဲကြိုးတစ်ကုံး၊ ၄ ပဲသား ရွေဆွဲကြိုးတစ်ကုံး ၊ ၁၁ ပဲသား ရွှေလက်ကောက် ၃ ကွင်း၊ ၁၂ ပဲသားရွှေဆွဲကြိုး တစ်ကုံး၊ ၈ ပဲသားလက်စွပ်တစ်ကွင်း၊ ၂ ပဲသား လက်စွပ်တစ်ကွင်း၊ ၁ ပဲသားလက်စွပ်တစ်ကွင်း၊ ၁ ပဲသားနားကပ် တစ်စုံ၊ ၁ပဲ ၄ရွေးခန့်ရှိ လက်စွပ်တစ်ကွင်း၊ ငွေကျပ် ၁၅ သိန်း တို့ကို ဆက်လက်သိမ်းဆည်းခဲ့သည်။
၎င်း နေအိမ် ၃ အိမ်အတွင်းမှ ဘိန်းဖြူနှင့် စိတ်ကြွဆေးပြား (စုစုပေါင်းတန်ဖိုး ကျပ်သိန်း ၁၃၀၀ ကျော်)၊ ငွေကျပ် ၁၁၅ သိန်း နှင့် ရွေထည်ပစ္စည်းများကို သိမ်းဆည်းရမိခဲ့သည်။
အဆိုပါမူးယစ်ဆေးများကို ကွန်ဟိုင်းရွာ နှင့် ကျေးသီး/မိုင်းကိုင် ကျေးရွာ အနီးတို့မှဝယ်ယူခဲ့ကြောင်းစစ်ဆေးပေါ်ပေါက်ခဲ့သည်။
သီပေါရဲစခန်းက မယ(ပ)၃၆/၁၈ မူးယစ်ဆေးဝါးနှင့် စိတ်ကိုပြောင်းလဲစေသော ဆေးဝါးများဆိုင်ရာ ဥပဒေပုဒ်မ ၁၉(က)/၂၀(က)/၂၁ အရလည်းကောင်း ၊မယ(ပ)၃၆/၁၈ မူးယစ်ဆေးဝါးနှင့် စိတ်ကိုပြောင်းလဲစေသော ဆေးဝါးများဆိုင်ရာ ဥပဒေပုဒ်မ ၁၉(က)/၂၀(က)/၂၁ အရလည်းကောင်း၊ မယ(ပ)၃၅/၁၈ မူးယစ်ဆေးဝါးနှင့် စိတ်ကိုပြောင်းလဲစေသော ဆေးဝါးများဆိုင်ရာ ဥပဒေပုဒ်မ ၁၉(က)/၂၀(က)၊ ရှမ်းလက်နက်-၁၂(က) အရလည်းကောင်း၊ မယ(ပ)၃၄/၁၈ မူးယစ်ဆေးဝါးနှင့် စိတ်ကိုပြောင်းလဲစေသော ဆေးဝါးများဆိုင်ရာ ဥပဒေပုဒ်မ ၁၉(က)/၂၀(က)၂၁ အရလည်းကောင်း အသီးသီးအမှုဖွင့်အရေးယူထားသည်။
