သီပေါ မြို့တွင် အုတ်/သဲ ဝယ်ယူရာ မရောင်းသည့်အတွက် ဆိုင်ရှင်တူအရီးကို တူဖြင့်ထုရိုက်ကာ သေနတ်ဖြင့် ပစ်ခတ်ထွက်ပြေးခဲ့သူကို ရဲတပ်ဖွဲ့က နိုဝင်ဘာ ၁၃ ရက်တွင် ဖမ်းဆီးဖော်ထုတ်ခဲ့သည်။
အဆိုပါနေ့ မွန်းလွဲ ၁ နာရီ ခွဲ အချိန် ခန်တွင်သီပေါမြို့၊ စျေးရပ် ကွက်နေ တင်ကိုကို(ခ)အင်တူး ၅ဝနှစ် သည် ပန်းတိမ်မြောက်ရပ်ကွက်နေ အုတ်/သဲ ဝယ်ရေးလုပ်ကိုင်သူ ဒေါ်ခင်ရွှေ၏ နေအိမ်သို့ ရောက်ရှိလာပြီးး အုတ်/သဲ ဝယ်ယူရာ မရောင်းသည့် ကိစ္စနှင့်ပတ်သက်ပြီး ဒေါ်ခင်ရွှေ ကို၉ လက်မခန့်ရှိ သံတူဖြင့် ရိုက်နှက်ခဲ့သည်။
ထိုသို့ရိုက်နှက်သဖြင့် ဒေါ်ခင်ရွှေ၏တူ မောင်မောင်ကျော်ဝင်း(၃၄)နှစ်က သံတူကိုလုံးထွေးလုယူပြီး ပြန်လည်ရိုက်နှက်ခဲ့သည်။
ထို့နောက် တင်ကိုကို(ခ)အင်တူးက ခါးကြားရှိ ပစ္စတိုသေနတ်(စိစစ်ဆဲ)ဖြင့် ပြန်လည်ပစ်ခတ် ရာ ကျည်မထွက်၍ ထွက်ပြေးသွားခဲ့သည်။
ဒေါ်ခင်ရွှေ ၏ ဦးခေါင်း၊ ယာလက် ဖူးရောင်ပေါက်ပြဲဒဏ်ရာများ(စိုးရိမ်ရ)နှင့် မောင်မောင်ကျော်ဝင်းတွင် ဝဲနားဖူး၊ ယာလက်မောင်း၊ လက်ဖျံဖူးရောင် ပေါက်ပြဲဒဏ်ရာများ (မစိုးရိမ်ရ)တို့ ရရှိခဲ့သဖြင့် သီပေါပြည်သူ့ဆေးရုံသို့ ပို့ကုသခဲ့ရသည်။
အဆိုပါဖြစ်စဉ်နှင့်ပတ်သက်၍ သီပေါမြို့နယ်ရဲတပ်ဖွဲ့ဝင်များက ည ၇ နာရီ ၂၀ မိနစ်အချိန်တွင်ကိုကို(ခ) အင်တူး ၅၀ နှစ်ကို ၎င်းနေအိမ်တွင်ဖမ်းဆီးခဲ့သည်။
အခင်းဖြစ်စဉ်က အသုံးပြုခဲ့သည့် သေနတ်ကို သီပေါမြို့၊ အနောက်ရပ်ကွက်နေရှိ ဆိတ်မွေးမြူရေးခြံအတွင်း ဝှက်ထားခဲ့ကြောင်း ပြောပြသဖြင့် သက်ဆိုင်ရာက သွားရောက်ရှာဖွေခဲ့သည်။
အဆိုပါ ဆိတ်ခြံအတွင်း ပီနံအိတ်ဖြင့် ထည့်ထားသည့် ပစ္စတိုသေနတ် ၁ လက်၊ ၉ မမကျည် ၁၇ တောင့်၊ ပွိုင့် ၂၂ ကျည် ၉ တောင့်၊ ပွိုင့် ၃၀ ကာဘိုင်ကျည် ၃၁ တောင့်၊ အမျိုးအစား-စိစစ်ဆဲကျည် ၁၆ တောင့်၊ ၉၁ လက်ပစ်ဗုံး ၂ လုံး(စနစ်တပါ)၊ တံဆိပ်ပါ ယူနီဖောင်း ၁ စုံ၊ ပစ္စတိုချိုင်းလွယ်အိတ် ၂ အိတ်နှင့် အရှည် ၁၃ ပေခန့်ရှိ နိုင်လွန်ကြိုး ၂ ချောင်း တို့ကို သိမ်းဆည်းရမိခဲ့ပြီး အမှုဖွင့်ကာ ဆက်လက်စစ်ဆေးလျက်ရှိသည်။
