လူကောင်းကို လွန်ခဲ့သော ရက်သတ္တပတ်သုံးပတ်ခန့်တွင် နိုင်ငံတော်လုံခြုံရေးတပ်ဖွဲ့ဝင်များက အကြောင်းအရင်းခိုင်ခိုင်မာမာမပြဘဲ ဖမ်းဆီးခေါ်ဆောင်သွားခဲ့ကြောင်း လူ၏ဇနီး ရှူ ရှောက်လီက အေပီသတင်းဌာနသို့ပြောဆိုခဲ့သည်။

လူသည် ရှင်ကျန်းသို့ရောက်ရှိခဲ့ပြီးနောက် နိုဝင်ဘာ ၃ ရက်တွင် ၎င်းနှင့် အဆက်ပြတ်သွားခဲ့ခြင်းဖြစ်ကြောင်း ရှူကပြောဆိုခဲ့သည်။

လူသည် ရှင်ကျန်းဒေသမြို့တော် အူရမ်ချီရှိ ဓာတ်ပုံဆရာများနှင့် ဆက်သွယ်ခဲ့ပြီး နိုဝင်ဘာ ၅ ရက်တွင် စီချွမ်ပြည်နယ်၌ မိတ်ဆွေတစ်ဦးနှင့်တွေ့ဆုံရန် စီစဉ်ထားခဲ့သော်လည်း ပျောက်ဆုံးသွားခဲ့ခြင်းဖြစ်သည်။
    လူနှင့် ဓာတ်ပုံဆရာတစ်ဦးတို့ကို ရှင်ကျန်းဒေသ လုံခြုံရေးတပ်ဖွဲ့က ထိန်းသိမ်းလိုက်ခြင်းဖြစ်ကြောင်း ကျဲချန်းခရိုင်ရှိ အာဏာပိုင်များကပြောဆိုခဲ့သည်။

ငွေကြေးရရှိရေးအတွက် သွေးရောင်းစားခဲ့ပြီးနောက် အိပ်ချ်အိုင်ဗွီကူးစက်ခံခဲ့ရသည့် ဆင်းရဲသား ကျေးရွာသားများ၏ဘဝကို ဓာတ်ပုံမှတ်တမ်းတင်နိုင်ခဲ့သည့်အတွက် ကမ္ဘာ့သတင်းဓာတ်ပုံဆုကိုရရှိခဲ့သည်။
    လူကောင်းသည် သဘာဝပတ်ဝန်းကျင်ညစ်ညမ်းမှုများနှင့် စက်မှုလုပ်ငန်းများကြောင့် သဘာဝပတ်ဝန်းကျင်ထိခိုက်ပျက်စီးမှုများကိုလည်း ဓာတ်ပုံမှတ်တမ်းတင်ခဲ့သူဖြစ်သည်။

သဘာဝပတ်ဝန်းကျင်ညစ်ညမ်းမှုများကို မှတ်တမ်းတင်ခြင်းသည် တရုတ်ရှိ လူ့အဖွဲ့အစည်း၏သရုပ်သကန်ကိုဖော်ထုတ်ရာရောက်နေသောကြောင့် အစဉ်အလာမီဒီယာများသည် အစိုးရနှင့် ထိပ်တိုက်ဆုံရမည်ကိုစိုးရိမ်၍ ယင်းအကြောင်းအရာများကို ပုံနှိပ်ဖော်ပြလေ့မရှိချေ။
    လူသည် ယခင်ကလည်း ရဲတပ်ဖွဲ့ဝင်များနှင့် ပြဿနာမရှိခဲ့ကြောင်း ဇနီးဖြစ်သူ ရှူက ပြောဆိုခဲ့သည်။ သူက လူမှုရေးတာဝန်ကျေချင်တဲ့သူပဲ၊ ဆင်းရဲမွဲတေသူတွေကိုယ်စား၊ ထုတ်ဖော်ပြောဆိုခွင့်မရှိသူတွေကိုယ်စား လူ့အဖွဲ့အစည်းကို ဓာတ်ပုံကတစ်ဆင့် စကားတွေပြောချင်ခဲ့တဲ့သူပဲ ဟု ၎င်းကပြောဆိုခဲ့သည်။