မင်္ဂလာဒုံမြို့နယ်တွင် "ပယောဂ"ကုသမှုခံယူရန်ရောက်ရှိလာသူက ဓားဖြင့်ထိုးသဖြင့် အိမ်ရှင်အမျိုးသမီးနှစ် ဦး ဒဏ်ရာရရှိခဲ့မှု ဒီဇင်ဘာ ၄ ရက်ကဖြစ်ပွားကြောင်းသိရသည်။
အဆိုပါနေ့ ညနေ ၄ နာရီအချိန် ၊ မင်္ဂလာဒုံ မြို့နယ်၊ ပေါက်ကုန်းရပ်ကွက်တွင် ဓားထိုးမှုဖြစ်ပွား၍ ဒဏ်ရာရရှိကြောင်း သတင်းအရ မင်္ဂလာဒုံမြို့မ ရဲစခန်းမှ တပ်ဖွဲ့ဝင်များက သွားရောက် စစ်ဆေးခဲ့သည်။
စစ်ဆေးချက်အရ အဆိုပါရပ်ကွက်နေ ဒေါ်မိုးလှိုင်ကြည်အုံး(၃၇)နှစ် နေအိမ်၌ရှိနေစဉ် ပယောဂကုသသည့် ၎င်း၏ခင်ပွန်းဖြစ်သူ ဦးနိုင်နိုင်၏ တပည့်ဖြစ်သူ ဖြိုးမောင်မောင်(ခ)ကိုဖြိုးနှင့်အတူ ဒေါ်ဝင်းဝင်းသန်း၊ လှိုင်သာယာမြို့နယ်၊ (၁၉)ရပ်ကွက်နေ ဇော်မင်းထွဋ် (၃၂)နှစ်နှင့် ၎င်း၏ ဇနီး ဒေါ်အေးအေးထွန်းတို့ ရောက်ရှိလာခဲ့သည်ဟု ဆိုသည်။
၄င်းတို့က ခင်ပွန်းဖြစ်သူ ဦးနိုင်နိုင်ထံတွင် ဇော်မင်းထွဋ်ကို ပယောဂကုသရန် ချိန်းဆိုထားကြောင်းပြော ခဲ့သဖြင့် ဒေါ်မိုးလှိုင်ကြည်အုံးနှင့် သမီးဖြစ်သူ မသဇင်နိုင်နိုင်တို့က နေအိမ် ဧည့်ခန်း၌ ဧည့်ခံ စကားပြောဆိုခဲ့သည်။
ထို့သို့ပြောဆိုနေစဉ် ဇော်မင်းထွဋ်က အပေါ့သွားမည်ဟု ပြောဆို ကာ နေအိမ် မီးဖိုချောင်အတွင်းသို့ဝင်ရောက်ခဲ့ပြီး ကြက်သွန်လှီးဓားကို ယူဆောင်၍ ဒေါ်မိုးလှိုင်ကြည်အုံးနှင့် သမီးဖြစ်သူ မသဇင်နိုင်နိုင်တို့နှစ်ဦးကို ဓားနှင့်ထိုးသဖြင့် ထိုးသွင်းဒဏ်ရာများရရှိခဲ့ကြောင်း သိရသည်။
မင်္ဂလာဒုံမြို့မရဲစခန်းက (ပ)၁၁၇၈/ ၁၈၊ ရာဇသတ်ကြီးဥပဒေပုဒ်မ ၃၂၆/၃၂၄ အရ အမှုဖွင့် အရေးယူထားသည်။
