အဆိုပါထုတ်ပြန်ချက်ကို ပြီးခဲ့သည့် နိုဝင်ဘာ(၂၂)ရက်က ပြုလုပ်ခဲ့သည့် လုပ်ငန်းညှိနှိုင်းအစည်းအဝေး လမ်း ညွှန်ချက်အရ ထုတ်ပြန်ခြင်းဖြစ်သည်။ 
“အိမ်နီးချင်း နိုင်ငံမှာဝက်နဲ့ပတ်သက်တဲ့ရောဂါရှိနေတဲ့အခါကျတော့ ကျွန်တော်တို့ဘက်ကလည်း ဆောင်ရွက်စရာ ရှိတာကိုဆောင်ရွက်နေတာပေါ့။ ပြည်ပကတင်သွင်းတဲ့ ဝက်သားပေါက်တွေ၊ အေးခဲဝက် သားတွေ၊ ဝက်ထွက်ပစ္စည်းတင်သွင်းခွင့်ကိုယာယီရပ်ဆိုင်းလိုက်တာပေါ့။ လုံးဝရပ်ဆိုင်းလိုက်တာ မဟုတ်ပါဘူး။ ဝက်တုပ်ကွေးရောဂါ ကြောင့်ယာယီရပ်ဆိုင်းတဲ့ အနေအထားပါ” ဟု စီးပွားရေးနှင့် ကူးသန်းရောင်းဝယ်ရေး ဝန်ကြီးဌာန လက်ထောက်အတွင်းဝန် ဦးခင်မောင်လွင်က ဆိုသည်။ 
ပြီးခဲ့သည့် နိုဝင်ဘာလမှ စတင်ကာ တရုတ်နိုင်ငံတွင် အဆိုပါအာဖရိကဝက်တုပ်ကွေးရောဂါ ဖြစ်ပွားနေခြင်းဖြစ်ပြီး စီးပွားရေးနှင့်ကူးသန်းရောင်းဝယ်ရေးဝန်ကြီးဌာနနှင့် မွေးမြူရေး၊စိုက်ပျိုးရေးနှင့်ဆည်မြောင်းဝန်ကြီးဌာနတို့ ညှိနှိုင်း၍ တင်သွင်းခွင့်လိုင်စင်ထုတ်ပေးမှုကို ယာယီရပ်ဆိုင်းခဲ့ခြင်းဖြစ်သည်။ 
“မွေးမြူရေး နှင့်ကုသရေး ဦးစီးဌာနက တင်သွင်းမှုနဲ့ပတ်သက်ပြီးထောက်ခံချက် ပေးရတာဆိုတော့ ဒီဌာနဘက်ကိုလည်း ယာယီရပ်ဆိုင်းထားပါ ဆိုပြီးတော့တရားဝင်အကြောင်းကြားထားပါတယ်။ ကျွန်တော် တို့ ဘက်ကလည်း တင်သွင်းခွင့်လိုင်စင် ထုတ်ပေးတဲ့ ကိစ္စကိုယာယီရပ်ဆိုင်းထားလိုက်တယ် '' ဟုဦးခင်မောင်လွင် က ဆိုသည်။ 
ပြည်ပခရီးသွားဧည့်သည်များအတွက်ရည်ရွယ်ကာ ပြည်ပမှ ဝက်သားပေါက်၊ အေးခဲဝက်သား နှင့် အေးခဲဝက်သားပြားများကို တရားဝင်တင်သွင်းခွင့်ပြုထားခြင်းဖြစ်သည်ဟု စီးပွားရေးနှင့် ကူးသန်းရောင်းဝယ် ရေးဝန်ကြီးဌာနမှ သိရသည်။