ချီးမြှင့်မည်

အဆိုပါအခမ်းအနားသို့ မြန်မာနိုင်ငံဘောလုံးအဖွဲ့ချုပ် ဥက္ကဋ္ဌနှင့် နေရှင်နယ်လိဂ်ကော်မတီဥက္ကဋ္ဌ ဦးဇော်ဇော်အပါအဝင် ဘောလုံးအဖွဲ့ချုပ် တာဝန်ရှိသူများ၊ မြန်မာနေရှင်နယ်လိဂ် တာဝန်ရှိသူများ၊ ကလပ်အသင်းပိုင်ရှင်များနှင့် အုပ်ချုပ်၊နည်းပြအဖွဲ့ဝင်များနှင့် ကလပ်အသင်းအသီးသီးမှ ကစားသမားများ တက်ရောက်ကြမည်ဖြစ်သည်။

ဆုပေးပွဲအခမ်းအနားတွင် ပြီးခဲ့သည့်ရာသီက မြန်မာနေရှင်နယ်လိဂ်ပြိုင်ပွဲကျင်းပရေးမှ ကျင်းပခဲ့သည့် ပြိုင်ပွဲအသီးသီးမှ ဆုရရှိသည့် အသင်းများနှင့် တစ်နှစ်တာဂိုးသွင်းအများဆုံးဆုရရှိသူများ၊ တစ်နှစ်တာ အကောင်းဆုံးကစားသမားဆုရရှိကြသူများကို ဆုများပေးအပ်ချီးမြှင့်မည်ဖြစ်သည်။ ထို့ပြင် ဗိုလ်ချုပ်အောင်ဆန်းဒိုင်း ရှုံးထွက်ပြိုင်ပွဲတွင် ဆုရရှိသည့် အသင်းများကိုလည်း ဆုများပေးအပ်ချီးမြှင့်မည်ဖြစ်ပြီး မြန်မာအမျိုးသမီးလိဂ်ပြိုင်ပွဲ၌ ဆုရရှိသည့်အသင်းများကိုလည်း ဆုများချီးမြှင့်မည်ဖြစ်သည်။

ရရှိခဲ့

ယခုနှစ် မြန်မာနေရှင်နယ်လိဂ်ချန်ပီယံဆုနှင့် ဗိုလ်ချုပ်အောင်ဆန်းဒိုင်းချန်ပီယံဆုကို ရန်ကုန်ယူနိုက်တက်က ဆွတ်ခူးခဲ့ပြီး နေရှင်နယ်လိဂ်ပြိုင်ပွဲ ဒုတိယဆုကို ရှမ်းယူနိုက်တက်၊တတိယဆုကို ဇွဲကပင်ယူနိုက်တက်အသင်းတို့က ရရှိခဲ့သည်။ နေရှင်နယ်လိဂ် -၂ချန်ပီယံဆုကို ရွိုင်ရယ်သန်လျင်၊ ဒုတိယဆုကို ဒဂုံအက်ဖ်စီ၊တတိယဆုကို တက္ကသိုလ်အသင်းတို့က ရရှိခဲ့သည်။

လူငယ်ပြိုင်ပွဲများတွင် နေရှင်နယ်လိဂ်ယူ-၂၁ချန်ပီယံဆုကို အားကာ/သိပ္ပံ(က) အသင်းက ရရှိခဲ့ပြီး ယူ-၂၀လိဂ် ချန်ပီယံဆုကို အားကာ/သိပ္ပံ(ခ)အသင်းက ရရှိခဲ့သည်။ ယူ-၁၉လိဂ်ချန်ပီယံဆုကို ရှမ်းယူနိုက်တက်က ရရှိခဲ့ပြီး ယူ-၁၈လိဂ်ချန်ပီယံဆုကို ဒဂုံအက်ဖ်စီအသင်းက ရရှိခဲ့သည်။ မြန်မာအမျိုးသမီးလိဂ် ချန်ပီယံဆုကို မြဝတီအသင်းက ရရှိခဲ့သည်။