၂၀၁၈ မြန်မာနေရှင်နယ်လိဂ် ဆုပေးပွဲအခမ်းအနားတွင် လိဂ်ဂိုးသွင်းအများဆုံးဆုနှင့် လူငယ်လိဂ်ဂိုးသွင်း အများဆုံးဆုများကို ပေးအပ်ရန် စီစဉ်ထားခဲ့သော်လည်း လိဂ်ကော်မတီ၏ ဆုံးဖြတ်ချက်အရ မပေးတော့ခြင်းဖြစ်ကြောင်း မြန်မာနေရှင်နယ်လိဂ် စီအီးအို ဦးစိုးမိုးကျော်က မြန်မာတိုင်းမ်နေ့စဉ်သို့ ပြောဆိုခဲ့သည်။
ချီးမြှင့်
ဒီဇင်ဘာ ၂၇ရက်က ကျင်းပခဲ့သည့် ၂၀၁၈ခုနှစ် နေရှင်နယ်လိဂ်ဆုပေးပွဲတွင် သက်ဆိုင်ရာလိဂ်အသီးသီး၌ ချန်ပီယံဖြစ်ခဲ့သည့်အသင်းများ၊ အကောင်းဆုံးနည်းပြဆုနှင့် အကောင်းဆုံးကစားသမားဆုများကို ပေးအပ်ချီးမြှင့်ခဲ့သော်လည်း လိဂ်-၁၊လိဂ်-၂ ဂိုးသွင်းအများဆုံးဆုနှင့် လူငယ်လိဂ်ဂိုးသွင်းအများဆုံးဆုများကို ပေးအပ်ချီးမြှင့်ခဲ့ခြင်းမရှိ၍ ဝေဖန်သံများထွက်ပေါ်ခဲ့သည်။
ဆုံးဖြတ်
" ဂိုးသွင်းအများဆုံးဆုတွေပေးဖို့ စီစဉ်ထားပြီးသားပါ။ ဒါပေမဲ့ လိဂ်ကော်မတီ ဆုံးဖြတ်ချက်အရ နိုင်ငံတကာလိဂ်ဆုပေးပွဲတွေမှာ ကျင့်သုံးနေတဲ့နည်းအတိုင်း သွားမယ်ဆိုပြီး ဆုံးဖြတ်ခဲ့တယ်။ နိုင်ငံတကာလိဂ်ဆုပေးပွဲတွေမှာ ဂိုးသွင်းအများဆုံးဆု တို့ အကောင်းဆုံးဆုတို့မပေးဘူး။ လူငယ်အကောင်းဆုံး ကစားသမားဆု၊လိဂ်-၁အကောင်းဆုံးကစားသမားဆုပဲပေးတယ်။ ဒါပေမဲ့ ဆုတွေကပေးပြီးသားဖြစ်လို့ ဆုရတဲ့သူတွေကို နေရှင်နယ်လိဂ် ရုံးမှာပဲဖြစ်ဖြစ်၊ ကွင်းဖွင့်ဖလားပြိုင်ပွဲ ပထမပိုင်းနားချိန်မှာပဲဖြစ်ဖြစ် ပေးဖို့စီစဉ်ထားတယ်။ ၂၀၁၉ခုနှစ် ဆုပေးပွဲကစပြီးတော့ ဂိုးသွင်းအများဆုံးဆုတွေ ပေးတော့မှာမဟုတ်ပါဘူး" ဟု ဦးစိုးမိုးကျော်က ပြောဆိုခဲ့သည်။
ဝေဖန်
ပြီးခဲ့သည့် နေရှင်နယ်လိဂ်ဆုပေးပွဲတွင် လူငယ်လိဂ်ဂိုးသွင်းအများဆုံးဆုများကို ပေးအပ်ခဲ့ခြင်းမရှိ၍ ၂၀၁၈ခုနှစ် ယူ-၂၁လူငယ်လိဂ် ဂိုးသွင်းအများဆုံးဆုရခဲ့သည့် ဆောက်သမ်းမြန်မာ ကစားသမား ဇော်ဝင်းနိုင်မှာ ၎င်း၏ လူမှုကွန်ရက်၌ဝေဖန်ခဲ့သည်။
၂၀၁၉ခုနှစ် ကွင်းဖွင့်ဖလားပြိုင်ပွဲကို ဇန်နဝါရီ ၆ရက် ညနေ ၃နာရီခွဲတွင် အောင်ဆန်းကွင်း၌ ကျင်းပမည်ဖြစ်ပြီး ရန်ကုန်ယူနိုက်တက်နှင့် ရှမ်းယူနိုက်တက်တို့ ယှဉ်ပြိုင်ကြမည်ဖြစ်သည်။
