အမေရိကန်ပြည်ထောင်စု မီရှီဂန်ပြည်နယ်၌ ၂၀၁၆ ခုနှစ်တွင် သေနတ်ဖြင့် မည်းမည်းမြင်ရာပစ်ခတ်မှုကျူးလွန်ခြင်းကြောင့် လူခြောက်ဦးသေဆုံးစေခဲ့မှုဖြင့် စွပ်စွဲခံထားရသည့် အူဘားယာဉ်မောင်းတစ်ဦးက လူသတ်မှု၊ လူသတ်ရန် စီစဉ်မှုနှင့် လက်နက်ကိုင်ဆောင်မှုများကိုကျူးလွန်ခဲ့ကြောင်း ဝန်ခံပြီး ပြစ်ဒဏ်လျှော့ပေါ့ပေးရန် လျှောက်ထားလိုက်ပြီဖြစ်သည်။
ကာလာမာဇူးမြို့၌ စားသောက်ဆိုင်တစ်ခုအတွင်းပစ်ခတ်မှုကြောင့် လူလေးဦးသေဆုံးခဲ့ပြီး ကားအရောင်းစင်တာတစ်ခု၌ ပစ်ခတ်မှုကြောင့် လူနှစ်ဦးသေဆုံးခဲ့သည်။
အသက် ၄၈ နှစ်အရွယ် ဂျေဆင် ဒယ်လ်တန်က အပလီကေးရှင်းတစ်ဦးက စိတ်နှင့် ရုပ်ကိုထိန်းချုပ်ထားမှုကြောင့် ပစ်ခတ်မှုများကိုကျူးလွန်ခဲ့ရခြင်းဖြစ်ကြောင်း ကနဦးတွင် ထွက်ဆိုခဲ့သည်။
သို့သော် ရုံးတင်စစ်ဆေးမှုစတင်ပြီး မကြာမီတွင် ဒယ်လ်တန်သည် ပြောင်းလဲထွက်ဆိုခဲ့သည်။
ဒယ်လ်တန် ဝန်ခံလာရေးအတွက် အပေးအယူလုပ်မှုမရှိခဲ့ကြောင်း ဥပဒေအရာရှိများကပြောဆိုခဲ့သည်။ ဒယ်လ်တန်သည် လူသတ်မှုခြောက်မှု၊ လူသတ်ရန်ကြံစည်မှု နှစ်မှုနှင့် လက်နက်ကိုင်ဆောင်မှုရှစ်မှုတို့ဖြင့် တရားစွဲဆိုခံခဲ့ရသည်။
ဒယ်လ်တန်သည် ထောင်ဒဏ်တစ်သက်ချမှတ်ခံရနိုင်ခြေ ရှိနေသည်။ကိုယ့်ဆန္ဒအလျောက် ပြစ်မှုများကို ကျူးလွန်ခဲ့ခြင်းဖြစ်ကြောင်း ဒယ်လ်တန်က ထွက်ဆိုခဲ့သည်။
၂၀၁၆ ခုနှစ် ဖေဖော်ဝါရီတွင် ငါးနာရီကြာကာလအတွင်း အူဘားအပလီကေးရှင်းက လူများကို ပစ်ခတ်ရန် ညွှန်ကြားခဲ့ခြင်းဖြစ်ကြောင်း ဒယ်လ်တန်က အစောပိုင်းတွင် ထွက်ဆိုခဲ့သည်။
သေဆုံးသူများမှာ အူဘားခရီးသည်များမဟုတ်သော်လည်း ဒယ်လ်တန်သည် ပစ်ခတ်မှုများပြုလုပ်စဉ်အတွင်း ခရီးသည်အကြိုအပို့များကိုပြုလုပ်ခဲ့ကြောင်း ရဲတပ်ဖွဲ့ဝင်များက ပြောဆိုခဲ့သည်။
