ဗဟန်းမြို့နယ်တွင် ဆေးခြောက် နှင့်အတူဖမ်းဆီးရမိသူ ၄ ဦးကို စစ်ဆေးခဲ့ရာ မူးယစ်ဆေးဝါးရောင်းချသူကို ကွင်းဆက်အဖြစ် ဇန်နဝါရီ ၉ ရက်က မူးယစ်ဆေးဝါးများနှင့်အတူ ဖမ်းဆီးရမိခဲ့သည်။
ဗဟန်းမြို့မရဲစခန်းမှ တပ်ဖွဲ့ဝင်များသည် ဇန်နဝါရီ ၈ ရက် ည ၁၀ နာရီခွဲခန့်တွင် ရေတာရှည်လမ်းနှင့် နန္ဒဝန်လမ်းထောင့်၌ သက်နိုင်အောင်၊ ပြည့်ဖြိုးနိုင်၊ ရဲဇော်ဦး၊ ရဲဖြိုးကျော် တို့အား ဆေးခြောက်ဟုယူဆရသော အရွက်ခြောက် ၆ ဒသမ ၅ ဂရမ် နှင့်အတူ ဖမ်းဆီးရမိခဲ့သည်။
သက်ဆိုင်ရာက မယ(ပ)၃/၁၉၊ မူးယစ်ဆေးဝါးနှင့်စိတ်ကိုပြောင်းလဲစေ သောဆေးဝါးများဆိုင်ရာဥပဒေပုဒ်မ ၁၆(ဂ)/၂၁ ဖြင့် စစ်ဆေးခဲ့ရာ အဆိုပါပစ္စည်းများမှာ ဗဟန်းမြို့နယ်၊ ငါးထပ်ကြီးတောင် ရပ်ကွက်၊ ဦးဖိုးသာလမ်းနေ တောကြီး(ခ)မျိုးမြင့်အောင် (၃၁)နှစ် ထံမှ ဝယ်ယူရရှိကြောင်းပေါ်ပေါက်ခဲ့သည်။
သက်ဆိုင်ရာက ဇန်နဝါရီ ၉ရက် ညသန်းခေါင်ကျော် ၁ နာရီ ၄၀ မိနစ် အချိန်တွင် တောကြီးဂ(ခ) မျိုးမြင့်အောင်၏နေအိမ်ခြံဝင်းအတွင်း ဝင်ရောက် စစ်ဆေးရှာဖွေရာ နေအိမ်နောက်ဖေး အိမ်သာအတွင်း အနက်ရောင်သားရေဂစ်တာအိတ်ကို ပိုက်လျက်ထိုင်နေသည့်ကိုတွေ့ရှိခဲ့သည်။ ၎င်း၏ခန္ဓာကိုယ်နှင့် ဂစ်တာအိတ်အား ဖွင့်၍ရှာဖွေရာ အဆိုပါ ဂစ်တာအိတ်အတွင်းရှိ ကြိုးမပါ နီညိုရောင် ဂစ်တာအဟောင်း၏ ဂစ်တာအိုးအတွင်းမှ WY စာတမ်းပါ စိတ်ကြွရူးသွပ်ဆေးပြား(၁၈၆၀)ပြားနှင့် ဆေးခြောက်ဟုယူဆရသော အရွက်ခြောက်အလေးချိန်(၂၂၈)ဂရမ်ခန့် တို့ကို ရှာဖွေတွေ့ရှိသဖြင့် မူးယစ်ဆေးဝါး ဥပဒေအရ ဆက်လက်အမှုဖွင့် အရေးယူထားသည်။
