AA အဖွဲ့က သစ်တောဝန်ထမ်းတစ်ဦးအား ဖမ်းဆီးခေါ်ဆောင်မှု ကျောက်တော်မြို့နယ်တွင် ဖြစ်ပွားခဲ့ကြောင်း မြန်မာနိုင်ငံရဲတပ်ဖွဲ့က ယနေ့ဇွန်၁၁ရက်၌ သတင်းထုတ်ပြန်သည်။
ရခိုင်ပြည်နယ်၊ ကျောက်တော်မြို့နယ်၊ သစ်တောဦးစီးဌာနမှ တောအုပ် ဦးလှသာထွန်း (စိစစ်ဆဲ)နှင့် ကျောက်တော်မြို့နယ်၊ သရက်တပင်ကျေးရွာနေ တောခေါင်း ဦးစိန်ထွန်း(၅၄)နှစ် ပါ ငါးဦးသည် ဇွန် ၁ ရက် ညနေ ၄ နာရီခွဲတွင် ရန်းချောင်းဘိနယ်စခန်းအနီးရှိ ယာယီပျိုးဥယျာဉ်၌ ရေလောင်းပေါင်းသင်ခြင်းလုပ်ငန်းဆောင်ရွက်ခဲ့သည်။
ထိုသို့ လုပ်ငန်းဆောင်ရွက်ပြီး ကျောက်တော်မြို့သို့ပြန်လာရာ ကျောက်တော်-ပလက်ဝကားလမ်း မိုင်တိုင်(၇ KM)အနီး ပါပီမတောင်ပေါ်၌ အရပ်ဝတ်ဖြင့် လက်နက်များ ကိုင်ဆောင်ထားသည့် AA အဖွဲ့ (၁၂ ဦးခန့်၊စိစစ်ဆဲ)က ၎င်းတို့ ငါးဦးအား အမည်/အလုပ်အကိုင်/နေရပ်/ဇနီးအမည်များ မေးမြန်းခဲ့သည်။
ထို့နောက် ဦးစိန်ထွန်းအား ဖမ်းဆီးခေါ်ဆောင်ထားပြီး တောအုပ် ဦးလှသာထွန်းပါလေးဦးအား လွှတ်ပေးခဲ့သည်။ တောခေါင်း ဦးစိန်ထွန်းသည် ဇွန် ၁၀ ရက်အထိ ပြန်လည်ရောက်ရှိလာခြင်းမရှိ၍ အရေးယူပေးရန် သက်ဆိုင်ရာသို့ တိုင်တန်းခဲ့သည်။
တိုင်တန်းချက်အရ ကျောက်တော်မြို့မရဲစခန်းက AA အဖွဲ့အား(ပ)၅၈/၂၀၁၉၊ အကြမ်းဖက်မှုတိုက်ဖျက်ရေး ဥပဒေပုဒ်မ ၅၀(ခ)ဖြင့် အမှုဖွင့် ထားသည်။
