အိန္ဒိယနိုင်ငံ ချန်နိုင်းမြို့တွင် ကျင်းပခဲ့သည့် အာရှနိုင်ငံများ Special Olympics International Football Championship ပြိုင်ပွဲတွင် မြန်မာနိုင်ငံကိုယ်စားပြု ဉာဏ်ရည်မသန်စွမ်းသူများ ဘောလုံးအသင်းက ပထမဆုဆွတ်ခူးရရှိခဲ့ကြောင်း သိရသည်။
အုပ်စုသုံးခုခွဲ
အဆိုပါပြိုင်ပွဲကို သြဂုတ်၂ရက်မှ ၈ရက်အထိ ကျင်းပခဲ့ပြီး အရှေ့တောင်အာရှနှင့် အာရှမှပြိုင်ပွဲဝင်အသင်းများဖြစ်သည့် မြန်မာ၊ မလေးရှား၊ အင်ဒိုနီးရှား၊ တောင်ကိုရီးယား၊ သြစတြေးလျ ၊ အီဂျစ်၊ ဘင်္ဂလားဒေ့ရှ်၊ မော်လဒိုက်၊ အိန်္ဒိယစသည့် နိုင်ငံပေါင်း ၉ နိုင်ငံမှ အသင်းပေါင်း၁၀ သင်းဖြင့် အုပ်စု သုံးခုခွဲကာ ယှဉ်ပြိုင်ခဲ့ကြသည်။ အသင်းတစ်သင်းလျှင် ငါးယောက်ထားကစားပြီး ပထမပိုင်း၁၅မိနစ်ကစား ငါးမိနစ်နား ၊ ဒုတိယပိုင်း ၁၅မိနစ်ကစားပုံစံဖြင့် ပြိုင်ပွဲအားကျင်းပခဲ့ကြသည်။
ဆွတ်ခူး
အုပ်စုပွဲစဉ်များယှဉ်ပြိုင်အပြီးတွင် အုပ်စု(က)၌ မလေးရှား အသင်းက ပထမ၊ ဘင်္ဂလားဒေ့ရှ် အသင်းက ဒုတိယနှင့် တောင်ကိုရီးယားအသင်းက တတိယ၊ အုပ်စု(ခ)တွင် အီဂျစ်အသင်း က ပထမ၊ သြစတြေးလျ အသင်းက ဒုတိယနှင့် မော်လဒိုက်အသင်းက တတိယ၊ အုပ်စု(ဂ)တွင် မြန်မာအသင်းက ပထမ၊ အင်ဒိုနီးရှားအသင်း က ဒုတိယ နှင့် အိန်္ဒိယ (ခ)အသင်းက တတိယဆု ဆွတ်ခူးခဲ့ကြသည်။
ကြိုဆိုခဲ့
မြန်မာဉာဏ်ရည်မသန်စွမ်းသူများ ဘောလုံးအသင်းကို အဖွဲ့ခေါင်းဆောင်အဖြစ် မြန်မာနိုင်ငံဉာဏ်ရည်မသန်စွမ်းသူများအဖွဲ့ချုပ် ဒုတိယ ဥက္ကဋ္ဌ ဒုတိယဗိုလ်မှူးကြီး သန်းဇော်(ငြိမ်း) ၊ အုပ်ချုပ်၊ နည်းပြနှစ်ဦး၊ ကစားသမားရှစ်ဦး စုစုပေါင်း ၁၁ ဦးတို့ ပါဝင်ခဲ့သည်။
အောင်ပွဲရ မြန်မာဉာဏ်ရည်မသန်စွမ်းသူများဘောလုံးအသင်းသည် သြဂုတ် ၈ရက် ညပိုင်းက ရန်ကုန်အပြည်ပြည်ဆိုင်ရာလေဆိပ်သို့ ပြန်လည်ရောက်ရှိခဲ့ရာ Special Olympics မြန်မာနိုင်ငံ ဉာဏ်ရည်မသန်စွမ်းသူများ အဖွဲ့ချုပ်ဥက္ကဋ္ဌ ဒေါက်တာ မြင့်သိန်းနှင့်အမှုဆောင်များ၊ မြန်မာနိုင်ငံဘိုးလင်းအဖွဲ့ချုပ်ဥက္ကဋ္ဌ ဦးမျိုးအောင်နှင့် ဆုရအားကစားသမားများ၏ မိဘဆွေမျိုးများက ကြိုဆိုခဲ့ကြသည်။
