နောင်ချိုမြို့တွင် ရထားစီးသည့် နိုင်ငံခြားသူ၏ခရီးဆောင်အိတ်ကို ခိုးယူရန်ကြံစည်သူအား ရဲတပ်ဖွဲ့က ဖမ်းဆီးအရေးယူထားသည်။
စက်တင်ဘာ ၂၉ ရက် နံနက်၁၁ နာရီ ၁၅ မိနစ်တွင် နောင်ချိုမြို့နယ်၊ ဂုတ်ထိပ်ကျေးရွာ တံတား လုံခြုံရေးရဲတပ်ဖွဲ့ဝင်များသည် ဂုတ်ထိပ်ဘူတာအနီး မသင်္ကာဖွယ်တွေ့ရှိသူ သိန်းထွန်း(ခ)ဘာဘူကို စစ်မေးခဲ့သည်။
၎င်းကို စုံစမ်းချက်အရ အမှတ်(၁၃၁) မန္တလေး-လားရှိုး အဆန်ရထားဖြင့် မန္တလေးမှ လားရှိုးသို့ လိုက်ပါခဲ့ပြီး ဂုတ်ထိပ်ဘူတာအနီးအရောက်၌ တစ်တွဲတည်း လိုက်ပါလာသည့် နိုင်ငံခြားသူတစ်ဦးက ပစ္စည်းတင်စင်ပေါ် တင်ထားသည့် ခရီးဆောင်အိတ်ကို ခိုးယူ၍ ရထားပေါ်မှ ပစ်ချခဲ့ကြောင်းနှင့် ဂုတ်ထိပ်ဘူတာတွင် ရထားရပ်စဉ် အဆိုပါအိတ်ကို သွားရောက်ကောက်ယူရန် ရထားပေါ်မှဆင်းချိန်စဉ် စစ်မေးခံရခြင်းဖြစ်ကြောင်း စစ်ဆေးပေါ်ပေါက်ခဲ့သည်။
ရဲတပ်ဖွဲ့ဝင်များက အဆိုပါခရီးဆောင်အိတ်ကို လိုက်လံရှာဖွေရာ ဂုတ်ထိပ်ကျေးရွာအနီး ရထားလမ်း မိုင်တိုင်(၄၁၆/၁၂-၁၃)ကြား၌တွေ့ရှိရပြီး အဆိုပါအိတ်အတွင်းမှ အမေရိကန်ဒေါ်လာ ၁၃ ဒေါ်လာ၊ အင်ဒိုနီးရှားငွေ/အကြွေစေ့ရောရာ ၅၀,၈၀ဝ ရူပီး၊ ဗီယက်နမ်ငွေ ၄၀,ဝ၀ဝ ဒေါင်၊ တရုတ်ငွေ ၅၅၀ ယွမ်၊ Apple တံဆိပ်ပါ ဖုန်းဘတ္ထရီ တစ်လုံး၊ ဖုန်းအားသွင်းကြိုး ငါးချောင်း၊ ဆေးဝါးများ၊ အဝတ်အစားများနှင့် အသုံးအဆောင်ပစ္စည်းများကိုတွေ့ရှိသိမ်းဆည်းရမိခဲ့သည်။
ပစ္စည်းပိုင်ရှင်မှာ ကနေဒါနိုင်ငံသူ Amy Melissa Tom အသက် (၂၃)နှစ်ဖြစ်ပြီး သီပေါမြို့ဘူတာ၌ ဆင်းသွားကြောင်း သိရှိရသဖြင့် ၄င်းကို ဆက်သွယ်အကြောင်းကြားထားပြီး ဖမ်းဆီးရမိသူကို နောင်ချိုမြို့မရဲစခန်းက (ပ)၂၀၄/၁၉၊ ရာဇသတ်ကြီးပုဒ်မ ၃၇၉/ကျင့် ၅၄ အရ အမှုဖွင့် အရေးယူထား သည်။
