ညအချိန်၌ ဆိုင်ကယ်ကယ်ရီမောင်းသူတစ်ဦးက မင်းလင်တောင်ကျောင်းထိုင်ဆရာတော်၏ လည်ပင်းကို ဓားနှင့်ထောက်ပြီး ငွေလုယက်မှု ရေနံချောင်းမြို့တွင် ဖြစ်ပွားခဲ့ကြောင်း ညောင်လှရဲစခန်းမှ သိရသည်။
ဖြစ်စဉ်မှာ အောက်တိုဘာ ၁၈ရက် ည၁၀နာရီဝန်းကျင်တွင် သစ်တပွေအုပ်စု၊မင်းလင်တောင်ကျောင်းဆရာတော်ဦးသုမနသည် ကျောင်းရှေ့ ကွပ်ပျစ်တွင် တစ်ပါးတည်းတရားထိုင်နေစဉ် အမျိုးသားတစ်ဦးက ပုဆိုးခြုံ၍ ရောက်လာခဲ့သည်။
ထို့နောက် ၎င်းက ဆရာတော်၏လည်ပင်းကိုဓားနှင့်ထောက်၍ ညနေကပိုက်ဆံထုတ်ပေးဟုတောင်းရာ အသံမှတ်မိသဖြင့် ထူးမောင်ရယ်မလုပ်ပါနှင့်ဟု ဆရာတော်က ပြောခဲ့ကြောင်း၊ပိုက်ဆံထပ်မံတောင်းနေသောကြောင့် ငွေတစ်သိန်းကိုထုတ်ပေးလိုက်စဉ်ကျန်သေးတယ်သတ်ပစ်မယ်ဟုပြောသဖြင့် ငွေခြောက်သိန်းနှစ်သောင်းကျပ်အား ထပ်မံထုတ်ပေးလိုက်ကြောင်း၊ ၎င်းက ဆရာတော်အားကျောင်းဆောင်အတွင်းထည့်သွင်းပြီးအပြင်မှတံခါးချက်ထိုးကာထွက်ခွာသွားကြောင်း အဆိုပါရဲစခန်းမှ သိရသည်။
ဆရာတော်၏ဒါယကာဖြစ်သူ ဦးညွ့န်လင်းက ထူးမောင်အား အရေးယူပေးရန် သက်ဆိုင်ရာသို့ တိုင်တန်းသဖြင့် ရေနံချောင်းမြို့ ညောင်လှနယ်မြေရဲစခန်းက(ပ)၁၅၂/၂၀၁၉၊ရာဇသတ်ကြီး ပုဒ်မ၃၈၂/၂၉၅အရ သစ်တပွေအုပ်စုနေ ထူးမောင်၂၄နှစ်ကို အမှုဖွင့်ကာ ဖမ်းဆီးရမိရေးဆောင်ရွက်လျက်ရှိသည်။
