ဖြစ်စဉ်မှာ အောက်တိုဘာ၂၆ရက် ည၁၁နာရီခွဲခန့်တွင် မွန်ပြည်နယ်ပေါင်မြို့နယ် မုတ္တမကျွဲခြံ ကျေးရွာရှိ ကျိုက်ပိကျိုက်ပွန်ဘုရားပွဲ၌ အားမာန်သစ်ဇာတ်ပွဲစင်ဘေး ကခုန်နေသူချင်းရန်ဖြစ်ပြီး လူသတ်မှုဖြစ်ပွားကြောင်းသတင်းအရ မုတ္တမနယ်မြေရဲစခန်းမှတပ်ဖွဲ့ဝင်များက သွားရောက်စစ်ဆေးခဲ့သည်။

သက်ဆိုင်ရာ၏ စုံစမ်းချက်အရ ဇာတ်စင်အနီး အရှေ့ဝဲဘက်ခြမ်းတွင် ဇာတ်ပွဲ စတိတ်ရှိုးဖျော်ဖြေနေချိန် ဇတ်စင်အနောက်ဘက်ခြမ်းအနီး၌ ကျွဲခြံကျေးရွာနေ အောင်ရဲထွန်း(၁၉)နှစ်မှာ ရင်ညွန့်ထိုးသွင်း ဒဏ်ရာရရှိထားသည်ကို တွေ့ရှိခဲ့သည်။

ဒဏ်ရာရရှိသူကိုပြည်သူ့ဆေးရုံသို့ပို့ဆောင်စဉ်သေဆုံးသွားခဲ့သည်။ မုတ္တမနယ်မြေရဲစခန်းက(ပ)၁၁၄၅/၁၉ရာဇသတ်ကြီးဥပဒေပုဒ်မ၃၀၂အရအမှုဖွင့်ကာ စုံစမ်းခဲ့သည်။

စုံစမ်းချက်များအရ ပြစ်မှုကျူးလွန်သူမှာ ကျွဲခြံကျေးရွာကျောက်မိုင်းဝန်ထမ်း မင်းခန့်စည်သူ(၁၇)နှစ်ဖြစ်ကြောင်းသိရှိရသဖြင့် ၎င်းကိုရဲတပ်ဖွဲ့ကအောက်တိုဘာ၂၇ရက် နံနက်၁နာရီကျော်ခန့်တွင် အခင်းဖြစ်ဇာတ်စင်မှပေ (၂၀ဝ)ခန့်အကွာပွဲခင်းအတွင်း ဖမ်းဆီးရမိခဲ့သည်။အခင်းဖြစ်ပွားစဉ် ၎င်းအသုံးပြုခဲ့သည့် သက်သေခံစတီးခေါက်ဓားကိုပါ သိမ်းဆည်းရမိခဲ့သည်။

အမှုနှင့်ပတ်သက်၍၎င်းကိုစုံစမ်းချက်များအရ ကျွဲခြံကျေးရွာရှိကျိုက်ပိကျိုက်ပွန်ဘုရားပွဲသို့ ညဘက်ရောက်ရှိခဲ့ကြောင်း၊ည၉နာရီခွဲအချိန်ဇာတ်ပွဲရုံထဲရောက်ရှိကာဇာတ်စင်အနီးမှဇာတ်ပွဲကြည့်နေစဉ် စတိတ်ရှိုးဆိုချိန်၌ လူငယ်သဘာဝကခုန်ခဲ့သည်ဟု ထွက်ဆိုသည်။

ထိုသို့ကခုန်စဉ် လူငယ်တစ်ဦးနှင့်ပခုံးချင်းတိုက်မိရာမှ စကားများရန်ဖြစ်ခဲ့ကြောင်း၊ထိုသူက၎င်းကိုစတင်ကာ လက်သီးနှင့်ထိုးခဲ့သဖြင့်၎င်းကအိတ်ထဲအသင့်ပါလာသောစတီးခေါက်ဓားနှင့်ရင်ညွန့်ကိုထိုးခဲ့ပြီးဇာတ်ရုံအပြင်ဘက်ပွဲခင်းထဲရှိနေစဉ်ရဲတပ်ဖွဲ့ဝင်တို့၏ဖမ်းဆီးခြင်းခံရခြင်းဖြစ်ကြောင်း စစ်ဆေးပေါ်ပေါက်ခဲ့သည်။