ဗြိတိန်နိုင်ငံ၌ ကွန်ဆာဗေးတစ်အစိုးရက ခြွေတာရေးကျင့်သုံးခဲ့သည့် ၂၀၁၀ ပြည့်နှစ်မှစ၍ စာကြည့်တိုက် ၈၀ဝ ခန့်ကို ပိတ်သိမ်းခဲ့ရပြီးဖြစ်ကြောင်း မကြာသေးမီတွင် ထုတ်ပြန်ခဲ့သည့် စာရင်းအင်းများအရ သိရသည်။
ဗြိတိန်၌ ၂၀၁၀ ပြည့်နှစ်မှစ၍ စာကြည့်တိုက် ၇၃၃ ခုကို ပိတ်သိမ်းခဲ့ရပြီးဖြစ်ကာ လက်ရှိတွင် ၃၅၈၃ ခုကျန်ရှိနေသေးကြောင်း အများပြည်သူဘဏ္ဍာရေးနှင့်စာရင်းအင်းချာတာအင်စတီကျု(ဆစ်ဖာ)က နှစ်စဉ်ပြုလုပ်နေကျ စစ်တမ်းတွင်ဖော်ပြထားသည်။ ဗြိတိန်ရှိ စာကြည့်တိုက်စုစုပေါင်း၏ ငါးပုံတစ်ပုံကို ပိတ်သိမ်းခဲ့ရခြင်းဖြစ်သည်။
ထို့ပြင် လစာရရှိသည့် စာကြည့်တိုက်ဝန်ထမ်းဦးရေသည်လည်း ကျဆင်းသွားခဲ့သည်။ ၂၀ဝ၉-၂၀၁၀ အတွင်း လစာရရှိသည့် စာကြည့်တိုက်ဝန်ထမ်း ၂၄၀ဝ၀ ရှိခဲ့သော်လည်း ယမန်နှစ်တွင် ၁၅၃၀ဝ ဦးနှင့် စေတနာ့ဝန်ထမ်း ၅၁၀ဝ၀ သာရှိတော့ကြောင်း ဆစ်ဖာကပြောဆိုခဲ့သည်။
စာကြည့်တိုက်သို့လာရောက်သည့် စာဖတ်၊ စာငှားသူဦးရေသည်လည်း ကျဆင်းသွားခဲ့သည်။ ၂၀ဝ၉-၂၀၁၀ ခုနှစ်အတွင်း စာကြည့်တိုက်သို့ စာဖတ်၊စာငှားရန် လာရောက်မှု အကြိမ် ၃၁၅ သန်း ရှိခဲ့ပြီး ယမန်နှစ်အတွင်း အကြိမ် ၂၂၆ သန်းရှိခဲ့သည်။
စာကြည့်တိုက်များပိတ်သိမ်းရသည်မှာ ဒေသဆိုင်ရာအာဏာပိ်ုင်များစီမံမှုညံ့ဖျင်းခြင်းကြောင့်သာဖြစ်ကြောင်း ဝန်ကြီးချုပ် ဘောရစ်ဂျွန်ဆင်က ယခုအပတ်အစောပိုင်းတွင် ဘီဘီစီသို့ပြောဆိုခဲ့သည်။ သို့သော် ဗဟိုအစိုးရသည် စာကြည့်တိုက်များတိုးတက်ကောင်းမွန်ရေးအတွက် တာဝန်ယူရမည်ဟု ၁၉၆၄ ပြည်သူ့စာကြည့်တိုက်ဥပဒေတွင်ဖော်ပြထားကြောင်း စာကြည့်တိုက်အသင်းအမှုဆောင်အရာရှိ နစ်ပူးက ပြောဆိုခဲ့သည်။
