ယင်းလူနာနှင့်ပတ်သက်သောသတင်းများ အား မတ် ၁၈ ရက်ထုတ် ကျန်းမာရေးနှင့် အားကစားဝန်ကြီးဌာန၏ သတင်းထုတ်ပြန်ချက်တွင်  ပါရှိခဲ့ကြောင်း၊ ယင်းလူနာသည် မူလကတည်းက Down’s Syndrome ဟုခေါ်သည့် ရောဂါခံစား နေရသူဖြစ်ပြီး သေဆုံးရခြင်းမှာ သွေးဖြူဥအလွန် အမင်း မြင့်တက်ခြင်း၊ သွေးဆိပ်တက်ခြင်းနှင့် အဆုတ်ရောင်ခြင်းတို့ကြောင့် သေဆုံးရခြင်းဖြစ်ပြီး  COVID-19  ကြောင့် မဟုတ်ကြောင်း ပြန်ကြားထားသည်ဟု ၎င်းက ရှင်းလင်းခဲ့သည်။

မတ် ၁၈ ရက်  ည ၈ နာရီ ကျန်းမာရေးနှင့်အားကစားဝန်ကြီးဌာန၏ ထုတ်ပြန်ချက်တွင် မင်္ဂလာဒုံမြို့နယ်တွင်နေထိုင်သော အသက်(၄၀)နှစ်အရွယ် အမျိုးသားတစ်ဦးသည် ဖျားခြင်း၊ ချောင်းဆိုးခြင်း၊ အသက်ရှူ ခက်ခဲခြင်း စသောလက္ခဏာများဖြင့် မတ် ၁၇ ရက်တွင် မြောက်ဥက္ကလာပသင်ကြားရေးနှင့် အထွေထွေရောဂါကုဆေးရုံကြီးသို့ သွားရောက်ပြသခဲ့ရာ စောင့်ကြည့်လူနာအဖြစ် သတ်မှတ်၍ လိုအပ်သော ကုသမှုများပေးနေစဉ် မတ် ၁၇ ရက် ည ၉ နာရီခွဲတွင် သေဆုံးသွားခဲ့ကြောင်းဖော်ပြခဲ့သည်။

ယင်းလူနာတွင် ရောဂါအခံရှိပြီး သေဆုံးရသောအကြောင်းရင်းမှာ ကနဦး သုံးသပ်ချက်နှင့် စစ်ဆေးချက်များအရ သွေးတွင်းသွေးဖြူဥ အလွန်အမင်း မြင့်မားပြီး သွေးဆိပ်တက်ခြင်းနှင့် အဆုတ်ရောင်ခြင်း လက္ခဏာများကြောင့် ဖြစ်နိုင်ပြီး ၎င်းထံမှ ဓာတ်ခွဲနမူနာရယူ၍ အမျိုးသားကျန်းမာရေးဓာတ်ခွဲမှုဆိုင်ရာဌာန(ရန်ကုန်)သို့ပေးပို့စစ်ဆေးခဲ့ရာ  COVID-19 မတွေ့ရှိရကြောင်း ကျန်းမာရေးနှင့် အားကစားဝန်ကြီး ဌာနက ထုတ်ပြန်ခဲ့သည်။