ကျွန်းလှမြို့နယ်၌ Covid 19 စောင့်ကြည့်မှု ခံယူနေသည့် အမျိုးသားတစ်ဦးအား အရက်မသောက်ရန် ပြောဆိုရာက တာဝန်ရှိသူ သုံးဦး ဓားဖြင့် ခုတ်ခံရမှုကို စစ်ဆေးလျက်ရှိကြောင်း ဧပြီ ၂၁ ရက်နေ့တွင် ရဲတပ်ဖွဲ့မှသိရသည်။
ဧပြီ ၁၉ ရက်နေ့ ၂၀း ၃၀ အချိန် ကျွန်းလှမြို့နယ်၊ ကျောင်းအင်းကျေးရွာ၊ တင်းတိမ်ရံအလယ်တန်းကျောင်း၌ COVID-19 ဗိုင်းရပ်စ် ကူးစက်ရောဂါသံသယဖြင့် စောင့်ကြည့်နေသော အဆိုပါကျေးရွာနေ ကျော်ခိုင်(၃၉)နှစ်မှာ အရက်မူးယစ်နေခဲ့သည်။
တင်းတိမ်ရံ ကျေးရွာအုပ်ချုပ်ရေးမှူး ဦးခင်မောင်စော(၅၇)နှစ်နှင့် ဒေါ်တင်မြမြလွင်(၃၆)နှစ်ပါ ၃ ဦးက ကျန်းမာရေးဝန်ကြီး ဌာနက ထုတ်ပြန်ထားသည့် အမိန့်နှင့် စည်းကမ်းချက်များကို လိုက်နာရန် ၎င်းတို့အား ပြောကြားခဲ့သည်။
ယင်းအပေါ် မကျေနပ်၍ ကျော်ခိုင်က ထမင်းချက်ဆောင်အတွင်းရှိ အရှည် ၇ လက်မခန့် ဓါးဦးချွန် ၂ ချောင်းဖြင့် ဝင်ရောက် ထိုးခုတ်ခဲ့သည်။ ဦးခင်မောင်စောနှင့် ဒေါ်တင်မြမြလွင်တို့ပါ ၃ ဦးတွင် ဦးခေါင်းထိပ်/ မေးစေ့/ ဝဲလက်မောင်းပြတ်ရှ ဒဏ်ရာများရရှိခဲ့သောကြောင့် ကျော်ခိုင်(၃၉)နှစ်ကို အရေးယူပေးရန်တိုင်ကြားခဲ့သည်။ ကျွန်းလှမြို့မရဲစခန်းက (ပ)၃၄/၂၀၂၀၊ ရာဇသတ်ကြီးပုဒ်မ ၃၃၃/၃၂၆ အရ အမှုဖွင့် စစ်ဆေးလျက်ရှိသည်။
