ရှမ်းပြည်နယ်(တောင်ပိုင်း) လင်းခေးခရိုင် မိုးနဲမြို့နယ်၊ နာဟောင်ရပ်ကွက်ရှိ Community Based Facility Quarantine စင်တာတွင် Quarantine ဝင်ရောက်နေသူ အသက် ၆၀အရွယ် အမျိုးသမီးတစ်ဦးသည် ယနေ့ဇူလိုင် ၁၄ ရက်၌ နှလုံးရောဂါဖြင့်သေဆုံးခဲ့ကြောင်း မြို့နယ်ကိုဗစ်-၁၉ ရောဂါကာကွယ်ထိန်းချုပ်၊ကုသရေးလုပ်ငန်းကော်မတီ၏ ထုတ်ပြန်ချက်အရ သိရသည်။
အဆိုပါအမျိုးသမီးကြီးသည် မိုးနဲမြို့၊ကွန်နားကျေးရွာအုပ်စု ၊ဆွမ်မရမ်းကျေးရွာတွင် နေထိုင်သူဖြစ်ကာ ဇူလိုင် ၃ ရက် ည ၁၀ နာရီခန့်က ထိုင်းနိုင်ငံမှပြန်လည်ဝင်ရောက်လာပြီး Quarantine ဝင်ရောက်နေသည်မှာ ၁၁ ရက်ခန့်ရှိပြီဖြစ်သည်။
မိုးနဲမြို့သို့ ပြန်လည်မဝင်ရောက်မီ ထိုင်းနိုင်ငံတွင် နှလုံး ရောဂါဖြင့် ဆေးကုသမှုများ ဆောင်ရွက်ခဲ့ရသည်။
သေဆုံးသူအမျိုးသမီး၏နှာခေါင်းနှင့် အာခေါင် တို့ဖတ်နမူနာများကို Quarantine ဝင်စဉ်က ဓာတ်ခွဲစစ် ဆေးရန်ပို့ဆောင်ထားခဲ့ရာ ဇူလိုင် ၁၂ ရက် ဓာတ်ခွဲစမ်းသပ်ချက်အဖြေအရ Covid-19ရောဂါ (Negative) ဖြစ်ကြောင်း သိရသည်။
ယနေ့နံနက် ၆ နာရီခန့်တွင် အိပ်ယာမှနိုးထလာခြင်းမရှိသဖြင့် ကျန်းမာရေးဝန်ထမ်းများက စမ်းသပ်စစ်ဆေးရာမှ သေဆုံးနေသည်ကို သိရှိခဲ့ခြင်းဖြစ်သည်။
